ಕಾರವಾರ | ನಿರ್ವಹಣೆಗೆ ನಿರ್ಲಕ್ಷ: ಉದ್ಯಾನದ ಪರಿಕರಗಳಿಗೆ ಗರ

ಶಿರಸಿ: ಮಳೆ ಪ್ರಮಾಣ ಕಡಿಮೆ ಆಗುತ್ತಿದ್ದಂತೆ ನಗರಸಭೆ ಸ್ವಚ್ಛತೆ ಕಾರ್ಯ ಕೈಗೊಂಡು ನಗರದ ಉದ್ಯಾನಗಳನ್ನು ಶುಚಿಗೊಳಿಸಿದೆ. ಮರಾಠಿಕೊಪ್ಪ ವಿಶಾಲನಗರ ಇಂದಿರಾನಗರದ ಉದ್ಯಾನಗಳಲ್ಲಿ ಬೆಳೆದ ಕಳೆ ಗಿಡಗಂಟಿಗಳನ್ನು ಸ್ವಚ್ಛಮಾಡಲಾಗಿದೆ. ಆಸನಗಳು ಆಟದ ಪರಿಕರಗಳು ವ್ಯಾಯಾಮದ ಉಪಕರಣಗಳನ್ನು ತೊಳೆದು ಶುದ್ಧೀಕರಣಗೊಳಿಸಲಾಗಿದೆ. ‘ಶುದ್ಧ ಕುಡಿಯುವ ನೀರಿನ ಲಭ್ಯತೆ ಉದ್ಯಾನದಲ್ಲಿಲ್ಲ. ಈ ವ್ಯವಸ್ಥೆಯನ್ನು ನಗರಸಭೆ ಕಲ್ಪಿಸಿದರೆ ವಾಯುವಿಹಾರ ವ್ಯಾಯಾಮ ಮಾಡಲು ಬರುವವರಿಗೆ ಅನುಕೂಲವಾಗಲಿದೆ’ ಎನ್ನುತ್ತಾರೆ ವಿಶಾಲ ನಗರದ ರಾಮಕೃಷ್ಣ ಹೆಗಡೆ. ‘ಮಳೆಗಾಲ ಮುಗಿದ ತಕ್ಷಣವೇ ಉದ್ಯಾನಗಳ ನಿರ್ವಹಣೆಗೆ ಆದ್ಯತೆ ನೀಡಲಾಗಿದೆ’ ಎಂಬುದಾಗಿ ಪೌರಾಯುಕ್ತ ಕಾಂತರಾಜ್ ಹೇಳುತ್ತಾರೆ.

ಹಳಿಯಾಳ ಪಟ್ಟಣದಲ್ಲಿ ಮರಡಿಗುಡ್ಡ ಹಾಗೂ ಕಿಲ್ಲಾ ಕೋಟೆಯ ಬಳಿ ಇರುವ ನಿಸರ್ಗಧಾಮ ನಿರ್ವಹಣೆಯ ಕೊರತೆ ಎದುರಿಸುತ್ತಿವೆ. ಇವೆರಡೂ ಉದ್ಯಾನ ಅರಣ್ಯ ಇಲಾಖೆ ಸುಪರ್ದಿಯಲ್ಲಿವೆ. ಮರಡಿ ಗುಡ್ಡದ ನಿಸರ್ಗಧಾಮದಲ್ಲಿನ ಮಕ್ಕಳ ಆಟಿಕೆ ಸಾಮಗ್ರಿಗಳು ತುಕ್ಕು ಹಿಡಿದಿವೆ. ಲಕ್ಷಾಂತರ ವೆಚ್ಚದಲ್ಲಿ ನಿರ್ಮಿಸಿದ್ದ ಕಾರಂಜಿ ಮತ್ತು ಪ್ರತಿಮೆಗಳು ಹಾಳಾಗಿವೆ. ಉದ್ಯಾನವನದ ತುಂಬೆಲ್ಲ ಹುಲ್ಲು ಬೆಳೆದಿದ್ದು ವಾಯುವಿಹಾರದ ದಾರಿ ಮುಚ್ಚಿಹೋಗಿದೆ. ನವಗ್ರಹ ವನಕ್ಕೆ ನಿರ್ಮಿಸಿದ ಕಟ್ಟೆಯು ಒಡೆದು ಹಾಳಾಗಿದೆ. ಪವಿತ್ರವನ ಜಿಂಕೆವನಗಳೂ ಆಕರ್ಷಣೆ ಕಳೆದುಕೊಂಡಿವೆ. ಉದ್ಯಾನಕ್ಕೆ ಹೊಂದಿಕೊಂಡು ನಿರ್ಮಿಸಿದ್ದ ಪುಟ್ಟ ಕ್ಯಾಂಟೀನ್ ಮುಚ್ಚಿದೆ. ‘ಲಕ್ಷಾಂತರ ರೂಪಾಯಿ ವೆಚ್ಚ ಮಾಡಿ ನಿರ್ಮಿಸಿದ ಉದ್ಯಾನಗಳು ನಿರ್ವಹಣೆ ಇಲ್ಲದೆ ಪಾಳು ಬೀಳುತ್ತಿರುವುದು ಸರಿಯಲ್ಲ. ಇದು ಜನರ ತೆರಿಗೆ ಹಣ ಪೋಲು ಮಾಡುವುದರ ಜತೆಗೆ ಮೂಲಸೌಲಭ್ಯವೊಂದನ್ನು ಕಸಿದುಕೊಂಡಂತಾಗುತ್ತಿದೆ’ ಎನ್ನುತ್ತಾರೆ ಹಿರಿಯ ನಾಗರಿಕರ ಕ್ಷೇಮಾಭಿವೃದ್ಧಿ ವೇದಿಕೆ ಅಧ್ಯಕ್ಷ ಜಿ.ಡಿ ಗಂಗಾಧರ.