ನಿಯಮ ಉಲ್ಲಂಘನೆ | ಮಣ್ಣು ಸೇರಿದ ತ್ಯಾಜ್ಯ: ಸಿಎಂಗೆ ದೂರು

ಒಣಗಿರುವ ತೋಟಗಳು ಚಿಗರೇನಹಳ್ಳಿ ಗ್ರಾಮದಲ್ಲಿ ಜಪಾನ್‌ ಮಾದರಿಯ ಆಧುನಿಕ ಯಂತ್ರಗಳನ್ನು ಬಳಸಿಕೊಂಡು ಕಸವನ್ನು ಗೊಬ್ಬರವಾಗಿಸಲು 2014ರಲ್ಲಿ ಎಂಎಸ್‌ಜಿಪಿ ತ್ಯಾಜ್ಯ ಸಂಸ್ಕರಣೆ ಘಟಕ ಪ್ರಾರಂಭವಾಯಿತು. ನಂತರದ ಎರಡೇ ವರ್ಷಕ್ಕೆ ಅಂರ್ತಜಲ ಸೇರಿದಂತೆ ಸುತ್ತಮುತ್ತಲಿನ ಪರಿಸರವನ್ನೇ ನಾಶ ಮಾಡಲಾರಂಭಿಸಿತು. ಕಸದ ರಾಶಿಯಿಂದ ಹೊರಬರುವ ದ್ರವ ತ್ಯಾಜ್ಯದಿಂದ ತಣ್ಣೀರನಹಳ್ಳಿ ಗ್ರಾಮದ ರೈತರ ಕೊಳವೆ ಬಾವಿಗಳಲ್ಲಿ ರಾಸಾಯನಿಕಯುಕ್ತ ನೀರು ಬರುತ್ತಿದೆ. ಅಡಿಕೆ ಬಾಳೆ ತೋಟಗಳು ಒಣಗಿದವು. ಕುಡಿಯುವ ನೀರಿಗೆ ತತ್ವಾರ ಇಂದಿಗೂ ತಪ್ಪಿಲ್ಲ ಎಂದು ಸ್ಥಳೀಯರು ದೂರುತ್ತಾರೆ. ‘ಚಿಗರೇನಹಳ್ಳಿಯಲ್ಲಿ ಎಂಎಸ್‌ಜಿಪಿ ತ್ಯಾಜ್ಯ ವಿಲೇವಾರಿ ಘಟಕದ ಅವಾಂತರ ಮಿತಿ ಮೀರಿದೆ. ಈ ಭಾಗದ ಜನರು ಜೀವನ ನಡೆಸುವುದೇ ಕಷ್ಟವಾಗಿದೆ’ ಎಂದು ದೊಡ್ಡಬೆಳವಂಗಲ ಗ್ರಾಮದ ವಿಜಯಕುಮಾರ್‌ ಸಿ.ಎಚ್‌.ರಾಮಕೃಷ್ಣ ದೂರಿದರು. ‘ಶಾಸಕರು ಜನಪ್ರತಿನಿಧಿಗಳು ಸೇರಿದಂತೆ ಅಧಿಕಾರಿಗಳಿಗೂ ಹಲವು ಬಾರಿ ಮನವಿ ಸಲ್ಲಿಸಲಾಗಿದೆ. ಭರವಸೆ ಇನ್ನೂ ಈಡೇರಿಲ್ಲ’ ಎಂದರು.

‘ದೇಶದಲ್ಲಿ ಸ್ವಂತ ಜಾಗದಲ್ಲಿ ಸಂಸ್ಕರಣೆ ಘಟಕ ನಡೆಸುತ್ತಿರುವ ಸಂಸ್ಥೆ ನಮ್ಮದು ಮಾತ್ರ. ಉತ್ತಮ ಗುಣಮಟ್ಟದ ಗೊಬ್ಬರವನ್ನು ಒದಗಿಸುತ್ತಿದ್ದೇವೆ. ಸರ್ಕಾರದೊಂದಿಗಿನ ಒಪ್ಪಂದದಂತೆಯೇ ನಿರ್ವಹಿಸಲಾಗುತ್ತಿದ್ದು ಕೆಲವು ಸಮಯದಲ್ಲಿ ವ್ಯತ್ಯಾಸಗಳಾಗುತ್ತವೆ. ಆರೋಪಗಳು ಸುಳ್ಳಾಗಿದ್ದು ನಮ್ಮದು ಮುಕ್ತವಾಗಿರುವ ಘಟಕ ಯಾರು ಯಾವಾಗ ಬೇಕಾದರೂ ಬಂದು ತನಿಖೆ ಮಾಡಿಕೊಳ್ಳಲಿ’ ಎಂದು ಎಂಎಸ್‌ಜಿಪಿ ಇನ್‌ಫ್ರಾಟೆಕ್‌ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಕೆ.ಪಿ. ಪ‍್ರವೀಣ್‌ ಅವರು ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದರು.