ಸದ್ಯ ಎಂಎಸ್‌ಪಿಎಲ್‌ಗೆ ನೀಡಲಾಗಿರುವ ಗಣಿಯು 1,200 ವರ್ಷಗಳಷ್ಟು ಪುರಾತನವಾದ ಕುಮಾರಸ್ವಾಮಿ ದೇವಸ್ಥಾನದ ಸನಿಹವಿದೆ. ‘ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆಯ ಪ್ರಕಾರ ಸ್ಮಾರಕಗಳ 600 ಮೀಟರ್ ವ್ಯಾಪ್ತಿಯಲ್ಲಿ ಗಣಿಗಾರಿಕೆ ನಿಷಿದ್ಧ. ಆದರೆ, ರಾಜ್ಯ ಸರ್ಕಾರ ಶಿಫಾರಸು ಮಾಡಿರುವ 28.299 ಹೆಕ್ಟೇರ್‌ನ ಗಣಿಯು ನಿಷೇಧಿತ ಪ್ರದೇಶದಲ್ಲಿದೆ. ಸರ್ಕಾರವು ಗಣಿಗಾರಿಕೆ ಯೋಜನೆಯಲ್ಲಿ ಪರಿಷ್ಕರಣೆ ಮಾಡಬೇಕು’ ಎಂದು ಕೇಂದ್ರ ಸೂಚಿಸಿದೆ. ದೇಗುಲ ಸುತ್ತ ಗಣಿಗಾರಿಕೆಯಿಂದ ಆಗುತ್ತಿರುವ ಹಾನಿಯ ಬಗ್ಗೆ ಅಧ್ಯಯನ ಮಾಡಬೇಕು ಎಂದು ಪತ್ರಕರ್ತ ಚಂದ್ರಕಾಂತ ವಡ್ಡು, ವಿನಾಯಕ ಮುದೇನೂರು ಮತ್ತು ಇತರರು ಹೈಕೋರ್ಟ್ ಮೊರೆ ಹೋಗಿದ್ದರು. ಹೀಗಾಗಿ ಚೆನ್ನೈನ ಐಐಟಿ, ನೀರಿಯ (ರಾಷ್ಟ್ರೀಯ ಪರಿಸರ ಎಂಜಿನಿಯರಿಂಗ್ ಸಂಶೋಧನಾ ಸಂಸ್ಥೆ–ಎನ್‌ಇಇಆರ್‌ಐ) ತಜ್ಞರ ತಂಡವನ್ನು ಹೈಕೋರ್ಟ್ ನೇಮಿಸಿತ್ತು. ಈ ಸಮಿತಿ ಇನ್ನೂ ಅಧ್ಯಯನ ನಡೆಸಿಲ್ಲ. ಹೀಗಿರುವಾಗಲೇ ಗಣಿಗಾರಿಕೆಗೆ ಅನುಮಿತಿ ನೀಡಿರುವುದೂ ಆಕ್ಷೇಪಕ್ಕೆ ಕಾರಣವಾಗಿದೆ.
ಆರ್‌ಎಫ್‌ಒ ವಿರುದ್ಧ ಏನು ಕ್ರಮ?:
ಕಾರ್ತಿಕೇಯ ಕಂಪನಿಯ ಗಣಿಗಾರಿಕೆ ಭೂಮಿ ಮಂಜೂರು ಮಾಡುವಾಗ, ನಿರ್ದಿಷ್ಟ ಪ್ರದೇಶವನ್ನು ಅರಣ್ಯ ಪ್ರದೇಶ ಅಲ್ಲ ಎಂದು 2007ರ ಸೆಪ್ಟೆಂಬರ್‌ 26ರಂದು ವರದಿ ನೀಡಿದ್ದ ಅಂದಿನ ಆರ್‌ಎಫ್‌ಒ ವಿರುದ್ಧ ಕೈಗೊಂಡ ಕ್ರಮದ ಪ್ರಸ್ತುತ ಸ್ಥಿತಿಗತಿಗಳನ್ನೂ ಕೇಂದ್ರ ಸರ್ಕಾರ ಕೇಳಿದೆ. ಅಧಿಕಾರಿಯನ್ನು ಇಲಾಖೆ ಈಗಾಗಲೇ ವಜಾಗೊಳಿಸಿದ್ದು, ದಂಡ ಸಂಗ್ರಹಿಸಲು ಕಾನೂನು ಪ್ರಕ್ರಿಯೆ ನಡೆಯುತ್ತಿದೆ ಎಂದು ಮೂಲಗಳು ತಿಳಿಸಿವೆ.
