ಉಡುಪಿ: ಜಿಲ್ಲೆಯಲ್ಲಿ ಅಗ್ನಿಶಾಮಕ ದಳಕ್ಕೆ ಬೇಕಿದೆ ಇನ್ನಷ್ಟು ಬಲ

ಜನರು ಮನೆಗಳಲ್ಲಿ ಎಂಸಿಡಿ (ಮಿನಿಯೇಚರ್‌ ಸರ್ಕಿಟ್‌ ಬ್ರೇಕರ್‌) ಉಪಕರಣವನ್ನುಅಳವಡಿಸಬೇಕು. ಇದು ವಿದ್ಯುತ್ ಶಾರ್ಟ್‌ ಸರ್ಕೀಟ್‌ನಿಂದ ರಕ್ಷಣೆ ನೀಡುತ್ತದೆ. ಐಎಸ್‌ಐ ಮುದ್ರೆ ಇರುವ ಎಲೆಕ್ಟ್ರಾನಿಕ್ಸ್‌ ಉಪಕರಣಗಳನ್ನೇ ಬಳಸಬೇಕು. ಹಾಗಿದ್ದರೆ ಶಾರ್ಟ್‌ ಸರ್ಕೀಟ್‌ ಸಂಭವಿಸುವ ಅಪಾಯ ಕಡಿಮೆ. ಮನೆಗಳಲ್ಲಿ ಅಗ್ನಿ ಅನಾಹುತಗಳು ಶೇ 80ರಷ್ಟು ಶಾರ್ಟ್‌ ಸರ್ಕೀಟ್‌ನಿಂದ ಶೇ 10ರಷ್ಟು ಗ್ಯಾಸ್ ಸಿಲಿಂಡ್‌ ಸ್ಫೋಟದಿಂದ ಮತ್ತು ಶೇ 10ರಷ್ಟು ದೇವರ ದೀಪವನ್ನು ರಾತ್ರಿ ಹೊತ್ತು ಉರಿಸಿಡುವುದರಿಂದ ಸಂಭವಿಸುತ್ತದೆ ಎನ್ನುತ್ತಾರೆ ಉಡುಪಿ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿ ವಿನಾಯಕ ಕಲ್ಗುಟ್ಕರ್‌.

ಗಗನಚುಂಬಿ ಕಟ್ಟಡಗಳು ಅಗ್ನಿ ಸುರಕ್ಷತಾ ಮಾನದಂಡಗಳನ್ನು ಪಾಲಿಸದಿದ್ದರೆ ಅವುಗಳಿಗೆ ಎನ್ಒಸಿ ನೀಡಲಾಗುವುದಿಲ್ಲ. ಫ್ಲ್ಯಾಟ್ ಶಾಪಿಂಗ್‌ ಮಾಲ್‌ ದೊಡ್ಡ ದೊಡ್ಡ ಕಟ್ಟಡಗಳಲ್ಲಿ ನಿಯಮಿತವಾಗಿ ವಯರಿಂಗ್‌ ಮತ್ತು ವಿದ್ಯುತ್ ಉಪಕರಣಗಳ ಕಾರ್ಯ ನಿರ್ವಹಣೆಯನ್ನು ಪರಿಶೀಲಿಸಬೇಕು. ಇಂತಹ ಕಟ್ಟಡಗಳಲ್ಲಿ ಅಗ್ನಿ ಅನಾಹುತ ಸಂಭವಿಸಿದರೆ ಅದರ ಮಾಲಕರೇ ಜವಾಬ್ದಾರರು. ಗುಣಮಟ್ಟದ ಎಲೆಕ್ಟ್ರಾನಿಕ್ಸ್ ಸಾಧನಗಳನ್ನು ಬಳಸಿದರೆ ಶಾರ್ಟ್ ಸರ್ಕೀಟ್‌ ಉಂಟಾಗುವ ಸಾಧ್ಯತೆ ಕಡಿಮೆ ಎನ್ನುತ್ತಾರೆ ನಗರಸಭೆಯ ಪೌರಾಯುಕ್ತ ರಾಯಪ್ಪ.

ಹೆಬ್ರಿ: ಹೆಬ್ರಿ ಪಟ್ಟಣವು ಈ ಹಿಂದೆ ಗ್ರಾಮ ಪಂಚಾಯಿತಿ ಆಗಿದ್ದಾಗಲೇ ಇಲ್ಲಿ ಹಲವಾರು ಅಕ್ಕಿ ಗಿರಣಿಗಳು ಗೇರು ಬೀಜದ ಕಾರ್ಖಾನೆ ಸೇರಿ ಹಲವು ಉದ್ಯಮ ಸಮೂಹಗಳು ಇದ್ದವು. ಅಂತಹ ಉದ್ಯಮ ಸಮೂಹಗಳ ಊರು ಹೆಬ್ರಿಯಲ್ಲಿ ತುರ್ತಾಗಿ ಈ ಮೊದಲೇ ಅಗ್ನಿಶಾಮಕ ಠಾಣೆ ಆಗಬೇಕಿತ್ತು. ಆದರೆ ಅದು ಈವರೆಗೆ ಸಾಕಾರಗೊಂಡಿಲ್ಲ. ಅಕ್ಕಿ ಗಿರಣಿ ಗೇರು ಬೀಜದ ಕಾರ್ಖಾನೆಯಲ್ಲಿ ಆಗಾಗ ಅಗ್ನಿ ದುರಂತಗಳು ಸಂಭವಿಸುತ್ತವೆ. ಜಲದುರಂತಗಳು ನಡೆಯುತ್ತಿರುತ್ತವೆ. ಈಗ ಹೆಬ್ರಿ ತಾಲ್ಲೂಕು ಕೇಂದ್ರ ಕೂಡ ಆಗಿದೆ. ಹಾಗಾಗಿ ತುರ್ತಾಗಿ ಹೆಬ್ರಿಗೆ ಅಗ್ನಿಶಾಮಕ ಠಾಣೆ ಆಗಲೇ ಬೇಕಿದೆ ಎಂದು ಜನರು  ಒತ್ತಾಯಿಸಿದ್ದಾರೆ. ತಾಲ್ಲೂಕು ಕೇಂದ್ರವಾದ ಹೆಬ್ರಿಗೆ ಅಗ್ನಿಶಾಮಕ ಠಾಣೆ ಮಂಜೂರು ಆದರೂ ಅದು ಇನ್ನೂ ಕಾರ್ಯರೂಪಕ್ಕೆ ಬಂದಿಲ್ಲ. ಅವಘಡಗಳು ಸಂಭವಿಸಿದಾಗ ದೂರದ ಕಾರ್ಕಳದಿಂದ ಅಗ್ನಿಶಾಮಕ ತಂಡ ಬರಬೇಕಿದೆ. ಹಾಗಾಗಿ ಪ್ರಮುಖ ಆದ್ಯತೆಯ ನೆಲೆಯಲ್ಲಿ ಹೆಬ್ರಿಗೆ ಅಗ್ನಿಶಾಮಕ ಠಾಣೆಯನ್ನು ಮಂಜೂರುಗೊಳಿಸಬೇಕು ಎಂಬುದು ಜನರ ಒತ್ತಾಯವಾಗಿದೆ.