ಯಾದಗಿರಿ: ಬೆಟ್ಟ ಗುಡ್ಡಗಳಿಗೆ ಹಸಿರು ಹೊದಿಕೆ

ಶಹಾಪುರ: ಕಳೆದ ವರ್ಷ ಬರವನ್ನು ಎದುರಿಸಿ ಹೈರಾಣಗೊಂಡಿದ್ದ ರೈತರಿಗೆ ಪ್ರಸಕ್ತ ವರ್ಷ ಮೇ ತಿಂಗಳಲ್ಲಿ ಉತ್ತಮ ಮಳೆಯಾಗಿತ್ತು. ಆದರೆ ಜೂನ್ ಹಾಗೂ ಜುಲೈ ತಿಂಗಳಲ್ಲಿ ನಿರೀಕ್ಷೆ ಮಾಡಿದಷ್ಟು ಮಳೆ ಬಾರದೆ ಇರುವಾಗ ರೈತರು ಆತಂಕಗೊಂಡಿದ್ದರು. ಆದರೆ ಆಗಸ್ಟ್ ತಿಂಗಳಲ್ಲಿ ತುಸು ಹೆಚ್ಚು ಎನ್ನುವಂತೆ ಮಳೆಯಾಗಿದ್ದರಿಂದ ರೈತರಲ್ಲಿ ಸಮಾಧಾನ ಮೂಡಿಸಿದೆ. ಅದರಲ್ಲಿ ನೆರೆ ಮಹಾರಾಷ್ಟ್ರದಲ್ಲಿ ಹೆಚ್ಚಿನ ಮಳೆ ಸುರಿದ ಪರಿಣಾಮ ಕೃಷ್ಣಾ ನದಿ ಪಾತ್ರದಲ್ಲಿ ಸುಮಾರು 12 ದಿನ ಪ್ರವಾಹದ ಭೀತಿ ಎದುರಿಸಿದರು. ಆದರೆ ರೈತರ ಜೀವನಾಡಿಯಾಗಿರುವ ನಾರಾಯಣಪುರ ಹಾಗೂ ಆಲಮಟ್ಟಿಯಲ್ಲಿ ಸದ್ಯಕ್ಕೆ ಸಾಕಷ್ಟು ನೀರಿನ ಸಂಗ್ರಹ ಇರುವುದು ರೈತರಲ್ಲಿ ಆತ್ಮವಿಶ್ವಾಸ ಹೆಚ್ಚಿಸಿದೆ. ಅಲ್ಲದೆ ಕಾಲುವೆಗೆ ನಿರಂತರವಾಗಿ ನೀರು ಹರಿಯುತ್ತಲಿದೆ. ಈಗಾಗಲೇ ನಿಷೇಧಿತ ಬೆಳೆ ಭತ್ತ ನಾಟಿ ಮಾಡಿದ್ದಾರೆ. ಸದ್ಯಕ್ಕೆ ಬೆಳೆ ಸಮೃದ್ಧಿಯಾಗಿ ಬೆಳೆಯುತ್ತಲಿದೆ ಎನ್ನುತ್ತಾರೆ ರೈತ ನಿಂಗಪ್ಪ. ಆದರೆ ತುಸು ಸಮಸ್ಯೆಯಾಗಿರುವುದು ಹತ್ತಿ ಹಾಗೂ ತೊಗರಿ ಬೆಳೆಗೆ. ಮಳೆ ಇಷ್ಟಕ್ಕೆ ನಿಂತರೆ ಸಾಕಪ್ಪ ಎನ್ನುತ್ತಿದ್ದಾರೆ ರೈತರು. ಕೆಲಪ್ರದೇಶ ಹೊರತುಪಡಿಸಿ ಉಳಿದೆಡೆ ಹತ್ತಿ ಬೆಳೆ ಚೆನ್ನಾಗಿದೆ. ಮುಂದೆ ಇಳುವರಿ ಹಾಗೂ ಬೆಲೆ ಮೇಲೆ ನಮ್ಮ ಜೀವನ ಅವಲಂಬಿತವಾಗಿದೆ. ಸರ್ಕಾರ ಎಚ್ಚೆತ್ತುಕೊಂಡು ಹತ್ತಿ ಹಾಗೂ ತೊಗರಿ ಬೆಳೆಗೆ ಬೆಂಬಲ ಬೆಲೆ ಘೋಷಣೆ ಮಾಡಬೇಕು ಎನುತ್ತಾರೆ ಹತ್ತಿ ಬೆಳೆದ ರೈತರು.

