ಕಪಿಲಾ ನದಿ ಪ್ರವಾಹ: ಬೊಕ್ಕಹಳ್ಳಿ ಜನರಿಗೆ ತಪ್ಪದ ಸಂಕಷ್ಟ; ಸ್ಥಳಾಂತರಕ್ಕೆ ಆಗ್ರಹ

ಈ ಗ್ರಾಮದ ಮೂರು ದಿಕ್ಕುಗಳಲ್ಲೂ ಕಪಿಲಾ ನದಿ ಹರಿಯುತ್ತದೆ. ಕಬಿನಿ ಜಲಾಶಯದಿಂದ ಹೆಚ್ಚಿನ ಪ್ರಮಾಣದ ನೀರು ಹರಿಸಿದಾಗಲೆಲ್ಲಾ ಈ ಹಳ್ಳಿಯ ಬಹಳಷ್ಟು ಮನೆಗಳು ಜಲಾವೃತವಾಗುತ್ತವೆ. ಮಳೆಗಾಲ ಬಂತೆಂದರೆ ಆತಂಕದಲ್ಲೇ ಜೀವನ ನಡೆಸಬೇಕಾದ ಪರಿಸ್ಥಿತಿ ಅಲ್ಲಿನ ನಿವಾಸಿಗಳದ್ದಾಗಿದೆ. ವಿಶೇಷವಾಗಿ ನದಿಯ ಅಂಚಿನಲ್ಲೇ ಇರುವ ಪರಿಶಿಷ್ಟ ಜಾತಿ ಹಾಗೂ ಪರಿಶಿಷ್ಟ ಪಂಗಡದವರ ಮನೆಗಳಿಗೆ ಹೆಚ್ಚಿನ ಪ್ರಮಾಣದಲ್ಲಿ ಹಾನಿಯಾಗುತ್ತದೆ. ನೆರೆ ಬಂದಾಗಲೆಲ್ಲಾ ಅವರನ್ನು ಸುರಕ್ಷಿತ ಜಾಗಕ್ಕೆ ತಾತ್ಕಾಲಿಕವಾಗಿ ಸ್ಥಳಾಂತರಿಸುವುದು ನಡೆಯುತ್ತಲೇ ಇದೆ. ಜಮೀನುಗಳು ಕೂಡ ಜಲಾವೃತವಾಗುತ್ತವೆ.

ಈ ಬಾರಿಯೂ ಗ್ರಾಮದಲ್ಲಿ ಪ್ರವಾಹ ಉಂಟಾಗಿದ್ದು, ನದಿಯು ಜಮೀನುಗಳನ್ನೆಲ್ಲಾ ಆವರಿಸಿದೆ. ತೆಂಗಿನ ತೋಟಗಳ ನಡುವೆ ನದಿ ಹರಿಯುತ್ತಿದೆ. ಅಲ್ಲಲ್ಲಿ ಕಬ್ಬಿನ ಬೆಳೆ, ಅಲಸಂದೆ, ಉದ್ದು, ಎಳ್ಳು ಹಾಗೂ ಹೆಸರು ಕಾಳು ಬೆಳೆಯನ್ನು ರೈತರು ಹಾಕಿದ್ದರು. ಆ ಬೆಳೆಗಳು ನೀರಿನಲ್ಲಿ ಮುಳುಗಡೆ ಆಗಿದ್ದು ಕೊಳೆಯುತ್ತಿವೆ. ಪೈರುಗಳು ನಾಶವಾಗಿವೆ. ಆ ಬೆಳೆ ಇನ್ನು ಕೈಗೆ ಬರುವುದು ಅಸಾಧ್ಯವಾದ ಮಾತು ಎಂಬ ಸ್ಥಿತಿಯಲ್ಲಿದೆ.

ಪ್ರವಾಹದ ಭೀತಿ: ಇಲ್ಲಿನ ಜನರು ಪ್ರತಿ ವರ್ಷ ಸಂಕಷ್ಟ ಅನುಭವಿಸುವುದು ತಪ್ಪಿಲ್ಲ. ಈ ಬಾರಿ ಈಗಾಗಲೇ ಎರಡು ಬಾರಿ ಜಮೀನುಗಳು ಹಾಗೂ ಮನೆಗಳು ಮುಳುಗಡೆಯಾಗಿವೆ. ಇನ್ನೂ ಮಳೆಗಾಲ ಮುಂದುವರಿಯಲಿದ್ದು, ಪ್ರವಾಹದ ಭೀತಿಯಲ್ಲೇ ಅವರು ‘ಮುಳುಗಿದ್ದಾರೆ’.

