ಪರಿಮಳವಾದವಳ ಹಾಡು

ಮೇಳದಯ್ಯ ನಿನ್ನ ದುಡಿಯ ಕೊಂಚ ನಿಲ್ಲಿಸೋ ಒಲೆಯ ಮೇಲೆ ಕುದಿಯೊ ಎಸರು ನಾನು ಆದೆನೋ

. ಕಣ್ಣಿನಲ್ಲಿ ಚುಕ್ಕಿ ಕಿತ್ತು ಮಾಲೆ ಕಟ್ಟಿದೆ ಬಾಡದಂತೆ ಚಂದ್ರಕಾಂತಿ ಬಟ್ಟೆ ಹೊದೆಸಿದೆ ಗುಡಿಸಲಲ್ಲಿ ಹಣತೆ ಮುಡಿಸಿ ಬೆಳಕನಿರಿಸಿದೆ ಘಲುಗುಡುವ ಕಾಲಗೆಜ್ಜೆ ದಾರಂದಕೆ ಸಿಗಿಸಿದೆ

. ದುಡಿಯ ಬಡಿದು ಜೀವ ಬರಿಸು ಕೀಲುಕುದುರೆಗೆ ಅಯ್ಯಾ, ಹಗ್ಗ ಹರಿದ ಗೂಳಿಯಂತೆ ಹೋದವನಾ ಹೊತ್ತು ತಂದು ಬಾಗಿಲಲ್ಲಿ ಕುದುರೆ ಕೆನೆಯಲಿ ಅದರ ಉಲಿಗೆ ಗೆಜ್ಜೆ ಜಾರಿ ಒಳಗೆ ಕರೆಯಲಿ

. ಮೇಳದಯ್ಯ ಬಡಿಯೊ ಆಗ ಜೋರು ಮದ್ದಳೆ ನಾದ ಅವನ ನರನರಕೆ ಇಳಿದು ಆಸೆ ಕೆಣಕಲಿ ಅಮಲು ಏರಿ ಕುಣಿದ ಮೈಯಿ ದಣಿದು ಹೋಗಲಿ ಹರಿದ ಬೆವರ ಹೊಳೆಯಲಿ ಮದನ ಜಳಕವಾಡಲಿ

. ದುಡಿಯ ದುಡಿಸಿದವಗೆ ಏನು ಕೊಡುವೆ ಎಂದೆಯೇನೊ ತಂದೆ ನಿನ್ನ ಕರುಣೆಯಿಂದ ಚಂದ್ರೋದಯ ಭಾಗ್ಯವರಳಿ ಪರಿಮಳವಾದ ಬಡವಿ ನಿನ್ನ ಮೊಗವ ನೋಡಿ ನಗುವ ಕೂಸ ಹಡೆದು ಅದರ ನಗೆಯ ಕುಡಿಸುವೆ

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.