ಹುಣಸಗಿ: ತಾಲ್ಲೂಕಿನ ಕಳೆದೊಂದು ವಾರದಿಂದ ಮಳೆಯ ಪ್ರಮಾಣ ಅಧಿಕವಾಗಿದ್ದು ಭತ್ತಕ್ಕೆ ಭಾರಿ ಅನುಕೂಲವಾಗಿದೆ. ತೊಗರಿ ಮತ್ತು ಹತ್ತಿಗೆ ಅಧಿಕ ಮಳೆಯಿಂದಾಗಿ ತಗ್ಗು ಪ್ರದೇಶದ ಜಮೀನಿನ ಬೆಳೆಗಳು ತೇವಾಂಶ ಹೆಚ್ಚಳದಿಂದ ಹಾನಿಯಾಗುವ ಭೀತಿ ಎದುರಾಗಿದೆ ಎಂದು ರೈತರು ಹೇಳಿದರು. ‘ಕಳೆದ ವಾರ ಸುರಿದ ಮಳೆಗೆ ಭತ್ತವಕ್ಕೆ ಒಂದು ಬಾರಿ ಗೊಬ್ಬರ ನೀಡಿದಂತಾಗಿದ್ದು ಕಳೆದ ವರ್ಷಕ್ಕಿಂತ ಈ ಬಾರಿ ಬೆಳೆ ಹುಲುಸಾಗಿ ಬೆಳೆದ್ದು ಭತ್ತವು ಕೂಡಾ ಹಸಿರು ಬಣ್ಣಕ್ಕೆ ತಿರುಗಿದೆ’ ಎಂದು ರೈತ ನಿಂಗನಗೌಡ ಬಸನಗೌಡ್ರ ಹೇಳಿದರು. ‘ತಳಭಾಗದಲ್ಲಿ ಬೇರುಗಳು ಗಟ್ಟಿಯಾಗಿದ್ದು ಕೀಟಭಾದೆಯೂ ಅಷ್ಟಾಗಿ ಇಲ್ಲ. ಇನ್ನು ಒಣ ಬೇಸಾಯದ ಮಳೆಯಾಶ್ರಿತ ಜಮೀನುಗಳಲ್ಲಿ ಈ ಮಳೆ ಇಲ್ಲಿಗೆ ನಿಂತರೆ ಮಾತ್ರ ಏನಾದರೂ ಫಸಲು ಕೈಗೆ ಬರಲು ಸಾಧ್ಯ’ ಎಂದು ಮಂಜಲಾಪುರ ಹಳ್ಳಿ ಗ್ರಾಮದ ರೈತ ಪರಮಣ್ಣ ನೀಲಗಲ್ಲ ನುಡಿದರು. ‘ತಾಲ್ಲೂಕಿನಲ್ಲಿ ವಾಡಿಕೆಗಿಂತ ಹೆಚ್ಚಿಗೆ ಮಳೆಯಾಗಿದ್ದು ಮಳೆ ನಿಂತಲ್ಲಿ ಹತ್ತಿಗೆ ಅನುಕೂಲವಾಗಲಿದೆ. ಇಲ್ಲದಿದ್ದಲ್ಲಿ ಬೆಳೆಗೆ ಹಾನಿಯಾಗಲಿದೆ’ ಎಂದು ಹುಣಸಗಿ ರೈತ ಸಂಪರ್ಕ ಕೇಂದ್ರದ ಕೃಷಿ ಅಧಿಕಾರಿ ಸಿದ್ದಾರ್ಥ ಪಾಟೀಲ ತಿಳಿಸಿದರು. 

