ಕಾರು ಅಪಘಾತ: ಕೆನ್ಯಾದ ಮ್ಯಾರಥಾನ್ ತಾರೆ ಕಿಪ್ಟಮ್ ಸಾವು

ನೈರೋಬಿ (ಎಪಿ): ದೀರ್ಘ ಅಂತರದ ಓಟದಲ್ಲಿ ಸೂಪರ್ಸ್ಟಾರ್ ಪಟ್ಟಕ್ಕೇರುವ ಹಾದಿಯಲ್ಲಿದ್ದ ಮ್ಯಾರಥಾನ್ ವಿಶ್ವದಾಖಲೆ ವೀರ, ಕೆನ್ಯಾದ ಕೆಲ್ವಿನ್ ಕಿಪ್ಟಮ್ ಭಾನುವಾರ ರಾತ್ರಿ ಕಾರು ಅಪಘಾತದಲ್ಲಿ ದಾರುಣವಾಗಿ ಮೃತಪಟ್ಟಿದ್ದಾರೆ. ಮುಂಬರುವ ಪ್ಯಾರಿಸ್ ಒಲಿಂಪಿಕ್ಸ್ ಸ್ವರ್ಣಪದಕಕ್ಕೆ 24 ವರ್ಷದ ಕಿಪ್ಟಮ್ ನೆಚ್ಚಿನ ಸ್ಪರ್ಧಿಯಾಗಿದ್ದರು.

. ಪಶ್ಚಿಮ ಕೆನ್ಯಾದ ರಿಫ್ಟ್ ಕಣಿವೆಯ ಕಿಪ್ಟಾಗತ್– ಎಲ್ಟೊರೆಟ್ ಹಾದಿಯಲ್ಲಿ ಅವರು ಚಲಾಯಿಸುತ್ತಿದ್ದ ಕಾರು ಕಿಪ್ಸಾಬೆಟ್ ಎಂಬಲ್ಲಿ ರಸ್ತೆಯಿಂದ ಜಾರಿ ಮರಕ್ಕೆ ಅಪ್ಪಳಿಸಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಅವರ ಕೋಚ್ ರುವಾಂಡದ ಜರ್ವೈಸ್ ಹಕಿಝಿಮನಾ ಕೂಡ ಸ್ಥಳದಲ್ಲೇ ಅಸುನೀಗಿದ್ದಾರೆ. ಕಾರಿನಲ್ಲಿದ್ದ 24 ವರ್ಷದ ಮಹಿಳೆ ಗಂಭೀರವಾಗಿ ಗಾಯಗೊಂಡಿದ್ದು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಕಾರು ಸಂಪೂರ್ಣ ನಜ್ಜುಗುಜ್ಜಾಗಿದೆ.

. ಕಳೆದ ಕೆಲವು ವರ್ಷಗಳಿಂದ ಸತತ ಸಾಧನೆಗಳಿಂದ ಅವರು ಸರ್ವಶ್ರೇಷ್ಠ ಓಟಗಾರನಾಗುವ ಭರವಸೆ ಮೂಡಿಸಿದ್ದರು. ತಮ್ಮ ಮೂರನೇ ಓಟದಲ್ಲೇ ಅವರು ವಿಶ್ವ ದಾಖಲೆ ಸ್ಥಾಪಿಸಿದ್ದರು. ಷಿಕಾಗೊ ಮ್ಯಾರಥಾನ್ನಲ್ಲಿ ಅವರು ಸ್ಥಾಪಿಸಿದ್ದ ವಿಶ್ವದಾಖಲೆಯನ್ನು ವಿಶ್ವ ಅಥ್ಲೆಟಿಕ್ಸ್ ಕಳೆದ ವಾರವಷ್ಟೇ ದೃಢೀಕರಿಸಿತ್ತು.

. 2022 ರಲ್ಲಿ ಸ್ಪೇನ್ನ ವಲೆನ್ಸಿಯಾ ಮ್ಯಾರಥಾನ್ನಲ್ಲಿ ಅವರು ಪದಾರ್ಪಣೆ ಯತ್ನದಲ್ಲೇ ಅತಿ ವೇಗವಾಗಿ ಓಡಿದ ಓಟಗಾರ ಎಂಬ ಹಿರಿಮೆ ಪಡೆದಿದ್ದರು. ಕಳೆದ ವರ್ಷ ಪ್ರತಿಷ್ಠಿತ ಮ್ಯಾರಥಾನ್ ಸ್ಪರ್ಧೆಗಳಾದ ಲಂಡನ್ ಮತ್ತು ಷಿಕಾಗೊ ರೇಸ್ನಲ್ಲೂ ಅವರು ವಿಜಯಿಯಾಗಿದ್ದರು. ಲಂಡನ್ ಮ್ಯಾರಥಾನ್ನಲ್ಲಿ ಅವರು ವಿಶ್ವದಾಖಲೆ ಸ್ಥಾಪಿಸಿದ್ದರು.

