ಬಸವಕಲ್ಯಾಣದ ಅಭಿವೃದ್ಧಿ ಆರನೇ ಗ್ಯಾರಂಟಿ: ವಿಜಯಸಿಂಗ್ ಭರವಸೆ

ಬಸವಕಲ್ಯಾಣ: ‘ಬಸವಕಲ್ಯಾಣದ ಅಭಿವೃದ್ಧಿಯಲ್ಲಿ ಖಂಡ್ರೆ ಪರಿವಾರದಿಂದ ಸಾಕಷ್ಟು ಕೊಡುಗೆ ನೀಡಿದರೂ ಬಿಜೆಪಿ ಅಭ್ಯರ್ಥಿ ಭಗವಂತ ಖೂಬಾ ಅವರು ಖಂಡ್ರೆ ಬಸವಣ್ಣನವರಿಗೆ ಲಿಂಗಾಯತರಿಗೆ ಏನು ಮಾಡಿದ್ದಾರೆ ಎಂದು ಪ್ರಶ್ನಿಸುತ್ತಿರುವುದು ಹಾಸ್ಯಾಸ್ಪದ’ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಈಶ್ವರ ಖಂಡ್ರೆ ಹೇಳಿದರು. ನಗರದ ಶಿವಪುರ ರಸ್ತೆಯಲ್ಲಿ ಗುರುವಾರ ಲೋಕಸಭೆ ಚುನಾವಣೆ ಅಂಗವಾಗಿ ಕಾಂಗ್ರೆಸ್ ಸಂಪರ್ಕ ಕಚೇರಿ ಉದ್ಘಾಟಿಸಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು‘ನಮ್ಮ ತಂದೆ ಭೀಮಣ್ಣ ಖಂಡ್ರೆಯವರು ಭಾಲ್ಕಿ ಚನ್ನಬಸವ ಪಟ್ಟದ್ದೇವರ ಜೊತೆಯಲ್ಲಿ ನೂತನ ಅನುಭವ ಮಂಟಪ ನಿರ್ಮಾಣಕ್ಕಾಗಿ ಶ್ರಮಿಸಿದ್ದರು. ಈಗ ಕಟ್ಟುತ್ತಿರುವ ಬೃಹತ್ ಮಂಟಪದ ಕಾರ್ಯ ಆರಂಭ ಆಗುವುದಕ್ಕೆ ನಾನು ಸತತವಾಗಿ ಪ್ರಯತ್ನಿಸಿದ್ದೇನೆ’ ಎಂದು ಹೇಳಿದರು. ‘ಮುಖ್ಯಮಂತ್ರಿ ಸಿದ್ದರಾಮಯ್ಯ ಸಹ ಬಸವಣ್ಣನವರನ್ನು ರಾಜ್ಯದ ಸಾಂಸ್ಕೃತಿಕ ನಾಯಕ ಎಂದು ಘೋಷಿಸಿದ್ದಾರೆ. ಭಗವಂತ ಖೂಬಾ ಮಾತ್ರ ಹುಸಿ ಭರವಸೆಗಳನ್ನು ನೀಡಿರುವುದು ಬಿಟ್ಟರೆ 10 ವರ್ಷದಲ್ಲಿ ಯಾವುದೇ ಮಹತ್ವದ ಅಭಿವೃದ್ಧಿ ಕೈಗೊಂಡಿಲ್ಲ’ ಎಂದರು. ‘ಲೋಕಸಭೆ ಚುನಾವಣೆವರೆಗೆ ಮಾತ್ರ ಕಾಂಗ್ರೆಸ್ ಗ್ಯಾರಂಟಿ ನೀಡುತ್ತದೆ ಎಂದು ಅಪಪ್ರಚಾರ ಮಾಡಲಾಗುತ್ತಿದೆ. ನಮ್ಮ ಸರ್ಕಾರ ಐದು ವರ್ಷ ಇರುವುದರಿಂದ ಅಲ್ಲಿಯ ತನಕ ಜನರಿಗೆ ಯೋಜನೆಗಳ ಲಾಭ ಮುಟ್ಟಲಿದೆ. ಸಾಗರ ಖಂಡ್ರೆ ಕಿರಿಯ ವಯಸ್ಸಿನವರಾದರೂ ಅವರಿಗೆ ಜನರ ಬಗ್ಗೆ ಕಾಳಜಿ ಇದೆ. ಉನ್ನತ ಶಿಕ್ಷಣ ಪಡೆದು ಅಪಾರ ಜ್ಞಾನ ಹೊಂದಿದ್ದಾರೆ. ಅವರನ್ನು ಗೆಲ್ಲಿಸಬೇಕು’ ಎಂದು ಮತದಾರರಿಗೆ ಕೇಳಿಕೊಂಡರು.