Wayanad landslides |ನಲುಗಿದ ನೆಲದಲ್ಲಿ ‘ಅಪರಿಚಿತರ’ ಚಿರನಿದ್ರೆ

ದುರಂತಭೂಮಿಯಲ್ಲಿ ಕಳ್ಳರ ಕಾಟ ಹೆಚ್ಚಿದ್ದು ಸ್ವಯಂಸೇವಕರ ಹೆಸರಿನಲ್ಲಿ ಹಣ ಸಂಗ್ರಹ ಮಾಡುತ್ತಿರುವುದು ಗಮನಕ್ಕೆ ಬಂದಿದ್ದರಿಂದ ‘ಸೇವೆ’ಗೆ ಜಿಲ್ಲಾಡಳಿತ ನಿಯಂತ್ರಣ ಹೇರಿದೆ. ಆರಂಭದ ಕೆಲವು ದಿನ ಮೃತದೇಹಗಳ ಹುಡುಕಾಟದಲ್ಲಿ ವಿವಿಧ ಸಂಘಟನೆಗಳ ಪ್ರತಿನಿಧಿಗಳು ಮತ್ತು ವೈಯಕ್ತಿಕವಾಗಿ ಕೆಲವರು ತೊಡಗಿಸಿಕೊಂಡಿದ್ದರು. ಈ ನಡುವೆ ಕೆಲವರು ಮೃತದೇಹಗಳಿಂದ ಆಭರಣ ಮತ್ತು ಅಳಿದುಳಿದ ಮನೆಗಳಿಂದ ಹಣ, ವಸ್ತುಗಳನ್ನು ತೆಗೆದುಕೊಂಡು ಹೋಗುವುದು ಗಮನಕ್ಕೆ ಬಂದಿದೆ. ಕೆಲವರನ್ನು ಊರವರೇ ಹಿಡಿದು ಪೊಲೀಸರಿಗೆ ಒಪ್ಪಿಸಿದ್ದರು. ಪ್ರತಿ ಊರಿನಲ್ಲಿ ಅಪರಿಚಿತರನ್ನು ಕಂಡರೆ ಸ್ಥಳೀಯರೇ ತಡೆದು ನಿಲ್ಲಿಸಿ ಮಾಹಿತಿ ಕೇಳಿ ಕಳುಹಿಸುತ್ತಿದ್ದರು. ಈ ಎಲ್ಲದರಿಂದಾಗಿ ಹೆಸರು ನೊಂದಾಯಿಸಿಕೊಂಡೇ ಸೇವಾಕಾರ್ಯಕ್ಕೆ ಇಳಿಯಲು ವ್ಯವಸ್ಥೆ ಮಾಡಲಾಗಿದೆ.

ದುರಂತ ನಡೆದ ಚೂರಲ್‌ಮಲ ಮತ್ತು ಮುಂಡಕ್ಕೈ ಪ್ರದೇಶಗಳನ್ನು ನೋಡಲು ಶನಿವಾರದಿಂದ ಕೆಲವು ಜನರು ಹೋಗಿದ್ದರು. ನೂರಾರು ಜನರು ಪ್ರಾಣ ಕಳೆದುಕೊಂಡ ಮತ್ತು ಬಂಡೆಕಲ್ಲುಗಳು ಉರುಳಿ ಬಿದ್ದ ಜಾಗಗಳಲ್ಲಿ ನಿಂತು ಸೆಲ್ಫಿ ತೆಗೆದು ಸಾಮಾಜಿಕ ತಾಣಗಳಿಗೆ ಅಪ್‌ಲೋಡ್‌ ಮಾಡತೊಡಗಿದ್ದರು. ಭಾನುವಾರ ಈ ಸ್ಥಳಗಳು ‘ಡಿಸಾಸ್ಟರ್ ಟೂರಿಸಂ’ ತಾಣದಂತಾಗಿತ್ತು. ಇದನ್ನು ಮನಗಂಡ ಜಿಲ್ಲಾಡಳಿತ ಅನವಶ್ಯಕವಾಗಿ ಜನರು ಅತ್ತ ಹೋಗದಂತೆ ನಿರ್ಬಂಧ ಹೇರಿದೆ.

ದುರಂತದ ನಂತರವೂ ಗುಡ್ಡ ಇಳಿಯಲು ಮತ್ತು ಕಾಡಿನಿಂದ ಹೊರಬರಲು ನಿರಾಕರಿಸಿದ್ದ ಏರಾಟ್ಟುಕುಂಡ್‌ ಭಾಗದ ಬುಡಕಟ್ಟು ಜನರನ್ನು ಕೊನೆಗೂ ಕಾಳಜಿ ಕೇಂದ್ರಗಳಿಗೆ ತಲುಪಿಸಲಾಗಿದ್ದು ಅಟ್ಟಮಲದಲ್ಲಿ ಅವರು ಸುರಕ್ಷಿತರಾಗಿದ್ದಾರೆ. ಈ ಶಿಬಿರದ ಮೇಲುಸ್ತುವಾರಿಯನ್ನು ಪರಿಶಿಷ್ಟ ಪಂಗಡದ ಅಭಿವೃದ್ಧಿ ಇಲಾಖೆಗೆ ವಹಿಸಲಾಗಿದೆ. ಏರಾಟ್ಟುಕುಂಡ್‌ ರಕ್ಷಿತಾರಣ್ಯ ಪ್ರದೇಶದಲ್ಲಿ ಪರಿಶಿಷ್ಟ ಪಂಗಡದ ನಾಲ್ಕು ಕುಟುಂಬಗಳು ಇದ್ದವು. ಸತತ ಪ್ರಯತ್ನದ ನಂತರ ಅವರನ್ನು ಅಟ್ಟಮಲ ಕಾಳಜಿ ಕೇಂದ್ರಕ್ಕೆ ತಲುಪಿಸಲಾಗಿತ್ತು. ಮೇಪ್ಪಾಡಿಯಲ್ಲಿರುವ ಕಾಳಜಿ ಕೇಂದ್ರಗಳಿಗೆ ಬರಲು ಒಪ್ಪದ ಕಾರಣ ಅವರನ್ನು ಅಲ್ಲೇ ಇರಿಸಲಾಗಿದೆ.