ವಿರಾಜಪೇಟೆಯಲ್ಲಿ ಹುತ್ತರಿ ಕೋಲಾಟ ಸಂಭ್ರಮ

ವಿರಾಜಪೇಟೆ: ಪಟ್ಟಣದ ಕೊಡವ ಸಮಾಜದ ಬಳಿಯಿರುವ ಪೂಮಾಲೆ ಕೋಲ್ ಮಂದ್ನಲ್ಲಿ ಆರಾಯಿರ ನಾಡಿನ ಹುತ್ತರಿ ಕೋಲಾಟ ಶುಕ್ರವಾರ ನಡೆಯಿತು.

. ಈ ಸಾಂಸ್ಕೃತಿಕ ಕಾರ್ಯಕ್ರಮಕ್ಕೆ ಎಡೆನಾಡ್, ಬೇಟೋಳಿನಾಡ್, ಬೈರವನಾಡ್, ಪೊರವನಾಡ್ ಸೇರಿದಂತೆ ಅರಾಯಿರನಾಡ್ ಒಟ್ಟು 17 ಗ್ರಾಮಗಳಿಂದ ಸಾಂಪ್ರದಾಯಿಕ ಉಡುಪುಗಳಲ್ಲಿ ತಕ್ಕ ಮುಖ್ಯಸ್ಥರು ಬಂದಿದ್ದರು. ವಿವಿಧ ನಾಡಿನ ಗ್ರಾಮಸ್ಥರು ಪುತ್ತರಿ ಕೋಲಾಟ, ಪರೆಕಳಿ, ವಾಲಗತಾಟ್ಗಳಲ್ಲಿ ಭಾಗವಹಿಸಿ ಸಂಭ್ರಮಿಸಿದರು.

. ವಾದ್ಯಕ್ಕೆ ತಕ್ಕಂತೆ ಹೆಜ್ಜೆ ಹಾಕುತ್ತಾ ಕೋಲಾಟವನ್ನು ಪ್ರದರ್ಶಿಸುತ್ತಿದ್ದರು. ವಿಶೇಷವಾಗಿ ಕೋಲಾಟ, ಪರೆಯ ಕಳಿ ಜನಮನ ಸೆಳೆಯಿತು.

. ಪರೆಯ ಕಳಿ, ಕೋಲಾಟ್ ಮತ್ತು ವಾಲಗತಾಟ್ ಸ್ಪರ್ಧೆಯಲ್ಲಿ ವಿಜೇತರಾದವರಿಗೆ ಬಹುಮಾನ ನೀಡಿ ಗೌರವಿಸಲಾಯಿತು. ಕೊಡಗಿನ ಸಾಂಪ್ರದಾಯಕ ಉಡುಗೆ ತೊಟ್ಟು ಆಗಮಿಸಿದ ಮಹಿಳೆಯರಿಗೆ ವಿಶೇಷ ಬಹುಮಾನ ನೀಡಿ ಗೌರವಿಸಲಾಯಿತು.

. ಬೆಳಿಗ್ಗೆ ನಡೆದ ಕಾರ್ಯಕ್ರಮದಲ್ಲಿ ಪೂಮಾಲೆ ಕೋಲ್ ಮಂದ್ನಲ್ಲಿ ಮಂದ್ ಅಧ್ಯಕ್ಷ ಅಜ್ಜಿನಿಕಂಡ ಸುಧೀರ್ ಅವರು ಧ್ವಜಾರೋಹಣ ನೆರವೇರಿಸಿ, ಮಂದ್ ಪೂಜೆ ಸಲ್ಲಿಸಿದರು.

. ಈ ಸಂದರ್ಭ ಪೂಮಾಲೆ ಮಂದ್ನ ಉಪಾಧ್ಯಕ್ಷ ವಾಟೇರಿರ ಶಂಕರಿ ಪೂವಯ್ಯ, ಮರಣನಿಧಿ ಫಂಡ್ ಅಧ್ಯಕ್ಷ ಚೆಂದಂಡ ಜಿ.ಪೊನ್ನಪ್ಪ, ನಾಡ್ ತಕ್ಕ ಕೊಳುಮಂಡ ಕಾರ್ಯಪ್ಪ, ಮುಕ್ಕಾಟ್ಟಿರ ಮುತ್ತು ಕುನ್ಞಿ, ಅಮ್ಮಣಕುಟ್ಟಂಡ ವಸಂತ ಕಟ್ಟಿ, ಪೊನ್ನಕಚ್ಚಿರ ಸೋಮಯ್ಯ, ಕ್ರೀಡಾ ಸಮಿತಿಯ ಪುಗ್ಗೇರ ಎಸ್.ನಂದ ಮುಂತಾದವರು ಇದ್ದರು.

. ಹಾಲುಗುಂದ, ಒಂಟಿಯಂಗಡಿ, ದೇವಣಗೇರಿ, ತಲಗಟ್ಟಕೇರಿ, ಹಚ್ಚಿನಾಡು, ಕುಕ್ಲೂರು, ಚೆಂಬೆಬೆಳ್ಳೂರು, ಐಮಂಗಲ, ಮಗ್ಗುಲ, ವೈಪಡ, ಆರ್ಜಿ, ಬೇಟೋಳಿ, ಬಿಟ್ಟಂಗಾಲ, ನಾಂಗಾಲ, ಬಾಳುಗೋಡು ಸೇರಿದಂತೆ ವಿವಿಧ ಗ್ರಾಮಗಳ ಗ್ರಾಮಸ್ಥರು ಸೇರಿದ್ದರು.