ಮಾನವನ ಮಿದುಳಿನಲ್ಲಿ ಅಮಿಗ್ಡಲಾ ಎಂಬ ಭಾಗವಿದೆ. ಅದು ಮಾನವನ ಭಯ–ಗಾಬರಿಗಳ ಸಂದರ್ಭದಲ್ಲಿ ಸಕ್ರಿಯವಾಗುತ್ತದೆ ಮತ್ತು ಅವುಗಳನ್ನು ನಿರ್ವಹಿಸಲು ನೆರವಾಗುತ್ತದೆ. ತೀವ್ರ ಒತ್ತಡದ ಸಂದರ್ಭದಲ್ಲಿ ಇದು ಸಕ್ರಿಯವಾಗುತ್ತದೆ. 60 ಡೆಸಿಬಲ್‌ಗಿಂತ ಹೆಚ್ಚಿನ ಶಬ್ದ/ಸಂಗೀತವನ್ನು ಹಲವು ನಿಮಿಷಗಳವರೆಗೆ ನಿರಂತರವಾಗಿ ಕೇಳಿದವರಲ್ಲಿ ಅಮಿಗ್ಡಲಾ ಭಾಗವು ಸಕ್ರಿಯವಾದುದು ಅಧ್ಯಯನದಲ್ಲಿ ಪತ್ತೆಯಾಗಿದೆ. ಅಂತಹ ಸಂದರ್ಭದಲ್ಲಿನ ಒತ್ತಡವನ್ನು ನಿರ್ವಹಿಸಲು ದೇಹವು ಹಲವು ಹಾರ್ಮೋನ್‌ಗಳನ್ನು ಬಿಡುಗಡೆ ಮಾಡುತ್ತದೆ. ಅದರ ಪರಿಣಾಮವಾಗಿ ರಕ್ತದ ಒತ್ತಡವೂ ಹೆಚ್ಚುತ್ತದೆ ಎಂಬುದು ಈ ಅಧ್ಯಯನಗಳ ವೇಳೆ ಪತ್ತೆಯಾಗಿತ್ತು. ಅಮಿಗ್ಡಲಾ ಸಕ್ರಿಯವಾದ ಮತ್ತು ಅತೀವ ಸದ್ದಿನಿಂದ ತೀವ್ರ ಒತ್ತಡಕ್ಕೆ ಒಳಗಾದವರಲ್ಲಿ ರಕ್ತನಾಳಗಳು ಕುಗ್ಗುವ ಸ್ಥಿತಿ ಎದುರಾಗಿತ್ತು. ರಕ್ತನಾಳಗಳು ಕುಗ್ಗಿದ ಕಾರಣಕ್ಕೆ ರಕ್ತದ ಒತ್ತಡ ತೀವ್ರ ಮಟ್ಟದಲ್ಲಿ ಏರಿಕೆಯಾಗಿತ್ತು. ಜತೆಗೆ ಅಂತಹವರ ಹೃದಯಬಡಿತದಲ್ಲೂ ಗಣನೀಯ ಪ್ರಮಾಣದ ಏರಿಳಿತ ಕಂಡುಬಂದಿತ್ತು. ದೇಹದ ರಕ್ತಪರಿಚಲನೆಯಲ್ಲಿ ಇಂತಹ ಸ್ಥಿತಿ ಉಂಟಾದಾಗ ಹೃದಯದ ಹೃತ್ಕರ್ಣಗಳಿಗೆ ಅಗತ್ಯ ಪ್ರಮಾಣದ ರಕ್ತವು ಪೂರೈಕೆಯಾಗುವುದಿಲ್ಲ. ಇದರಿಂದ ಹೃದಯದ ಹೃತ್ಕುಹರಗಳಿಗೂ ರಕ್ತ ಪೂರೈಕೆಯಲ್ಲಿ ವ್ಯತ್ಯಯವಾಗುತ್ತದೆ. ಈ ಸಮಸ್ಯೆ ತೀವ್ರವಾದಾಗ ಹೃದಯಾಘಾತವಾಗುವ ಅಪಾಯವಿರುತ್ತದೆ. ಜತೆಗೆ ಪಾರ್ಶ್ವವಾಯು ಉಂಟಾಗಬಹುದು. ಹೃದಯಾಘಾತದ ತೀವ್ರತೆ ಹೆಚ್ಚಿದ್ದರೆ ಸಾವೂ ಸಂಭವಿಸುತ್ತದೆ ಎಂದು ಈ ಅಧ್ಯಯನ ವರದಿಗಳಲ್ಲಿ ವಿವರಿಸಲಾಗಿದೆ. ಅಬ್ಬರದ ಸಂಗೀತ ಮಾತ್ರವಲ್ಲ ವಿಮಾನ ನಿಲ್ದಾಣದ ಸಮೀಪ ವಾಸವಿರುವವರು ವಿಮಾನಗಳ ಜೆಟ್‌ ಬ್ಲ್ಯಾಸ್ಟ್‌ನಿಂದಲೂ (ಟೇಕ್‌ಆಫ್‌ ವೇಳೆ ವಿಮಾನಗಳ ಜೆಟ್‌ ಎಂಜಿನ್‌ನಿಂದ ದಿಢೀರ್ ಎಂದು ಉಂಟಾಗುವ ಶಬ್ದಸ್ಫೋಟ) ಹೃದಯಾಘಾತದ ಅಪಾಯ ಎದುರಿಸುತ್ತಿರುತ್ತಾರೆ. ಲಂಡನ್‌ನ ಹೀತ್ರೂ ವಿಮಾನ ನಿಲ್ದಾಣದ ಸುತ್ತಮುತ್ತಲಿನ ಪ್ರದೇಶದಲ್ಲಿ ವಾಸಿಸುತ್ತಿದ್ದ 36000 ಜನರನ್ನು ಅಧ್ಯಯನಕ್ಕೆ ಒಳಪಡಿಸಿ ಈ ಅಂಶವನ್ನು ಕಂಡುಕೊಳ್ಳಲಾಗಿತ್ತು ಎಂದು ಅಧ್ಯಯನ ವರದಿಯಲ್ಲಿ ವಿವರಿಸಲಾಗಿದೆ.

