IND vs BAN 2nd Test | ಮಳೆ ಅಡ್ಡಿ: ಮೊದಲ ದಿನದಾಟದ ಅಂತ್ಯಕ್ಕೆ ಬಾಂಗ್ಲಾ 107/3

ಕಾನ್ಪುರ: ಪ್ರವಾಸಿ ಬಾಂಗ್ಲಾದೇಶ ವಿರುದ್ಧ ಇಲ್ಲಿನ ಗ್ರೀನ್ ಪಾರ್ಕ್ ಮೈದಾನದಲ್ಲಿ ನಡೆಯುತ್ತಿರುವ ಎರಡನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯಕ್ಕೆ ಮಳೆ ಅಡ್ಡಿಯಾಗಿದೆ.

ಮಳೆಯ ಅಡಚಣೆಯಿಂದಾಗಿ ಪಂದ್ಯವನ್ನು ಅರ್ಧ ದಿನಕ್ಕೆ ನಿಲ್ಲಿಸಲಾಯಿತು. ಮೊದಲ ದಿನದಾಟದ ಅಂತ್ಯಕ್ಕೆ ಬಾಂಗ್ಲಾದೇಶ 35 ಓವರ್‌ಗಳಲ್ಲಿ 3 ವಿಕೆಟ್‌ಗೆ 107 ರನ್ ಗಳಿಸಿದೆ.

ಟಾಸ್ ಗೆದ್ದ ಟೀಮ್ ಇಂಡಿಯಾ ನಾಯಕ ರೋಹಿತ್ ಶರ್ಮಾ ಮೊದಲು ಫೀಲ್ಡಿಂಗ್ ಆಯ್ದುಕೊಂಡರು. ಮಳೆಯ ಕಾರಣದಿಂದ ಪಂದ್ಯ ತಡವಾಗಿ ಆರಂಭವಾಯಿತು. 35 ಓವರ್‌ಗಳು ಆಗುವಷ್ಟರಲ್ಲಿ ಜೋರಾಗಿ ಮಳೆ ಸುರಿಯಿತು. ಆಗಾಗಿ ಪಂದ್ಯವನ್ನು ನಿಲ್ಲಿಸಲಾಯಿತು. 

ಆರಂಭಿಕರಾದ ಝಾಕೀರ್ ಹಸನ್ (0) ಹಾಗೂ ಶದ್ಮಾನ್ ಇಸ್ಲಾಂ (24) ಅವರನ್ನು ಬಲಗೈ ವೇಗಿ ಆಕಾಶ್ ದೀಪ್ ಹೊರದಬ್ಬಿದ್ದಾರೆ. ನಾಯಕ ನಜ್ಮುಲ್ ಹುಸೇನ್ ಶಾಂತೊ (31) ಅವರನ್ನು ಅಶ್ವಿನ್‌ ಸ್ಪಿನ್‌ ಬಲೆಗೆ ಕೆಡವಿದರು.

ಮೊಮಿನುಲ್ ಹಕ್ (40*) ಹಾಗೂ ರಹೀಮ್‌ (6*) ಕ್ರೀಸಿನಲ್ಲಿದ್ದಾರೆ.