ರಾಂಪುರ | ದುರಸ್ತಿ ಕಾಣದ ಬೇವೂರ-ಬೋಡನಾಯ್ಕದಿನ್ನಿ ರಸ್ತೆ

ಆಲಮಟ್ಟಿ, ವಿಜಯಪುರ, ಮುದ್ದೇಬಿಹಾಳಕ್ಕೆ ತೆರಳಲು ಸಂಪರ್ಕ ಕಲ್ಪಿಸುವ ಈ ರಸ್ತೆಯಲ್ಲಿ ಬೇವೂರಿನಿಂದ ಬೋಡನಾಯ್ಕದಿನ್ನಿ ಕ್ರಾಸ್‌ವರೆಗೆ ಅಂದಾಜು 3.60 ಕಿ.ಮೀ.ನಷ್ಟು ರಸ್ತೆಯಲ್ಲಿ ಈಗಾಗಲೇ ದುರಸ್ತಿ ಹಾಗೂ ಡಾಂಬರೀಕರಣ ಕಾರ್ಯ ಮುಗಿದಿದೆ. ಮಧ್ಯದಲ್ಲಿ 1 ಕಿ.ಮೀ.ನಷ್ಟು ರಸ್ತೆ ಮಾತ್ರ ದುರಸ್ತಿಯಾಗಿಲ್ಲ.

ರೈತರೊಬ್ಬರು ಪರಿಹಾರದ ವಿಷಯವಾಗಿ ನ್ಯಾಯಾಲಯದ ಮೆಟ್ಟಿಲು ಏರಿರುವುದರಿಂದ ಈ ರಸ್ತೆ ದುರಸ್ತಿಯಾಗದೇ ಉಳಿದಿದ್ದು, ಮಳೆಯಾದರೆ ವಾಹನ ಸಂಚಾರಕ್ಕೆ ಬಹಳಷ್ಟು ತೊಂದರೆಯಾಗಿ ಪರದಾಡುವಂತಾಗುತ್ತದೆ.

ಒಂದು ವಾರದಿಂದ ಸುರಿಯುತ್ತಿರುವ ಮಳೆಯಿಂದಾಗಿ ಈ ರಸ್ತೆ ಸಂಪೂರ್ಣ ಹಾಳಾಗಿದ್ದು, ದೊಡ್ಡ ವಾಹನಗಳನ್ನು ಬಿಟ್ಟರೆ ಮೋಟರ್‌ ಸೈಕಲ್, ಚಕ್ಕಡಿಗಳ ಸಂಚಾರಕ್ಕೆ ಅಡಚಣೆಯಾಗಿದೆ. ರಸ್ತೆಯಲ್ಲಿಯ ಹಳ್ಳಕ್ಕೆ ಜಮೀನುಗಳಲ್ಲಿಯ ಮಣ್ಣು ಬಂದು ನಿಂತು ಎಲ್ಲವೂ ಕೆಸರಿನಿಂದ ಕೂಡಿ, ಪಾದಚಾರಿಗಳು ಸಹ ಎದ್ದು ಬಿದ್ದು ಸಾಗಬೇಕಾದ ಸ್ಥಿತಿಯಿದೆ.

ಕೋರ್ಟ್‌ ವ್ಯಾಜ್ಯ ಇತ್ಯರ್ಥವಾಗದೇ ಇರುವುದರಿಂದ ತನಗೆ ಈ ರಸ್ತೆ ರಿಪೇರಿ, ಡಾಂಬರೀಕರಣ ಮಾಡುವುದು ಸಾಧ್ಯವಿಲ್ಲ ಎಂದು ಗುತ್ತಿಗೆದಾರ ಲೋಕೋಪಯೋಗಿ ಇಲಾಖೆಗೆ ಬರೆದು ಕೊಟ್ಟಿರುವುದರಿಂದ ಈಗ ಇಲಾಖೆ ಅನಿವಾರ್ಯವಾಗಿ ಗುತ್ತಿಗೆ ರದ್ದುಗೊಳಿಸುವಂತೆ ಸರ್ಕಾರಕ್ಕೆ ಪತ್ರ ಬರೆದಿದೆ. ಸರ್ಕಾರ ಗುತ್ತಿಗೆ ರದ್ದುಗೊಳಿಸಿದ ನಂತರ ಮತ್ತೆ ಹೊಸ ಟೆಂಡರ್ ಕರೆಯಬೇಕಾಗುತ್ತದೆ ಎಂದು ಹೇಳಲಾಗುತ್ತಿದೆ.

ಇದೆಲ್ಲಕ್ಕೂ ಸಮಯ ಬೇಕಾಗುತ್ತದೆ. ಆದರೆ ರಸ್ತೆ ಹದಗೆಟ್ಟು ಹೋಗಿದ್ದು ವಾಹನಗಳ ಸಂಚಾರಕ್ಕೆ ತೊಂದರೆಯಾಗಿರುವುದನ್ನು ತಪ್ಪಿಸಲು ಉಪಾಯ ಕಂಡುಕೊಳ್ಳಬೇಕು ಎಂದು ಎರಡೂ ಗ್ರಾಮಗಳ ಜನ ಹಾಗೂ ಪ್ರಯಾಣಿಕರು ಹೇಳುತ್ತಾರೆ.

ಹಾಕಿದ ಗರಸು ಮಾಯ: ರಸ್ತೆ ಹದಗೆಟ್ಟಿರುವುದನ್ನು ಮನಗಂಡ ಲೋಕೋಪಯೋಗಿ ಇಲಾಖೆ ವಾರದ ಹಿಂದಷ್ಟೇ ಒಂದಿಷ್ಟು ಕಲ್ಲು ಮಿಶ್ರಿತ ಗರಸು ಹಾಕಿತ್ತು. ವಿಪರೀತವಾಗಿ ಬಿದ್ದ ಮಳೆಗೆ ಅದೆಲ್ಲವೂ ಹಳ್ಳಕ್ಕೆ ಹರಿದು ಬಂದು ರಾಡಿಯಾಗಿ ನಿಂತು ರಸ್ತೆಗೆ ಕಾಲಿಡಲು ಸಹ ಆಗದ ಸ್ಥಿತಿಗೆ ಬಂದಿದೆ.