ತುಳು ಭಾಷೆಯಲ್ಲಿ ನೆತ್ತಿ ಎಂದರೆ ಹಣೆ ಎಂದರ್ಥ. ಇದು ಕೋಣಗಳ ಅಲಂಕಾರಕ್ಕೆ ಬಳಸುವ ಹಗ್ಗ. ಒಂದು ಭಾಗದಲ್ಲಿ ವೃತ್ತಾಕಾರವಾಗಿದ್ದು, ಇನ್ನೊಂದು ತುದಿಯನ್ನು ಹಗ್ಗಗಳ ನೂಲುಗಳನ್ನು ಬಿಡಿಸಿ ಹೂವಿನಂತೆ ಮಾಡಲಾಗುತ್ತದೆ. ವೃತ್ತಾಕಾರವಾಗಿರುವ ಒಂದು ಬದಿಯನ್ನು ಕೋಣದ ಗಲ್ಲದ ಮೂಲಕ ಏರಿಸಿ, ಹೂವಿನಂತೆ ಇರುವ ಇನ್ನೊಂದು ಭಾಗವನ್ನು ಹಣೆಗೆ ಕಟ್ಟಲಾಗುತ್ತದೆ. ಹಗ್ಗದ ಮಧ್ಯದಲ್ಲಿ ಕೋಣದ ಮಾಲೀಕರ ಇಷ್ಟದ ವಿನ್ಯಾಸ ಇರುವ ಅಂಗೈಯಗಲದ ತೆಳು ಬೆಳ್ಳಿ ಬಟ್ಟಲು ಇರುತ್ತದೆ. ವಿಶಿಷ್ಟವಾಗಿ ನೆಯ್ದಿರುವ ಇದರ ದರ ₹10 ಸಾವಿರದವರೆಗೂ ಇದೆ.

ನೊಗ ಹಾಗೂ ಕೋಣದ ಕುತ್ತಿಗೆಯನ್ನು ಕಟ್ಟಲು ಈ ಹಗ್ಗವನ್ನು ಬಳಸಲಾಗುತ್ತದೆ. 2-3 ಮೀಟರ್ ಉದ್ದ ಇರುವ ಈ ಹಗ್ಗದ ಮಧ್ಯಭಾಗದಲ್ಲಿ ವಿಶೇಷ ನೇಯ್ಗೆಯ ರಚನೆಗಳಿವೆ. ಒಂದು ತುದಿಯಲ್ಲಿ ಹಗ್ಗಗಳ ನೂಲುಗಳನ್ನು ಬಿಡಿಸಿ ಹೂವಿನ ಮಾದರಿಯನ್ನು ರಚಿಸಲಾಗುತ್ತದೆ. ನೊಗದ ತುದಿಯನ್ನು ಕೋಂಟು ಎನ್ನುವುದರಿಂದ ಇದಕ್ಕೆ ಕೋಂಟಿನ ಹಗ್ಗ ಎನ್ನುವ ಹೆಸರು ಬಂದಿದೆ.

ಈ ಹಗ್ಗವನ್ನು ಕುಂದಾಪುರ ಭಾಗದಲ್ಲಿ ತಳಕ್ಕೆ ಹಗ್ಗ ಎನ್ನುತ್ತಾರೆ. ಎರಡು ಕೋಣಗಳು ಅಗತ್ಯಕ್ಕಿಂತ ದೂರ ನಿಲ್ಲದ ಹಾಗೆ ನಿಯಂತ್ರಿಸಲು ಈ ಹಗ್ಗವನ್ನು ಎರಡೂ ಕೋಣಗಳ ಕುತ್ತಿಗೆಗೆ ಕಟ್ಟಲಾಗುತ್ತದೆ. ಸುಮಾರು ಒಂದು ಅಡಿ ಉದ್ದದ ಈ ಹಗ್ಗವನ್ನು ವಿಶೇಷ ವಿನ್ಯಾಸದೊಂದಿಗೆ ನೇಯಲಾಗುತ್ತದೆ. ಎರಡೂ ತುದಿಯಲ್ಲಿ ಇರುವ ವೃತ್ತಾಕಾರದ ಉರುಳಿಗೆ ಸಾಮಾನ್ಯ ಹಗ್ಗವನ್ನು ಬಳಸಿ ಕೋಣಗಳ ಕುತ್ತಿಗೆಗೆ ಕಟ್ಟಲಾಗುತ್ತದೆ.

ಹಗ್ಗ ವಿಭಾಗದಲ್ಲಿ ಸ್ಪರ್ಧೆ ಮಾಡುವ ಕೋಣಗಳನ್ನು ಓಡಿಸಲು ಈ ಹಗ್ಗವನ್ನು ಬಳಸಲಾಗುತ್ತದೆ, ಇದರ ಒಂದು ತುದಿಯನ್ನು ನೊಗಕ್ಕೆ ಕಟ್ಟಿದರೆ, ಇನ್ನೊಂದು ತುದಿಯನ್ನು ಓಡಿಸುವವ (ಕಂಬಳ ಜಾಕಿ) ಹಿಡಿದುಕೊಂಡಿರುತ್ತಾನೆ. ಓಡಿಸುವಾಗ ಕೈಯಿಂದ ಹಗ್ಗ ಜಾರದಿರಲಿ ಎಂದು ತೆಂಗಿನ ನಾರಿನಿಂದ ಈ ಹಗ್ಗವನ್ನು ತಯಾರಿಸಲಾಗುತ್ತದೆ. ಹಗ್ಗದ ಕೊನೆಗೆ ಹೂವಿನ ರೀತಿಯ ವಿನ್ಯಾಸ ಇರುತ್ತದೆ.