. ಕಳೆದ ವರ್ಷದ ಅಕ್ಟೋಬರ್ನಲ್ಲಿ ಕಿಪ್ಟಮ್ ಅವರು ಷಿಕಾಗೊ ಮ್ಯಾರಥಾನ್ ಓಟವನ್ನು 2ಗಂ.00.35 ಸೆಕೆಂಡಗಳಲ್ಲಿ ಕ್ರಮಿಸಿ, ಸ್ವದೇಶದ ಇನ್ನೊಬ್ಬ ಮಹಾನ್ ಓಟಗಾರ ಇಲ್ಯುಡ್ ಕಿಪ್ಚೊಗೆ ಅವರ ದಾಖಲೆಯನ್ನು 34 ಸೆಕೆಂಡುಗಳಿಂದ ಸುಧಾರಿಸಿದ್ದರು.

. ಕಠಿಣ ಅಭ್ಯಾಸದ ಹಾದಿಯಲ್ಲಿ ಅವರು ಕೆಲವೊಮ್ಮೆ ವಾರಕ್ಕೆ 300 ಕಿ.ಮೀ. (190 ಮೈಲಿ) ಕೂಡ ಓಡುತ್ತಿದ್ದರು. ಏಪ್ರಿಲ್ನಲ್ಲಿ ರೋಟರ್ಡ್ಯಾಮ್ನಲ್ಲಿ ನಡೆಯಲಿರುವ ಮ್ಯಾರಥಾನ್ ಓಟವನ್ನು ಎರಡು ಗಂಟೆಯೊಳಗೆ ಪೂರೈಸುವ ವಿಶ್ವಾಸವನ್ನು ಇತ್ತೀಚೆಗಷ್ಟೇ ವ್ಯಕ್ತಪಡಿಸಿದ್ದರು.

. ‘ಕಿಪ್ಟಮ್ ನಮ್ಮ ಭವಿಷ್ಯವಾಗಿದ್ದರು’ ಎಂದು ಕೆನ್ಯಾದ ಅಧ್ಯಕ್ಷ ವಿಲಿಯಮ್ ರುಟೊ ದುಃಖಿಸಿದ್ದಾರೆ. ವಿಶ್ವ ಅಥ್ಲೆಟಿಕ್ಸ್ ಅಧ್ಯಕ್ಷ ಸೆಬಾಸ್ಟಿಯನ್ ಕೋ ಕೂಡ ಶೋಕ ವ್ಯಕ್ತಪಡಿಸಿದ್ದಾರೆ. ಶವಾಗಾರದ ಬಳಿಯಿದ್ದ, ಮಹಿಳಾ ಸ್ಟೀಪಲ್ಚೇಸ್ ಮಾಜಿ ವಿಶ್ವ ಚಾಂಪಿಯನ್ ಮಿಲ್ಖಾ ಕಿಮೊಸ್ ‘ನನಗೆ ಮಾತುಗಳೇ ಹೊರಡುತ್ತಿಲ್ಲ’ ಎಂದರು.

. ಅಪಘಾತದ ಸ್ಥಳ ಎತ್ತರದ ಪ್ರದೇಶವಾಗಿದ್ದು, ಕೆನ್ಯಾ ಮತ್ತು ಇತರ ದೇಶಗಳ ಅನೇಕ ಮ್ಯಾರಥಾನ್ ಓಟಗಾರರ ನೆಚ್ಚಿನ ತರಬೇತಿ ತಾಣವಾಗಿದೆ.