ಕಾರ್ಡಿಯೊ ಮತ್ತು ಜಿಮ್‌ಗಳಲ್ಲಿ ಅಬ್ಬರದ ಸಂಗೀತ ಬಳಕೆಯಲ್ಲಿದೆ. ಬ್ರಿಟನ್‌ ಮತ್ತು ಜರ್ಮನಿಯಲ್ಲಿ ಅಧ್ಯಯನಕ್ಕೆ ಒಳಪಡಿಸಿದ ಜಿಮ್‌ ಸೆಂಟರ್‌ಗಳಲ್ಲಿ 100 ಡೆಸಿಬಲ್‌ಗಿಂತಲೂ ಹೆಚ್ಚಿನ ಮಟ್ಟದ ಸಂಗೀತವನ್ನು ಕೇಳಿಸಲಾಗುತ್ತಿತ್ತು. ಕಾರ್ಡಿಯೊ ಮತ್ತು ವ್ಯಾಯಾಮದಲ್ಲಿ ಭಾಗಿಯಾದವರಲ್ಲಿ ಉತ್ಸಾಹ ತುಂಬಲು ಅಬ್ಬರದ ಸಂಗೀತ ಬಳಸಲಾಗುತ್ತದೆ ಎಂದು ಜಿಮ್‌ ತರಬೇತುದಾರರು ಹೇಳಿದ್ದರು. ಅಂತಹ ವಾತಾವರಣದಲ್ಲಿ ಕಾರ್ಡಿಯೊ ಮತ್ತು ವ್ಯಾಯಾಮ ಮಾಡುತ್ತಿದ್ದ 500 ಮಂದಿಯನ್ನು ಅಧ್ಯಯನಕ್ಕೆ ಒಳಪಡಿಸಲಾಗಿತ್ತು. ಅವರಲ್ಲಿ ಹಲವರು ಹೃದಯಸಂಬಂಧಿ ಸಮಸ್ಯೆಗಳನ್ನು ಎದುರಿಸುತ್ತಿದ್ದರು. ಅವರ ಮಿದಳಿನ ಅಮಿಗ್ಡಲಾ //ಅಗತ್ಯವಾಗಿ// ಹೆಚ್ಚು ಸಕ್ರಿಯವಾಗಿತ್ತು ಎಂಬುದನ್ನು ‍ಪಿಇಟಿ ಸ್ಕ್ಯಾನ್‌ ಮೂಲಕ ಪತ್ತೆ ಮಾಡಲಾಗಿತ್ತು. ಅಬ್ಬರದ ಸಂಗೀತವು ರಕ್ತದ ಒತ್ತಡವನ್ನು ಹೆಚ್ಚಿಸುತ್ತಿದ್ದುದಲ್ಲದೇ ವ್ಯಾಯಾಮದಿಂದ ಅವರ ರಕ್ತದೊತ್ತಡ ಅಪಾಯಕಾರಿ ಮಟ್ಟಕ್ಕೆ ಏರಿಕೆಯಾಗುತ್ತಿತ್ತು ಎಂಬುದನ್ನು ಅಧ್ಯಯನದಿಂದ ಕಂಡುಕೊಳ್ಳಲಾಗಿದೆ. ಭಾರತದಲ್ಲೂ ಕಾರ್ಡಿಯೊ ಮತ್ತು ಜಿಮ್‌ಗಳಲ್ಲಿ ಅಬ್ಬರದ ಸಂಗೀತ ಹಾಕುವ ಪರಿಪಾಟವಿದೆ. ಕನ್ನಡದ ಹಲವು ನಟರೂ ಸೇರಿ ಭಾರತದ ಹಲವು ಗಣ್ಯರು ಜಿಮ್‌ನಲ್ಲಿಯೇ ಕುಸಿದುಬಿದ್ದು ಹೃದಯಾಘಾತದಿಂದ ಮೃತಪಟ್ಟ ಹಲವು ನಿದರ್ಶನಗಳಿವೆ. ಇನ್ನು ಅಬ್ಬರದ ಸಂಗೀತ ಕಾರ್ಯಕ್ರಮಗಳ ವೇಳೆ ವೇದಿಕೆಯಲ್ಲೇ ಗಾಯಕರು ಕುಸಿದುಬಿದ್ದು ಹೃದಯಾಘಾತದಿಂದ ಮೃತಪಟ್ಟ ಸಂಖ್ಯೆಯೂ ಕಡಿಮೆಯಿಲ್ಲ. ಗುಜರಾತ್‌ನಲ್ಲಿ ಅಬ್ಬರದ ಸಂಗೀತದ ಗಾರ್ಬಾ ನೃತ್ಯದ ವೇಳೆ 15 ವರ್ಷದ ಬಾಲಕ ಸೇರಿ ಹಲವರು ಮೃತಪಟ್ಟ ಬಳಿಕ ವ್ಯಾಯಾಮ ಮತ್ತು ಸಂಗೀತ ಕಾರ್ಯಕ್ರಮಗಳಲ್ಲಿ ಗಣ್ಯರು ಮೃತಪಟ್ಟ ಬಗ್ಗೆಯೂ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ನಡೆಯುತ್ತಿದೆ.