ಪ್ರಶ್ನೋತ್ತರ | ಹಣಕಾಸು, ತೆರಿಗೆ ಸಮಸ್ಯೆಗೆ ಪರಿಹಾರ

ನಿಮ್ಮ ಹೂಡಿಕೆ ಬಗೆಗಿನ ಅರಿವು ಸಾಮನ್ಯವೆಂದು ನೀವು ಹೇಳಿದರೂ ಅದರ ಹಿಂದಿರುವ ಲಕ್ಷ್ಯವನ್ನು ಮೆಚ್ಚಲೇಬೇಕು. ಇದು ಎಲ್ಲ ದೀರ್ಘಾವಧಿ ಹೂಡಿಕೆದಾರರಿಗೆ ಮಾರ್ಗದರ್ಶಿ ಸೂತ್ರದಂತಿದೆ. ನಿಮ್ಮ ಪ್ರಶ್ನೆಗೆ ಸಂಬಂಧಿಸಿ ಹೇಳುವುದಾದರೆ ನಿಮ್ಮ ಷೇರುಗಳ ಮೌಲ್ಯ ಎಷ್ಟೇ ಇದ್ದರೂ ನಿಮ್ಮ ಮಗಳ ಹೆಸರಲ್ಲಿ ಅವುಗಳನ್ನು ಉಡುಗೊರೆ ರೂಪದಲ್ಲಿ ಕೊಟ್ಟಾಗ ತೆರಿಗೆ ಇರುವುದಿಲ್ಲ. ತಂದೆ, ಮಕ್ಕಳ ನಡುವಿನ ಇಂತಹ ವರ್ಗಾವಣೆಗೆ ತೆರಿಗೆ ವಿನಾಯಿತಿ ಇದೆ. ಹೆಚ್ಚುವರಿ ದಾಖಲೆಗಾಗಿ ಅಗತ್ಯ ಬಿದ್ದರೆ ವಕೀಲರನ್ನು ಸಂಪರ್ಕಿಸಿ ಗಿಫ್ಟ್ ಡೀಡ್ ಮಾಡಿಸಿ ವರ್ಗಾಯಿಸಿ. ಆದರೆ, ಈ ವರ್ಗಾವಣೆಗೆ ಸಂಬಂಧಿಸಿ ಮಾರುಕಟ್ಟೆ ದರದ ಅನ್ವಯ ಸ್ಟಾಂಪ್‌ ಮೌಲ್ಯವನ್ನು ಪಾವತಿಸಬೇಕಾಗಬಹುದು. ಈ ಬಗ್ಗೆಯೂ ವಿಚಾರಿಸಿ.

ನಂತರ ನಿಮ್ಮ ಬ್ರೋಕರ್ ಅನ್ನು ಸಂಪರ್ಕಿಸಿ ವರ್ಗಾವಣೆಗೆ ಸಂಬಂಧಿಸಿದ ಡೆಲಿವರಿ ಇನ್ಟ್ರಕ್ಷನ್ ಸ್ಲಿಪ್ ಇತ್ಯಾದಿ ರವಾನಿಸಿ. ಇದು ಚೆಕ್ ಮೂಲಕ ಹಣ ವರ್ಗಾಯಿಸುವಂತೆಯೇ ಕಾರ್ಯ ನಿರ್ವಹಿಸುತ್ತದೆ.

ನಿಮ್ಮ ಅಧಿಕೃತ ಬ್ಯಾಂಕಿಗೂ ಈ ಬಗ್ಗೆ ಮಾಹಿತಿ ನೀಡಿ. ಒಂದು ವಿಚಾರ ಹೆಚ್ಚುವರಿಯಾಗಿ ಗಮನಿಸಿ. ಮುಂದೆ ಈ ಷೇರುಗಳನ್ನು ನಿಮ್ಮ ಮಗಳು ಮಾರಾಟ ಮಾಡುವಾಗ ಹಾಗೂ ಬರುವ ಡಿವಿಡೆಂಡ್ ಇತ್ಯಾದಿ ಲಾಭಕ್ಕೆ ಅವರೇ ತೆರಿಗೆ ಪಾವತಿಸಬೇಕು. ಅದಕ್ಕೆ ಸಂಬಂಧಿತ ಆದಾಯ ತೆರಿಗೆ ರಿಟರ್ನ್ಸ್ ಕೂಡ ಅವರೇ ಸಲ್ಲಿಸಬೇಕು.

