ಹಕ್ಕಿ ಹಾರುತಿದೆ ನೋಡಿದಿರಾ?: ಕ್ಯಾಮರಾದಲ್ಲಿ ಸೆರೆಯಾದ ಪಾರಿವಾಳಗಳ ಲವಲವಿಕೆ

ಕೊರೊನಾ ಮಹಾಮಾರಿಯ ದೆಸೆಯಿಂದ ಇಪ್ಪತ್ನಾಲ್ಕು ಗಂಟೆ ಮನೆಯಲ್ಲೇ ಉಳಿಯುವುದು ಅನಿವಾರ್ಯವಾಗಿ ಮುದುಡಿದ ಮನಸ್ಸಿಗೊಂದಿಷ್ಟು ಸಮಾಧಾನ ತರಲು ಅಪಾರ್ಟ್ಮೆಂಟ್ನ ತಾರಸಿಯ ಮೇಲೆ ದಿನಕ್ಕೆ ಮೂರ್ನಾಲ್ಕು ಬಾರಿ ಹೋಗಿ ಬರುವ ಅಭ್ಯಾಸ ತನ್ನಿಂದ ತಾನಾಗಿಯೇ ಶುರುವಾಗಿತ್ತು.

. ತಾರಸಿಯ ನೆಲದ ಮೇಲೆ ಓಡಾಡುವುದು, ಮೈ ಕೈ ಆಡಿಸುವುದು, ಓದುವುದು ... ಇವುಗಳ ಜೊತೆ ಚಲಿಸುವ ಮೋಡಗಳ, ಚಿಲಿಪಿಲಿ ಹಕ್ಕಿಗಳ, ಗೋಡೆ, ಪ್ಯಾರಪೆಟ್, ಮೆಟ್ಟಿಲ ಮೇಲಿನ ನೆರಳು ಬೆಳಕಿನಾಟವನ್ನು ನೋಡುವುದು ಸಾಮಾನ್ಯವಾಗಿ ಹೋಯಿತು.

. ಆಗಲೇ ಈ ಪಾರಿವಾಳಗಳ ಪರಿಚಯವಾಗಿದ್ದು. ಅವುಗಳ ಬಿರುಗಣ್ಣ ನೋಟ, ಹಾರಿಳಿಯುವ ವೈಖರಿ, ಹತ್ತು ಹಲವು ಹಾವಭಾವಗಳು, ಚಲನವಲನಗಳು, ಸಣ್ಣ ಕದನಗಳು, ಕೀಟಲೆ, ಕುಚೇಷ್ಟೆಗಳು - ಇವುಗಳನ್ನು ಸೂಕ್ಷ್ಮವಾಗಿ ಗಮನಿಸಿದಾಗ ಈ ಸಾಮಾನ್ಯ ಹಕ್ಕಿಗಳಲ್ಲಡಗಿದ ಅಸಾಧಾರಣ ಬೆಡಗು, ಲವಲವಿಕೆ ಹಾಗೂ ನಾಟಕೀಯತೆ ಚಕಿತಗೊಳಿಸಿತು.

. ನನ್ನ ಉತ್ಸಾಹವನ್ನು ಕ್ಯಾಮೆರಾ ಕಣ್ಣಿಗೆ ವರ್ಗಾಯಿಸುವುದು ಸವಾಲಾದರೂ, ಬರಬರುತ್ತಾ ಅದು ದೈನಂದಿನ ದಿನಚರಿಯ ಅಂಗವಾಗಿ ಹೋಯಿತು. ಹಾಗೆ ಸೆರೆಹಿಡಿದ ಅನೇಕ ಚಿತ್ರಗಳಲ್ಲಿ ಕೆಲವನ್ನು ಆರಿಸಿ ಹಂಚಿಕೊಳ್ಳಬೇಕ್ಕೆನ್ನುವಾಗ ದ.ರಾ. ಬೇಂದ್ರೆಯವರ ಚಿರಪರಿಚಿತ ಹಾಡು ‘ಹಕ್ಕಿಹಾರುತಿದೆನೋಡಿದಿರಾ...’ ತಾನಾಗಿ ತುಟಿಯ ಮೇಲೆ ನಲಿದು ಬಂದಿತು.