ಈ ಸಂಕ್ಷಿಪ್ತ ವರದಿಯನ್ನು ಬಿಡುಗಡೆ ಮಾಡಿದ ನಂತರ ಕೆಲವು ಮಾಧ್ಯಮಗಳ ಪ್ರಶ್ನೆಗಳಿಗೆ ಉತ್ತರಿಸಿದ್ದ ನೀತಿ ಆಯೋಗದ ಅಧಿಕಾರಿಯೊಬ್ಬರು, ‘ಈ ದತ್ತಾಂಶಗಳನ್ನು ಗಮನಿಸಿದರೆ ದೇಶದಲ್ಲಿ ಬಡತನ ರೇಖೆಗಿಂತ ಕೆಳಗಿರುವವರ ಪ್ರಮಾಣ ಶೇ 5ಕ್ಕಿಂತ ಕಡಿಮೆ ಇದೆ’ ಎಂದು ಹೇಳಿದ್ದರು. ಇದು ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತು ರಾಜಕೀಯ ವಲಯದಲ್ಲಿ ಚರ್ಚೆಗೆ ಕಾರಣವಾಗಿತ್ತು. ಆದರೆ ಇದೇ ನೀತಿ ಆಯೋಗವು ಬಿಡುಗಡೆ ಮಾಡಿರುವ ವಿವಿಧ ವರದಿಗಳ ಪ್ರಕಾರ ದೇಶದಲ್ಲಿನ ಬಡವರ ಪ್ರಮಾಣವು ಶೇ 5ಕ್ಕಿಂತ ಹೆಚ್ಚೇ ಇದೆ. 2022–23ರ ಬಹು ಆಯಾಮದ ಬಡತನ ವರದಿಯ ಪ್ರಕಾರ ದೇಶದಲ್ಲಿನ ಬಹು ಆಯಾಮದ ಬಡವರ ಪ್ರಮಾಣ ಶೇ 11.28ರಷ್ಟು. ಭಾನುವಾರ ಬಿಡುಗಡೆಯಾದ ವರದಿಯಲ್ಲಿ ಯಾವ ಭಾಗದಲ್ಲೂ ‘ಬಡತನ ರೇಖೆಗಿಂತ ಕೆಳಗಿರುವವರ ಪ್ರಮಾಣ ಶೇ 5ಕ್ಕಿಂತ ಕಡಿಮೆ’ ಎಂದು ಉಲ್ಲೇಖಿಸಿಲ್ಲ.

ಪ್ರತಿ ಕುಟುಂಬಗಳು ಪ್ರತಿ ತಿಂಗಳು ಮಾಡುವ ಒಟ್ಟು ಸರಾಸರಿ ವೆಚ್ಚದ ವಿವರವನ್ನು ಎನ್‌ಎಸ್‌ಎಸ್‌ಒ ಸಮೀಕ್ಷೆ ಒದಗಿಸಿದೆ. ಸಮೀಕ್ಷೆಯಲ್ಲಿ ದೊರೆತ ವೆಚ್ಚ ವಿವರವನ್ನು ಸರಾಸರಿ ರೂಪಕ್ಕೆ ಪರಿವರ್ತಿಸಲಾಗಿದೆ. ದೇಶದ ಎಲ್ಲಾ ರಾಜ್ಯಗಳಲ್ಲಿ, ನಗರ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ಆಗುತ್ತಿರುವ ವೆಚ್ಚವನ್ನು ಸರಾಸರಿಗೆ ಪರಿವರ್ತಿಸಲಾಗಿದೆ. ಈವರೆಗೆ ನಡೆಸಲಾದ ಇಂತಹ ಎಲ್ಲಾ ಸಮೀಕ್ಷೆಗಳಲ್ಲೂ ಇದೇ ವಿಧಾನವನ್ನು ಅನುಸರಿಸಲಾಗಿದೆ. ಕೇವಲ 2 ಲಕ್ಷದಷ್ಟು ಜನರು ನೀಡುವ ಮಾಹಿತಿಯನ್ನು 140 ಕೋಟಿಗೂ ಹೆಚ್ಚು ಜನರಿಗೆ ಅನ್ವಯ ಮಾಡುವುದರಿಂದ, ಈ ದತ್ತಾಂಶಗಳು ವಾಸ್ತವಕ್ಕೆ ಹತ್ತಿರವಿರುವ ಚಿತ್ರಣವನ್ನು ಕೊಡುವುದಿಲ್ಲ. ಉದಾಹರಣೆಗೆ: ನಗರ ಪ್ರದೇಶದಲ್ಲಿ ಪ್ರತಿ ಕುಟುಂಬವು ಮನೆ ಬಾಡಿಗೆಗೆ ಎಂದು ಪ್ರತಿ ತಿಂಗಳು ಸರಾಸರಿ ₹424 ವೆಚ್ಚ ಮಾಡುತ್ತದೆ ಎನ್ನುತ್ತದೆ ಈ ವರದಿ. ‘ಆದರೆ ನಗರ ಪ್ರದೇಶದಲ್ಲಿ ಇಷ್ಟು ಕಡಿಮೆ ಮೊತ್ತಕ್ಕೆ ಮನೆ ಬಾಡಿಗೆಗೆ ದೊರೆಯುತ್ತದೆಯೇ’ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಹಲವರು ಪ್ರಶ್ನಿಸಿದ್ದಾರೆ.