ಟ್ಯಾಕ್ಸ್ ಹಾರ್ವೆಸ್ಟಿಂಗ್ ಎಂಬುದು ಸಾಮಾನ್ಯವಾಗಿ ಹೂಡಿಕೆ ಕ್ಷೇತ್ರದಲ್ಲಿ ನಷ್ಟ ಅನುಭವಿಸುತ್ತಿರುವವರು ಈಗಾಗಲೇ ಬಂದ ಲಾಭದ ಮೇಲಿನ ತೆರಿಗೆಯನ್ನು ಉಳಿಸಲು ಬಳಸುವ ಒಂದು ತಂತ್ರಗಾರಿಕೆಯಾಗಿದೆ. ಇನ್ನೊಂದು ರೀತಿಯಲ್ಲಿ ಹೇಳುವುದಾದರೆ ದೀರ್ಘಾವಧಿಯಲ್ಲಿ ಲಾಭ ಮಾಡಲು ಹೊರಟಾಗ ತಾತ್ಕಾಲಿಕವಾಗಿ ಹೂಡಿಕೆ ಮೇಲೆ ನಷ್ಟವೂ ಗೋಚರಿಸಬಹುದು. ಇದನ್ನು ನಮ್ಮ ತೆರಿಗೆ ನಿರ್ವಹಣೆಯ ಉದ್ದೇಶಕ್ಕಾಗಿ ಪರಿಣಾಮಕಾರಿಯಾಗಿ ಬಳಸಿಕೊಳ್ಳುವುದು ಇಲ್ಲಿನ ಉದ್ದೇಶವಾಗಿರುತ್ತದೆ.

ನಿಮ್ಮ ಡಿಮ್ಯಾಟ್ ಖಾತೆ ಅಥವಾ ಮ್ಯೂಚುವಲ್ ಫಂಡ್ ಖಾತೆಯಲ್ಲಿರುವ ಹೂಡಿಕೆಗಳನ್ನು ತಾತ್ಕಾಲಿಕವಾಗಿ ಮಾರಾಟ ಮಾಡಿ ಅದೇ ಷೇರು ಅಥವಾ ಮ್ಯೂಚುವಲ್ ಫಂಡ್‌ಗಳನ್ನು ಮತ್ತೆ ಮುಂದುವರಿಸಿಕೊಂಡು ಹೋಗುವುದು ಇದರ ಭಾಗವಾಗಿದೆ. ಇದರಿಂದ ಒಂದಷ್ಟು ಬ್ರೋಕರೇಜ್ ಅಥವಾ ಶುಲ್ಕ ವೆಚ್ಚವಾಗಬಹುದು. ಆದರೆ, ಆಯಾ ವರ್ಷದಲ್ಲಿ ನಷ್ಟ ದಾಖಲಿಸಿ ಈಗಾಗಲೇ ಬಂದ ಲಾಭಕ್ಕೆ ಸರಿದೂಗಿಸುವುದು ಹಾಗೂ ತೆರಿಗೆ ಉಳಿಸುವುದು ಇದರ ಕಾರ್ಯ ವಿಧಾನವಾಗಿದೆ.    

ಪ್ರಸಕ್ತ ಆರ್ಥಿಕ ವರ್ಷದಲ್ಲಿ ಬದಲಾದ ತೆರಿಗೆ ನಿಯಮಗಳ ಪ್ರಕಾರ ₹1.25 ಲಕ್ಷಕ್ಕಿಂತ ಅಧಿಕ ದೀರ್ಘಾವಧಿ ಲಾಭ ಗಳಿಸಿದ್ದರೆ ಅದಕ್ಕಿಂತ ಅಧಿಕ ಮೊತ್ತದ ಲಾಭದ ಮೇಲೆ ಶೇ 12.5ರ ದರದಲ್ಲಿ ತೆರಿಗೆ ಕಟ್ಟಬೇಕು. ಇಂತಹ ಸಂದರ್ಭದಲ್ಲಿ ಅದೇ ದೀರ್ಘಾವಧಿ ಹೂಡಿಕೆಯಲ್ಲಿ ಹೆಚ್ಚುವರಿ ಲಾಭದ ಪ್ರಮಾಣಕ್ಕೆ ಸಮನಾಗಿ ನಷ್ಟವಾಗುವಂತೆ ಯಾವುದಾದರೂ ಹೂಡಿಕೆ ಇದ್ದರೆ ಅದನ್ನು ಮಾರಾಟ ಮಾಡಿ ನಷ್ಟ ದಾಖಲಿಸಬೇಕು. ಒಟ್ಟಾರೆ ಇದರ ಪರಿಣಾಮ ನಿಮ್ಮ ಲಾಭವು ₹1.25 ಲಕ್ಷಕ್ಕಿಂತ ಒಳಗೆ ಇರುವಂತೆ ನೋಡಿಕೊಂಡು ತೆರಿಗೆ ಸಂಪೂರ್ಣ ಉಳಿಸುವುದು ಒಂದು ಯೋಜನೆ.