ಗುರುಮಠಕಲ್‌: ಸತತ ವರ್ಷಧಾರೆಗೆ ತಾಲ್ಲೂಕಿನ ಧಬ್‌ದಬಿ ಬಂಡಲೋಗು ಮತ್ತು ಗವಿಸಿದ್ದಲಿಂಗೇಶ್ವರ ಜಲಪಾತಗಳು ಮೈದುಂಬಿದ್ದು ಸುತ್ತಲಿನ ಗುಡ್ಡಗಳು ಹಸಿರಿನಿಂದ ಕಂಗೊಳಿಸುತ್ತಿವೆ. ತಾಲ್ಲೂಕಿನ ಚಂಡ್ರಿಕಿ ಕೇಶ್ವಾರ ಕಾಕಲವಾರ ಗಾಜರಕೋಟ ಸೇರಿದಂತೆ ಬಹುತೇಕ ಕೆರೆಗಳಲ್ಲಿ ನೀರಿನ ಮಟ್ಟ ದ್ವಿಗುಣಗೊಂಡಿದ್ದು ಸಣ್ಣ ಕೆರೆಗಳು ತುಂಬಿವೆ ಮತ್ತು ದೊಡ್ಡ ಕೆರೆಗಳ ನೀರಿನ ಮಟ್ಟದಲ್ಲಿ ಏರಿಕೆಯಾಗಿದೆ. ‘ಮಳೆಯ ಅಭಾವದಿಂದ ಕೆರೆಗಳು ಇನ್ನೇನು ಸಂಪೂರ್ಣ ಖಾಲಿಯಾಗುತ್ತವೆ ಎಂದೆಣಿಸಿದ್ದೆವು. ಆದರೆ ಸತತ ಮಳೆಗೆ ಕೆರೆಗಳಿಗೆ ಜೀವ ತುಂಬಿದೆ’ ಎಂದು ಗ್ರಾಮಸ್ಥರು ತಿಳಿಸಿದರು. ತಾಲ್ಲೂಕಿನ ಧಬ್‌ದಬಿ ಮತ್ತು ಗವಿಸಿದ್ದಲಿಂಗೇಶ್ವರ ಜಲಪಾತಗಳಿಗೆ ವಾರದಿಂದ ಪ್ರವಾಸಿಗರ ಸಂಖ್ಯೆ ಹೆಚ್ಚುತ್ತಿದ್ದು ನೀರಿನ ಹರಿವಿಲ್ಲದೆ ಸೊರಗಿದ್ದ ಜಲಪಾತಗಳು ಮೈದುಂಬಿ ಹರಿಯುತ್ತಿರುವುದರಿಂದ ಪ್ರವಾಸಿಗರನ್ನು ಆಕರ್ಷಿಸುತ್ತಿವೆ. ತಾಲ್ಲೂಕು ವ್ಯಾಪ್ತಿಯ ಮಲ್ಲಾ ಚಿಂತನಹಳ್ಳಿ ಮಿನಾಸಪುರ ಚಿನ್ನಾಕಾರ ವ್ಯಾಪ್ತಿಯ ಕಾಡುಗಳು ಮತ್ತು ತಾಲ್ಲೂಕಿನ ಗುಡ್ಡಗಾಡುಗಳಲ್ಲಿನ ಪರಿಸರ ಕಳೆ ಹೆಚ್ಚಿದ್ದು ಹಸಿರುಮಯವಾಗಿದೆ. ಹಸಿರುಡಿಗೆಯಿಂದ ಕಂಗೊಳಿಸುತ್ತಿರುವ ಗವಿ ಸಿದ್ದಲಿಂಗೇಶ್ವರ ಮತ್ತು ಬಂಡಲೋಗು ಜಲಪಾತದ ಪರಿಸರವು ಮಲೆನಾಡಿನಂತೆ ಭಾಸವಾಗುತ್ತಿದೆ ಎನ್ನತ್ತಾರೆ ಪ್ರವಾಸಿಗರಾದ ಬಶೀರ ಇಮ್ರಾನ್‌ ನವೀನ ಮತ್ತು ವೆಂಕಟೇಶ.