. ವಿವಿಧ ರೀತಿಯಲ್ಲಿ ಸಾವು ಕಂಡ ಕೆನ್ಯಾದ ಓಟಗಾರರ ಸಾಲಿಗೆ ಈಗ ಕಿಪ್ಟಮ್ ಸೇರಿಕೊಂಡಿದ್ದಾರೆ. 2010ರಲ್ಲಿ ಆಲ್ ಆಫ್ರಿಕಾ ಕೂಟದ ಬೆಳ್ಳಿ ವಿಜೇತ ಡೇವಿಡ್ ಲಿಲಿಯಿ ಕಾರು ಅಪಘಾತದಲ್ಲಿ ಮಡಿದಿದ್ದರು. 2015ರ ವಿಶ್ವ ಚಾಂಪಿಯನ್ಷಿಪ್ನಲ್ಲಿ 400 ಮೀ. ಹರ್ಡಲ್ಸ್ ಚಿನ್ನ ಗೆದ್ದ ನಿಕೋಲಸ್ ಬೆಟ್ ಕೂಡ 2018ರಲ್ಲಿ ಅಪಘಾತದಲ್ಲಿ ಸಾವಿಗೀಡಾಗಿದ್ದರು. ಇನ್ನೊಬ್ಬ ಪ್ರತಿಭಾನ್ವಿತ ಮ್ಯಾರಥಾನ್ ಓಟಗಾರ, 2008ರ ಬೀಜಿಂಗ್ ಒಲಿಂಪಿಕ್ಸ್ ಮ್ಯಾರಥಾನ್ ಚಾಂಪಿಯನ್ ಸಾಮ್ಯುಯೆಲ್ ವಂಜಿರು ಮನೆಯ ಬಾಲ್ಕನಿಯಿಂದ ಕೆಳಗೆ ಬಿದ್ದು ಸತ್ತಿದ್ದರು. ಕೆನ್ಯಾ ಸಂಜಾತ ಉಗಾಂಡಾದ ಅಥ್ಲೀಟ್ ಬೆಂಜಮಿನ್ ಕಿಪ್ಲಾಗಟ್ ಕಳೆದ ವರ್ಷದ ಕೊನೆಯಲ್ಲಿ ಕೆನ್ಯಾದ ಕಿಮುಮು ತಮ್ಮ ಕಾರಿನಲ್ಲಿ ಕೊಲೆಯಾಗಿದ್ದರು.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಕಾರು ಅಪಘಾತ: ಕೆನ್ಯಾದ ಮ್ಯಾರಥಾನ್ ತಾರೆ ಕಿಪ್ಟಮ್ ಸಾವು

ಚಿನಕುರುಳಿ | ಶುಕ್ರವಾರ, 15 ನವೆಂಬರ್ 2024

ಚುರುಮುರಿ | ಬೊಂಬೆ ಆಡ್ಸೋನು...

ದಿನ ಭವಿಷ್ಯ | ಈ ರಾಶಿಯವರು ರಾಹುಕಾಲದ ನಂತರ ಪ್ರಯಾಣ ಆರಂಭಿಸಿ

2025ರಲ್ಲಿ 19 ಸಾರ್ವತ್ರಿಕ ರಜೆ, 20 ಪರಿಮಿತ ರಜಾ ದಿನಗಳು; ಇಲ್ಲಿದೆ ಪಟ್ಟಿ

ಸಯ್ಯದ್‌ ಮುಷ್ತಾಕ್‌ ಅಲಿ ಟಿ20 ಕ್ರಿಕೆಟ್ ಟೂರ್ನಿ: ವೈಶಾಕ್‌ಗೆ ಸ್ಥಾನ

ಚೆಸ್ ಇಂಡಿಯಾ ರ‍್ಯಾಪಿಡ್ ಟೂರ್ನಿ: ಕಾರ್ಲಸನ್‌ಗೆ ಜಯ; ಪ್ರಜ್ಞಾನಂದ ರನ್ನರ್ ಅಪ್

ಕ್ರಿಕೆಟ್: ಬಾಲಕಿಯರ ತಂಡಕ್ಕೆ ನೇಸರ ನಾಯಕಿ

IND vs SA 4th T20I: ಟಾಸ್ ಗೆದ್ದ ಭಾರತ ಬ್ಯಾಟಿಂಗ್ ಆಯ್ಕೆ

ಒಳನೋಟ: ದಾಂಪತ್ಯ ಸಾಂಗತ್ಯಗಳ ಸುತ್ತ

ಒಳನೋಟ | ಹೆಜ್ಜೆ ಹೆಜ್ಜೆಗೂ ಎಸ್‌ಐಟಿ ತನಿಖೆ

ಒಳನೋಟ | ‘ಅಕ್ರಮ ವಲಸೆ’: ನೆಲೆ ವಿಸ್ತಾರ

ಒಳನೋಟ | ಸಮ್ಮೇಳನಾಧ್ಯಕ್ಷತೆ: ‘ರಾಜಕೀಯ’ ಗುಂಗು

ಚಿನಕುರುಳಿ | ಶುಕ್ರವಾರ, 15 ನವೆಂಬರ್ 2024

ಚುರುಮುರಿ | ಬೊಂಬೆ ಆಡ್ಸೋನು...

ದಿನ ಭವಿಷ್ಯ | ಈ ರಾಶಿಯವರು ರಾಹುಕಾಲದ ನಂತರ ಪ್ರಯಾಣ ಆರಂಭಿಸಿ

2025ರಲ್ಲಿ 19 ಸಾರ್ವತ್ರಿಕ ರಜೆ, 20 ಪರಿಮಿತ ರಜಾ ದಿನಗಳು; ಇಲ್ಲಿದೆ ಪಟ್ಟಿ