ಮುಂಜಾಗ್ರತಾ ಕ್ರಮವಾಗಿ, ನದಿಯಂಚಿನಲ್ಲಿರುವ ಕೆಂಡನಾಯಕರ ಮನೆ ಸೇರಿದಂತೆ 36 ಕುಟುಂಬಗಳನ್ನು ಗ್ರಾಮದ ಮಧ್ಯದಲ್ಲಿರುವ ಸರ್ಕಾರಿ ಪ್ರಾಥಮಿಕ ಶಾಲೆಯ ಕಟ್ಟಡದಲ್ಲಿ ತೆರೆದಿರುವ ಕಾಳಜಿ ಕೇಂದ್ರಕ್ಕೆ ‌ಸ್ಥಳಾಂತರಿಸಲಾಗಿದೆ. ಇದರಿಂದಾಗಿ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ. ಆದರೆ, ನೀರು ನುಗ್ಗಿದ್ದರಿಂದಾಗಿ ಮನೆಗೆ ಹಾಗೂ ಅವುಗಳಲ್ಲಿನ ಸಾಮಗ್ರಿಗಳಿಗೆ ಹಾನಿಯಾಗಿದೆ. ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಪ್ರತಿನಿಧಿಸುವ ವರುಣ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಯಲ್ಲಿರುವ ಈ ಗ್ರಾಮದ ಜನರು ಹಾಗೂ ಕೃಷಿಕರು ಸೂಕ್ತ ಪರಿಹಾರಕ್ಕಾಗಿ ಕಾಯುತ್ತಿದ್ದಾರೆ.

ನಾಶವಾದ ಸಸಿ ಮಡಿಗಳು: ಕಪಿಲಾ ನದಿ ಉಕ್ಕಿ ಹರಿದಿದ್ದರಿಂದ ಗ್ರಾಮದಲ್ಲಿ 18ಕ್ಕೂ ಹೆಚ್ಚು ಮಂದಿ ರೈತರ ಭತ್ತದ ಸಸಿ ಮಡಿ ಹಾಳಾಗಿದೆ. ಭತ್ತದ ಬೀಜ ಮೊಳಕೆ ಬಾರದೆ ನಷ್ಟ ಅನುಭವಿಸಿದ್ದಾರೆ. ನಂಜುಂಡಸ್ವಾಮಿ, ಸಿದ್ದೇಗೌಡ, ಲಕ್ಷ್ಮಮ್ಮ, ಮರೀಗೌಡ, ಶಿವಣ್ಣ, ರಾಮಲಿಂಗ ನಾಯಕ, ಶಂಕರ್ ನಾಯಕ, ಶ್ರೀನಿವಾಸ, ಗುರುಸ್ವಾಮಿ ಮೊದಲಾದವರ ಸಸಿಮಡಿಗಳು ನಾಶವಾಗಿವೆ.

‘2018ರಲ್ಲೂ ಪ್ರವಾಹ ಬಂದಿತ್ತು.‌ ನದಿಗೆ ಹೆಚ್ಚಿನ ಪ್ರಮಾಣದಲ್ಲಿ ನೀರು ಹರಿಸಿದಾಗ ನಷ್ಟ ಇದ್ದದ್ದೆ. ಆದ್ದರಿಂದ ಇಡೀ ಊರನ್ನು ಶಾಶ್ವತವಾಗಿ ಸ್ಥಳಾಂತರಿಸಬೇಕು. ಇಲ್ಲಿರುವ 1,750 ಎಕರೆಯಲ್ಲಿ 770 ಎಕರೆಯಷ್ಟು ಜಮೀನು ಮುಳುಗಡೆಯಾಗಿದೆ. ವಿವಿಧ ಬೆಳೆಗಳು ಕೂಡ ಹಾಳಾಗಿವೆ’ ಎಂದು ರೈತ ಮುಖಂಡ ಬೊಕ್ಕಹಳ್ಳಿ ನಂಜುಂಡಸ್ವಾಮಿ ಅವರು ಗ್ರಾಮಕ್ಕೆ ಭೇಟಿ ನೀಡಿದ್ದಾಗ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಅಲ್ಲಲ್ಲಿ ಭತ್ತ ಕೊಳೆತು‌ ಹೋಗಿದೆ. ಒಂದು ವೇಳೆ ನೆರೆ ಇಳಿದು ನೀರಿನ ಪ್ರಮಾಣ ಕಡಿಮೆಯಾದಲ್ಲಿ ಭೂಮಿ ಹದಗೊಳ್ಳಲು ಬಹಳಷ್ಟು ದಿನಗಳೇ ಬೇಕು. ಕೆಲವರು ಹಾಕಿದ್ದ ಭತ್ತದ ‘ಒಟ್ಟಲು’ ಕೊಳೆತುಹೋಗಿವೆ. ಆದ್ದರಿಂದ, ಭತ್ತದ ಬಿತ್ತನೆ ಬೀಜವನ್ನು ವಿತರಿಸಬೇಕು. ನಷ್ಟ ಅನುಭವಿಸಿದ ರೈತರಿಗೆ ಪರಿಹಾರ ಕೊಡಬೇಕು’ ಎಂದು ಆಗ್ರಹಿಸಿದರು.

ನದಿಯ ಮತ್ತೊಂದು ಅಂಚಿನಲ್ಲಿರುವ ಕುಳ್ಳಅಂಕಯ್ಯನಹುಂಡಿಯಲ್ಲೂ ಕೆಲವು ಮನೆ ಹಾಗೂ ಜಮೀನುಗಳು ಜಲಾವೃತವಾಗಿವೆ.