ಟೆಸ್ಟ್ ಕ್ರಿಕೆಟ್: ಚೆನ್ನೈಗೆ ಬಂದಿಳಿದ ಬಾಂಗ್ಲಾ ತಂಡ

ಭಾರತದಲ್ಲಿ ಬಾಂಗ್ಲಾ ತಂಡವು 2 ಟೆಸ್ಟ್ ಮತ್ತು 3 ಟಿ20 ಪಂದ್ಯಗಳ ಸರಣಿಗಳಲ್ಲಿ ಆಡಲಿದೆ. ನಜ್ಮುಲ್ ಹುಸೇನ್ ಶಾಂತೊ ನಾಯಕತ್ವದ ಬಾಂಗ್ಲಾ ತಂಡವು ಪಾಕಿಸ್ತಾನದಲ್ಲಿ 2–0ಯಿಂದ ಸರಣಿ ಜಯ ಸಾಧಿಸಿ ಇಲ್ಲಿಗೆ ಬಂದಿದೆ. ಇದೇ 19ರಂದು ಚೆನ್ನೈನಲ್ಲಿ ಮೊದಲ ಟೆಸ್ಟ್ ನಡೆಯಲಿದೆ.

‘ಈ ಸರಣಿಯು ನಮಗೆ ಕಠಿಣ ಸವಾಲೊಡ್ಡಲಿದೆ. ಪಾಕಿಸ್ತಾನ ಎದುರು ಉತ್ತಮ ಸಾಧನೆ ಮಾಡಿದ ನಂತರ ನಮ್ಮಲ್ಲಿ ಆತ್ಮವಿಶ್ವಾಸ ಇಮ್ಮಡಿಸಿದೆ. ದೇಶದ ಜನರಿಗೂ ನಮ್ಮ ತಂಡದ ಮೇಲೆ ಅಪಾರ ನಿರೀಕ್ಷೆ ಮೂಡಿದೆ. ಸರಣಿಯ ಎರಡೂ ಟೆಸ್ಟ್‌ಗಳನ್ನು ಜಯಿಸುವ ಛಲದಲ್ಲಿದ್ದೇವೆ. ಯೋಜನೆಗೆ ಬದ್ಧವಾಗಿ ಆಡುತ್ತೇವೆ’ ಎಂದು ಶಾಂತೊ ಸುದ್ದಿಗಾರರಿಗೆ ಪ್ರತಿಕ್ರಿಯಿಸಿದರು.

ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್ (ಡಬ್ಯ್ಲುಟಿಸಿ) ಪಾಯಿಂಟ್ ಪಟ್ಟಿಯಲ್ಲಿ ಭಾರತವು ಅಗ್ರಸ್ಥಾನದಲ್ಲಿದೆ. ಈ ಎರಡೂ ಟೆಸ್ಟ್‌ಗಳು ಡಬ್ಲ್ಯುಟಿಸಿಯ ಭಾಗವಾಗಿವೆ.  

ಬಾಂಗ್ಲಾದೇಶ ತಂಡವು ಸೋಮವಾರದಿಂದ ಅಭ್ಯಾಸ ಆರಂಭಿಸಲಿದೆ. ಭಾರತ ತಂಡವು ಕಳೆದ ಮೂರು ದಿನಗಳಿಂದ ಅಭ್ಯಾಸ ಮಾಡುತ್ತಿದೆ.