ಚುರುಮುರಿ: ಖರ್ಗೆ, ಬಿನ್ನಿ ಜಿಂದಾಬಾದ್

‘ಕರ್ನಾಟಕಕ್ಕೆ ಏನು ಸುಯೋಗರೀ...’ ಎಂದು ಶ್ರೀಮತಿ ಶುರು ಹಚ್ಚಿದಳು.

. ‘ಸುಯೋಗ? ಏನಿರಬಹುದು? ರಾಹುಲ್ಜಿ ಯಶಸ್ವಿಯಾಗಿ ಭಾರತ್ ಜೋಡೊ ಕರ್ನಾಟಕದ ಯಾತ್ರೆ ಮುಗಿಸಿ ಸಿದ್ದು, ಡಿಕೆಶಿ ಅವರನ್ನು ಜೋಡಿಸಿದ್ದೇ?’

. ‘ಜೋಡಿಯಾಗಿದ್ದಾರೆ ಎಂದು ಈಗಲೇ ಹೇಗೆ ಹೇಳುವುದು? ನಾನು ಹೇಳ್ತಿರೋದೇ ಬೇರೆ. ಎರಡು ಮಹತ್ವದ ವಿಷಯಗಳು...’

. ‘ಒಂದು ತಗೊಂಡರೆ ಇನ್ನೊಂದು ಫ್ರೀ?’

. ‘ಅಂತಹ ಯೋಚನೇನೆ ನಿಮಗೆ. ನಮ್ಮ ಖರ್ಗೆ ಸಾಹೇಬ್ರು ದೇಶದ ಅತ್ಯಂತ ಈಗ ದೊಡ್ಡದಲ್ಲ ದಿದ್ರೂ ಹಳೆಯ ಪಕ್ಷದ ನಾಯಕತ್ವ ವಹಿಸಿಕೊಂಡಿ ರುವುದು ಮಹತ್ವದ ಸುದ್ದಿ ಅಲ್ಲವೆ?’

. ‘ಖಂಡಿತ. ಆದರೆ ಅವರು ರಿಮೋಟ್ ಕಂಟ್ರೋಲ್ಡ್ ಅಧ್ಯಕ್ಷರಾಗ್ತಾರೆ ಅಂತಿದ್ದಾರೆ...’

. ‘ಛೆ! ಛೆ! ಅವರು ಹೇಳೋ ಕೆಲಸ ನಾನು ಮಾಡ್ತೀನಿ ಅಂತ ರಾಹುಲ್ಜಿ ಈಗಾಗಲೇ ಸ್ಪಷ್ಟಪಡಿಸಿದ್ದಾರೆ. ಅಂದಮೇಲೆ ಅವರು ರಿಮೋಟ್ ಕಂಟ್ರೋಲ್ಡ್ ಅಂತ ಹೇಳಲಿಕ್ಕೆ ಆಗದು. ಅವರೇ ಹೈಕಮಾಂಡ್’.

. ‘ಅಂದರೆ ಅವರು ಪಕ್ಷಕ್ಕೆ ಹೊಸ ಕಾಯಕಲ್ಪ ಕೊಡ್ತಾರೆ ಅಂತೀಯ?’

. ‘ಕೊಡಬೇಕು. ಪಕ್ಷ ಈಗಾಗಲೇ ಐಸಿಯುನ ಲ್ಲಿದೆ. ಡಾ. ಖರ್ಗೆ ಅದಕ್ಕೆ ಏನಾದರೂ ಸಂಜೀವಿನಿ ಕೊಟ್ಟು ಐಸಿಯುನಿಂದ ಹೊರತರಬೇಕು’.

. ‘ಪಾಪ! ನಮ್ಮ ಖರ್ಗೆ ಸಾಹೇಬ್ರು ಈ ವಯಸ್ಸಿನಲ್ಲಿ ಇಷ್ಟು ದೊಡ್ಡ ಭಾರ ಹೊರಬೇಕು. ರಾಜ್ಯಸಭಾ ಸದಸ್ಯರಾಗಿ ಆರಾಮಾಗಿದ್ದರು’.

. ‘ಎಲ್ಲ ನಾಯಕರೂ ವಯಸ್ಸಾದವರೇ... ಬಿಎಸ್ವೈ ನೋಡಿ 80 ಆದರೂ ಎಷ್ಟು ಉತ್ಸಾಹ ದಲ್ಲಿದ್ದಾರೆ. ಬೇಕಿದ್ದರೆ ಇನ್ನೊಂದು ಸಲ ಸಿಎಂ ಆಗೋಕೂ ತಯಾರು’.

. ‘ಅದ್ಸರಿ, ಇನ್ನೊಂದು ಮಹತ್ವದ ವಿಷಯ?’

. ‘ನಮ್ಮವರೇ ಆದ ರೋಜರ್ ಬಿನ್ನಿ ರನ್ಔಟ್ ಆದ ಗಂಗೂಲಿ ಜಾಗಕ್ಕೆ ಬಂದು ಬ್ಯಾಟ್ ಮಾಡ್ತಿರೋದು’.

. ‘ಹೌದಲ್ಲಾ! ಬಿಸಿಸಿಐ ಅಧ್ಯಕ್ಷರು. ಖರ್ಗೇಜಿ ಓಲ್ಡೆಸ್ಟ್ ಪಕ್ಷದ ಅಧ್ಯಕ್ಷರಾದರೆ ಬಿನ್ನೀಜಿ ರಿಚ್ಚೆಸ್ಟ್ ಕ್ರೀಡಾ ಮಂಡಳಿಯ ಅಧ್ಯಕ್ಷರು. ಇಬ್ಬರೂ ಕನ್ನಡದವರೇ’.

. ‘ಕನ್ನಡಕ್ಕೆ ಇನ್ನೇನು ಬೇಕು? ಬಾರಿಸು ಕನ್ನಡದ ಡಿಂಡಿಮ’.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.