ಮಳೆ ಕೊರತೆ: ಶುಂಠಿ ಬೆಳೆಗೆ ಬೆಂಕಿ ರೋಗ, ಬೆಲೆ ಇದ್ದರೂ ರೈತರಿಗೆ ನಷ್ಟ

ಗುತ್ತಿಗೆ ಜಮೀನಿನಲ್ಲಿ ಒಂದು ಎಕರೆ ಶುಂಠಿ ಬೆಳೆಯಲು ₹ 5 ಲಕ್ಷ ವೆಚ್ಚವಾಗುತ್ತದೆ. ಸ್ವಂತ ಜಮೀನಿನಲ್ಲಿ ಬೆಳೆ ಮಾಡುವವರಿಗೆ ಗುತ್ತಿಗೆ ಬಾಬತ್ತು ಒಂದು ಎಕರೆಗೆ ₹ 55ಸಾವಿರ ನೀರಿನ ವೆಚ್ಚ ₹ 40ಸಾವಿರ ಉಳಿಯುತ್ತದೆ. ಒಂದು ವರ್ಷ ಮುಗಿಯುವುದರೊಳಗೆ 5ರಿಂದ 6 ಬಾರಿ ರಸಗೊಬ್ಬರ ಹಾಕಬೇಕು. 7ರಿಂದ 8 ಸಲ ಔಷಧ ಸಿಂಪಡಣೆ ಮಾಡಬೇಕು. ಆಗಾಗ್ಗೆ ಕಳೆ ತೆಗೆಯುತ್ತಿರಬೇಕು. ನೀರು ಹರಿಸಿದಾಗ ಬಿತ್ತನೆ ಮಾಡಿದ ಮಣ್ಣು ಜರುಗಿದರೆ ಸರಿಪಡಿಸುತ್ತಿರಬೇಕು. ಬಿತ್ತನೆಯಿಂದ ಕಟಾವಿನವರೆಗೂ ಕೂಲಿ ಕಾರ್ಮಿಕರ ಅವಲಂಬನೆ ಇಲ್ಲದೇ ಶುಂಠಿ ಬೆಳೆಯಲು ಸಾಧ್ಯವಿಲ್ಲ ಎನ್ನುತ್ತಾರೆ ಶುಂಠಿ ಬೆಳೆಗಾರರು.

ಶುಂಠಿ ಬೆಳೆಯಲ್ಲಿ ರೋಗ ಕಾಣಿಸಿಕೊಂಡಿರುವ ಕುರಿತು ರೈತರಿಂದ ಮಾಹಿತಿ ಬಂದಿಲ್ಲ. ಶುಂಠಿ ಬೆಳೆಗೆ ಭಾರೀ ಪ್ರಮಾಣದಲ್ಲಿ ಬೆಂಕಿ ರೋಗ ತಗುಲಿರುವುದು ಕಂಡು ಬಂದಿಲ್ಲ. ನಮ್ಮ ವ್ಯಾಪ್ತಿಯಲ್ಲಿ ಜಮೀನುಗಳ ಸುತ್ತಾಟ ನಡೆಸುವ ಸಂದರ್ಭದಲ್ಲಿ ನಾವಾಗಿಯೇ ರೈತರಿಗೆ ಕೆಲವು ರೋಗ ನಿಯಂತ್ರಣಕ್ಕೆ ಕೈಗೊಳ್ಳುವ ಮಾಹಿತಿ ಕೊಟ್ಟಿದ್ದೇವೆ ಎಂದು ಸಹಾಯಕ ತೋಟಗಾರಿಕೆ ಅಧಿಕಾರಿ ಸದಾನಂದ ಕುಂಬಾರ ತಿಳಿಸಿದ್ದಾರೆ. ಕಳೆದ ವರ್ಷ ಮಳೆ ಹೆಚ್ಚಾಗಿದ್ದರಿಂದ ಶುಂಠಿ ಬೆಳೆಗೆ ಕೊಳೆ ರೋಗ ಕಾಣಿಸಿಕೊಂಡಿತ್ತು. ಬೆಳೆಗೆ ಬಿಟ್ಟ ನೀರು ಹೆಚ್ಚಾಗಿ ಹರಿದಾಡಿದಾಗಲೂ ಕೊಳೆ ರೋಗ ಹರಡುತ್ತದೆ. ಗೆಡ್ಡೆ ಮೃದು ಕೊಳೆ ರೋಗ ನಿಯಂತ್ರಣಕ್ಕೆ ರೈತರಿಗೆ ಮಾಹಿತಿ ನೀಡಲಾಗಿದೆ. ಬೆಳೆ ಹೆಚ್ಚಾಗಿರುವುದರಿಂದಲೂ ರೈತರು ಶುಂಠಿ ಕಟಾವು ಮಾಡಿ ಮಾರಾಟ ಮಾಡುತ್ತಿರಬಹುದು ಎಂದು ವಿವರಿಸಿದರು.