ಇನ್ನೊಂದು ಉದಾಹರಣೆ ಹೇಳುವುದಾದರೆ ಅಲ್ಪಾವಧಿ ಹೂಡಿಕೆಯಲ್ಲಿ ಈಗಾಗಲೇ ₹2 ಲಕ್ಷ ಲಾಭ ಹೊಂದಿದ್ದೀರಿ ಎಂದಿಟ್ಟುಕೊಳ್ಳಿ. ಪ್ರಸ್ತುತ ಇದರ ಮೇಲೆ ಶೇ 20ರ ದರದಲ್ಲಿ ತೆರಿಗೆ ಕಟ್ಟಬೇಕಾಗುತ್ತದೆ. ನಿಮ್ಮ ಅದೇ ವರ್ಗದ ಅಲ್ಪಾವಧಿ ಹೂಡಿಕೆ ಆಕಸ್ಮಿಕವಾಗಿ ನಷ್ಟದಲ್ಲಿದ್ದರೆ ಸರಿಯಾದ ಸಂದರ್ಭ ನೋಡಿ ಸಾಧ್ಯವಾದಷ್ಟು ಅಲ್ಪಾವಧಿ ನಷ್ಟ ದಾಖಲಿಸಿ ಈ ಮೊತ್ತದ ಮೇಲೆ ಕಟ್ಟಬೇಕಾಗುವ ತೆರಿಗೆ ತಗ್ಗಿಸಬಹುದು. ತದ ನಂತರ ಅದೇ ಷೇರುಗಳನ್ನು ಖರೀದಿಸಬಹುದು.

ಈ ಯಾವುದೇ ತಂತ್ರಗಾರಿಕೆಯನ್ನು ನಿಮ್ಮ ಲಾಭದ ಉದ್ದೇಶಕ್ಕೆ ಪ್ರಯೋಗಿಸುವ ಮೊದಲು ನಿಮಗೆ ಅನ್ವಯವಾಗುವ ತೆರಿಗೆ ದರ, ಲಾಭ-ನಷ್ಟ ಪರಸ್ಪರ ಹೊಂದಾಣಿಕೆ ಮಾಡಿಕೊಳ್ಳುವ ಆದಾಯ ತೆರಿಗೆ ಸೆಕ್ಷನ್ 70 ಹಾಗೂ ಸೆಕ್ಷನ್ 74ರ ಷರತ್ತುಗಳನ್ನು ಸರಿಯಾಗಿ ಅರ್ಥೈಸಿಕೊಳ್ಳಿ ಅಥವಾ ನಿಮ್ಮ ಪೋರ್ಟ್‌ ಫೋಲಿಯೊಗೆ ಸಂಬಂಧಿಸಿ, ಅಗತ್ಯ ತೆರಿಗೆ ಸಲಹೆಯನ್ನು ಪಡೆದುಕೊಳ್ಳಿ.

ಒಂದು ವಿಚಾರ ನೆನಪಿರಲಿ. ಟ್ಯಾಕ್ಸ್ ಹಾರ್ವೆಸ್ಟಿಂಗ್ ಎಂಬುದು ಆಕಸ್ಮಿಕವಾಗಿ ನಮ್ಮ ಊಹೆಗೂ ಮೀರಿದ ಸಂದರ್ಭಗಳಲ್ಲಿ ಉಂಟಾದ ನಷ್ಟವನ್ನು ನಮ್ಮ ತೆರಿಗೆ ಪಾವತಿಯ ಪರಿಸ್ಥಿತಿಗೆ ಹೊಂದಿಕೊಂಡು ವ್ಯವಹರಿಸುವ ವಿಷಯವೇ ಹೊರತು, ಮೂಲತಃ ಎಲ್ಲ ಹೂಡಿಕೆದಾರರೂ ಗಳಿಸಬೇಕಾಗುವ ಲಾಭದ ವಿಚಾರದಲ್ಲಿ ಮಾಡಿಕೊಳ್ಳುವ ರಾಜಿಯಲ್ಲ ಎಂಬುದು. ಹೀಗಾಗಿ, ಅದರ ಮೇಲೆ ಯಾವತ್ತೂ ತೆರಿಗೆ ಇದ್ದೇ ಇದೆ.