l ಉಡಾನ್‌ ಯೋಜನೆಗೆಂದು ಸಾಮಾನ್ಯ ವಿಮಾನಗಳ ಪ್ರತಿ ಪ್ರಯಾಣದ ಮೇಲೆ ವಿಧಿಸಲಾಗುತ್ತಿರುವ ₹5,000 ಲೆವಿ, ಸಂಗ್ರಹಕ್ಕೆ ಏಕರೂಪತೆ ತರಬೇಕು. ಕೆಲವು ವಿಮಾನಯಾನ ಸಂಸ್ಥೆಗಳು ಪ್ರಯಾಣಿಕರಿಂದ ಅಗತ್ಯಕ್ಕಿಂತ ಹೆಚ್ಚಿನ ಲೆವಿ ಶುಲ್ಕ ಸಂಗ್ರಹಿಸುತ್ತಿವೆ. ಆದರೆ, ಉಡಾನ್ ನಿಧಿಗೆ ನೀಡುತ್ತಿರುವುದು ₹5,000 ಮಾತ್ರ. ₹5,000ದಷ್ಟು ಶುಲ್ಕವನ್ನಷ್ಟೇ ಪ್ರಯಾಣಿಕರಿಂದ ಸಂಗ್ರಹಿಸುವ ವ್ಯವಸ್ಥೆಯನ್ನು ಜಾರಿಗೆ ತರಬೇಕು l ಉಡಾನ್ ನಿಧಿಯಲ್ಲಿ ಲಭ್ಯವಿದ್ದ ಅನುದಾನವು ಯಾವ ವರ್ಷವೂ ಪೂರ್ಣ ಪ್ರಮಾಣದಲ್ಲಿ ಬಳಕೆಯಾಗಿಲ್ಲ. ಆ ನಿಧಿಯನ್ನು ಪೂರ್ಣ ಪ್ರಮಾಣದಲ್ಲಿ ಬಳಕೆಯಾಗುವಂತೆ ನೋಡಿಕೊಳ್ಳಬೇಕು ಮತ್ತು ಆ ಮೂಲಕ ವಿಮಾನನಿಲ್ದಾಣಗಳು/ಹೆಲಿಪೋರ್ಟ್‌ಗಳನ್ನು ಶೀಘ್ರವೇ ಅಭಿವೃದ್ಧಿ ಮಾಡಬೇಕು l ಉಡಾನ್ ಯೋಜನೆ ಅಡಿ ಕಾರ್ಯನಿರ್ವಹಿಸುತ್ತಿರುವ ವಿಮಾನಗಳ ಟಿಕೆಟ್ ದರಕ್ಕೂ, ಹೆಲಿಕಾಪ್ಟರ್‌ಗಳ ಟಿಕೆಟ್‌ ದರಕ್ಕೂ ತೀರಾ ವ್ಯತ್ಯಾಸವಿದೆ. ವಿಮಾನಗಳಿಗೆ ಹೋಲಿಸಿದರೆ, ಹೆಲಿಕಾಪ್ಟರ್‌ಗಳು ತೀರಾ ದುಬಾರಿ. ಈ ಅಂತರವನ್ನು ಕಡಿಮೆ ಮಾಡಬೇಕು. ಆ ಮೂಲಕ ಜನ ಸಾಮಾನ್ಯರೂ ಹೆಲಿಕಾಪ್ಟರ್‌ಗಳ ಸೇವೆ ಬಳಸುವಂತಹ ಸ್ಥಿತಿ ನಿರ್ಮಿಸಬೇಕು l ಯೋಜನೆಯಲ್ಲಿ ಉಲ್ಲೇಖಿಸಿರುವಂತೆ ಹಲವು ರಾಜ್ಯ ಸರ್ಕಾರಗಳು ವಿಮಾನನಿಲ್ದಾಣ/ಹೆಲಿಪೋರ್ಟ್‌ಗಳ ಭದ್ರತೆ/ನಿರ್ವಹಣೆಯ ಹೊಣೆಯನ್ನು ಹೊತ್ತುಕೊಂಡಿಲ್ಲ. ಈ ಲೋಪವನ್ನು ವಿಮಾನಯಾನ ಸಚಿವಾಲಯವು ಕಡೆಗಣಿಸಿದೆ. ಇದೂ ಸಹ ಹಲವು ಮಾರ್ಗಗಳಲ್ಲಿ ಕಾರ್ಯಾಚರಣೆ ಸ್ಥಗಿತವಾಗಲು ಕಾರಣವಾಗಿದೆ. ಇಂತಹ ಲೋಪಗಳನ್ನು ಸರಿಪಡಿಸುವ ಮೂಲಕ, ಯೋಜನೆಯನ್ನು ಪರಿಣಾಮಕಾರಿಯಾಗಿ ಜಾರಿಗೆ ತರಲು ಕ್ರಮ ತೆಗೆದುಕೊಳ್ಳಬೇಕು l ಸಚಿವಾಲಯವು ಅನುಮೋದನೆ ನೀಡಿದ 31 ಹೆಲಿಪೋರ್ಟ್‌ಗಳಲ್ಲಿ ಶೇ 70ಕ್ಕೂ ಹೆಚ್ಚು ಹೆಲಿಪೋರ್ಟ್‌ಗಳಿಗೆ ಡಿಜಿಸಿಎ ಅನುಮತಿ ನೀಡಿರಲಿಲ್ಲ. ಇದರಿಂದ 50ಕ್ಕೂ ಹೆಚ್ಚು ಮಾರ್ಗಗಳಲ್ಲಿ ಹೆಲಿಕಾಪ್ಟರ್‌ ಸೇವೆ ಆರಂಭಿಸಲು ಸಾಧ್ಯವಾಗಿಲ್ಲ. ಅನುಮೋದನೆ ನೀಡುವುದಕ್ಕೂ ಮುನ್ನ, ಅಲ್ಲಿ ಅಗತ್ಯ ಸೌಲಭ್ಯಗಳು ಇವೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳುವುದನ್ನು ವಿಮಾನಯಾನ ಸಚಿವಾಲಯವು ರೂಢಿಸಿಕೊಳ್ಳಬೇಕು