ಚುರುಮುರಿ | ವೋಟ್ ಫಾರ್...

ಉಪಚುನಾವಣೆ ಅಭ್ಯರ್ಥಿಗಳ ಪ್ರಣಾಳಿಕೆ, ಕರಪತ್ರ ಹರಡಿಕೊಂಡು ಶಂಕ್ರಿ, ಸುಮಿ ಮತ ಪರೀಕ್ಷೆಗೆ ಸಿದ್ಧತೆ ಮಾಡಿಕೊಳ್ಳುತ್ತಿದ್ದರು. ‘ಯೋಗ್ಯ ಅಭ್ಯರ್ಥಿಗೆ ವೋಟ್ ಹಾಕಬೇಕು, ಯೋಗ್ಯರನ್ನು ಗುರುತಿಸುವುದೇ ಕಷ್ಟವಾಗಿದೆ’ ಅಂದಳು ಸುಮಿ.

. ‘ಕಣದಲ್ಲಿ ಇರುವವರಲ್ಲಿ ಉತ್ತಮರನ್ನು ಆಯ್ಕೆ ಮಾಡಬೇಕಷ್ಟೇ. ಅಭ್ಯರ್ಥಿಗಳು ರೂಢಿಸಿಕೊಂಡಿರುವ ಸಿದ್ಧಾಂತ, ಮಾಡಿಕೊಂಡ ರಾದ್ಧಾಂತಗಳನ್ನು ಲೆಕ್ಕ ಹಾಕಿ, ಅವರ ಭರವಸೆಗಳನ್ನು ಅಳೆದು-ತೂಗಿ ನಿರ್ಧಾರ ಮಾಡಬೇಕು’ ಅಂದ ಶಂಕ್ರಿ.

. ‘ಒಬ್ಬ ಅಭ್ಯರ್ಥಿ ಕ್ಷೇತ್ರದ ಉದ್ದಕ್ಕೂ ನೀರಾವರಿ ಸೌಲಭ್ಯ ಕಲ್ಪಿಸುವ ಭರವಸೆ ನೀಡಿದ್ದಾರೆ, ಇನ್ನೊಬ್ಬರು ಹಾಂಗ್ಕಾಂಗ್, ಸಿಂಗಪುರ ಮಾಡುತ್ತೇನೆಂದು ಹೇಳಿದ್ದಾರೆ, ಮತ್ತೊಬ್ಬರು ಪ್ರತಿ ಕುಟುಂಬಕ್ಕೂ ವಸತಿ, ಉದ್ಯೋಗ ನೀಡುವ ಮಾತು ಕೊಟ್ಟಿದ್ದಾರೆ. ಇವರಲ್ಲಿ ಯಾರಿಗೆ ಮತ ಹಾಕಬೇಕು?’

. ‘ಕೊಟ್ಟ ಭರವಸೆ ಈಡೇರಿಸುವ ಸಾಮರ್ಥ್ಯ ಅವರಿಗಿದೆಯೇ ಎಂದು ಮಾಪನ ಮಾಡಬೇಕು’.

. ‘ಅಭ್ಯರ್ಥಿಗಳ ಗುಣಗಳನ್ನು ಗುಣಿಸಿ, ಭರವಸೆಗಳನ್ನು ಭಾಗಿಸಿ, ಸುಳ್ಳುಗಳನ್ನು ಕಳೆದು, ಸರಿಯನ್ನು ಕೂಡಿಸಿ ಉತ್ತರ ಕಂಡುಕೊಳ್ಳಬೇಕು’.

. ‘ಬರೀ ಗಣಿತದ ಲೆಕ್ಕಾಚಾರ ಸಾಲದು, ಅಭ್ಯರ್ಥಿಗಳ ಹಿಸ್ಟರಿ, ಎಕನಾಮಿಕ್ಸ್, ಲ್ಯಾಂಗ್ವೇಜ್, ಬಾಡಿ ಲ್ಯಾಂಗ್ವೇಜನ್ನೂ ಪರಿಗಣಿಸಬೇಕು. ಅವರು ಯಾರಿಗೆ ಎಷ್ಟು ಬೈದರು, ಯಾರ್ಯಾರಿಂದ ಬೈಸಿಕೊಂಡರು ಅನ್ನುವುದನ್ನೂ ಲೆಕ್ಕಕ್ಕೆ ತೆಗೆದುಕೊಳ್ಳಬೇಕು’.

. ‘ಚುನಾವಣಾ ಪ್ರಚಾರ ಸಭೆಯಲ್ಲಿ ಅತ್ತ, ಅಳಿಸಿದ ಅಭ್ಯರ್ಥಿಗಳನ್ನೂ ಪರಿಗಣಿಸಬೇಕೆ?’

. ‘ಹೌದು, ಅಳುವುದು ಸಹಜ ಧರ್ಮ, ಅಳಿಸುವುದು ಪರಧರ್ಮ’.

. ‘ಎಲ್ಲಾ ಅಂಶಗಳನ್ನು ಕ್ಯಾಲ್ಕ್ಯುಲೇಟ್ ಮಾಡಿ ಬೆಟರ್ ಅಭ್ಯರ್ಥಿಯನ್ನು ಗುರುತಿಸಿ, ವೋಟ್ ಹಾಕಿ, ಬೆರಳಿಗೆ ಅಳಿಸಲಾಗದ ಶಾಹಿ ಹಾಕಿಸಿಕೊಂಡರೆ ನಮ್ಮ ಕರ್ತವ್ಯ ಮುಗಿಯಿತು’.

. ‘ತಪ್ಪು ಅಭ್ಯರ್ಥಿಗೆ ವೋಟ್ ಹಾಕಿ ನಮ್ಮ ಮುಖಕ್ಕೆ ನಾವೇ ಅಳಿಸಲಾಗದ ಮಸಿ ಬಳಿದುಕೊಂಡೆವು ಎನ್ನುವ ಪಶ್ಚಾತ್ತಾಪ ಆಗದಂತೆ ಎಚ್ಚರ ವಹಿಸಬೇಕು’ ಎಂದ ಶಂಕ್ರಿ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಚುರುಮುರಿ | ವೋಟ್ ಫಾರ್...

ಚಿನಕುರುಳಿ | ಬುಧವಾರ, 13 ನವೆಂಬರ್ 2024

ಮನೆ ಸುಟ್ಟವರು ಮುಸ್ಲಿಮರಲ್ಲ, ರಜಾಕಾರರು: ಪ್ರಿಯಾಂಕ್‌ ಖರ್ಗೆ

ಕೊಪ್ಪಳ | ಮರಕುಂಬಿಯಲ್ಲಿ ಮುಂದುವರಿದ ನೀರವ ಮೌನ