ಕೊಡಗಿನಲ್ಲಿ ಕಕ್ಕಡ ಸಂಭ್ರಮ: ಎಲ್ಲೆಡೆ ಆಟಿಸೊಪ್ಪಿನ ಘಮಲು

ಲೋಕೇಶ್.ಡಿ.ಪಿ ಸೋಮವಾರಪೇಟೆ: ಕೊಡಗಿನಲ್ಲಿ ಅತ್ಯಂತ ಪ್ರಮುಖವಾದದ್ದು ಕಕ್ಕಡ ಮಾಸ. ಈ ಮಾಸದ 18ನೇ ದಿನ ಔಷಧಯುಕ್ತ ಆಹಾರ ಸೇವನೆ ಮಾಡುವುದು ಹಿಂದಿನಿಂದ ನಡೆದುಕೊಂಡು ಬಂದ ಸಂಪ್ರದಾಯ. ಅದ‌ನ್ನು ಚಾಚೂತಪ್ಪದ ಪಾಲನೆ ಕೊಡಗು ಜಿಲ್ಲೆಯಲ್ಲಿ ಕಂಡು ಬರುತ್ತಿದೆ. ಆಟಿ ಸೊಪ್ಪ ಅಥವಾ ಮಧುಬನ ಹೇಗೆ ಔಷಧೀಯ ಗುಣವುಳ್ಳದ್ದೆಂದು ಹೆಸರಾಗಿದೆಯೋ ಹಾಗೆಯೇ ಮರಗೆಸವೂ ಒಂದು. ದಕ್ಷಿಣ ಕನ್ನಡದಲ್ಲಿ ಮರಗೆಸಕ್ಕೆ ಇನ್ನಿಲ್ಲದ ಬೇಡಿಕೆಯಿದ್ದು ಈ ಭಾಗದಲ್ಲಿ ಮೆರಗೆಸದಿಂದ ಪತ್ರೊಡೆ ಮಾಡಿ ಬಳಸಲಾಗುತ್ತಿದೆ. ಈ ನಿಟ್ಟಿನಲ್ಲಿ ಅಲ್ಲಿನ ಜನರ ಬೇಡಿಕೆಗನುಗುಣವಾಗಿ ಸ್ಥಳೀಯವಾಗಿ ಸಿಗದ ಕಾರಣ ಮಲೆನಾಡಿನ ಭಾಗಗಳಲ್ಲಿ ಮರಗಳಲ್ಲಿ ಬೆಳೆದಿರುವ ಮರಗೆಸವನ್ನು ಹುಡುಕಿ ಕೊಂಡೋಯ್ದು ಅಲ್ಲಿನ ವ್ಯಾಪಾರಿಗಳು ಮಾರಿ ತಮ್ಮ ಜೇಬನ್ನು ಗಟ್ಟಿ ಮಾಡಿಕೊಳ್ಳುತ್ತಾರೆ. ಹಿಂದಿನ ಕಾಲದಲ್ಲಿ ಪೂರ್ವಜರು ಆಚರಿಸಿಕೊಂಡು ಬರುತ್ತಿದ್ದ ಕೆಲವು ಆಚರಣೆಗಳನ್ನು ಇಂದಿಗೂ ಮುಂದುವರೆಸಿಕೊಂಡು ಬರುತ್ತಿದ್ದಾರೆ. ಇದನ್ನು ಆಚರಿಸುವವರು ಬೇರೆ ಜಿಲ್ಲೆಯಲ್ಲಿ ಜೀವನ ನಡೆಸುತ್ತಿದ್ದರೂ ತಾವು ಮಾಡಿಕೊಂಡು ಬಂದಿರುವ ಆಚರಣೆಯನ್ನು ಅಲ್ಲಿಯೂ ಮುಂದುವರೆಸುತ್ತಾರೆ. ಈ ಸೊಪ್ಪಿನಲ್ಲಿ ವಿಶೇಷವಾದ ಔಷಧೀಯ ಗುಣಗಳಿರುವುದಾಗಿ ಪೂರ್ವಜನರು ಬಳಸಿಕೊಂಡು ಬಂದಿದ್ದಾರೆ ಎಂದು ಸುಶೀಲಾ ತಿಳಿಸಿದರು. ಇದರೊಂದಿಗೆ ಏಡಿ ಕಳಿಲೆ ವಿವಿಧ ಸೊಪ್ಪು ನಾಟಿಕೋಳಿ ಸೇರಿದಂತೆ ಎಲ್ಲದರಲ್ಲಿ ಔಷಧಿ ಸೇರಿದ್ದು ಅದನ್ನು ಸಹ ವಿಶೇಷ ಖಾದ್ಯ ತಯಾರಿಸಿ ಸೇವಿಸುವುದನ್ನು ಜಿಲ್ಲೆಯಲ್ಲಿ ಕಾಣಬಹುದಾಗಿದೆ.