ಮುಂಬೈ: ಪ್ರಸಕ್ತ ತಿಂಗಳಿನಲ್ಲಿ 28ಕ್ಕೂ ಹೆಚ್ಚು ಕಂಪನಿಗಳು ಆರಂಭಿಕ ಸಾರ್ವಜನಿಕ ಕೊಡುಗೆಯಡಿ (ಐಪಿಒ) ಬಂಡವಾಳ ಸಂಗ್ರಹಿಸುವ ಮೂಲಕ ಷೇರುಪೇಟೆಯನ್ನು ಪ್ರವೇಶಿಸುತ್ತಿವೆ ಎಂದು ಭಾರತೀಯ ರಿಸರ್ವ್‌ ಬ್ಯಾಂಕ್‌ನ ಮಾಸಿಕ ವರದಿ ತಿಳಿಸಿದೆ.
ದೊಡ್ಡ ಕಂಪನಿಗಳು ಸೇರಿ ಸಣ್ಣ ಮತ್ತು ಮಧ್ಯಮ ಪ್ರಮಾಣದ ಕಂಪನಿಗಳು ಐಪಿಒ ಮೂಲಕ ಬಂಡವಾಳ ಸಂಗ್ರಹಿಸಲು ಮುಂದಾಗಿವೆ. ಕಳೆದ 14 ವರ್ಷಕ್ಕೆ ಹೋಲಿಸಿದರೆ ಸೆಪ್ಟೆಂಬರ್‌ನಲ್ಲಿ ಅತಿಹೆಚ್ಚು ಐಪಿಒಗಳು ಪ್ರಕಟಗೊಂಡಿವೆ ಎಂದು ವಿವರಿಸಿದೆ.
ಕಂಪನಿಯು ಷೇರುಪೇಟೆಗೆ ಸೇರ್ಪಡೆಯಾದ ಒಂದು ವಾರದೊಳಗೆ ಹೂಡಿಕೆದಾರರಿಗೆ ಷೇರುಗಳು ಹಂಚಿಕೆಯಾಗಲಿವೆ ಎಂದು ತಿಳಿಸಿದೆ.
ಪೇರುಪೇಟೆಯಲ್ಲಿ ನೋಂದಣಿಯಾದ ಹೊಸ ಕಂಪನಿಗಳು ಪ್ರಸಕ್ತ ವರ್ಷದ ಮೊದಲ ಎಂಟು ತಿಂಗಳ ಅವಧಿಯಲ್ಲಿ ₹60 ಸಾವಿರ ಕೋಟಿ ಬಂಡವಾಳ ಸಂಗ್ರಹಿಸುವ ಗುರಿ ಹೊಂದಿದ್ದವು. ಸದ್ಯ ಈ ಬಂಡವಾಳ ಸಂಗ್ರಹಿಸುವತ್ತ ಗಮನ ಹರಿಸಿವೆ ಎಂದು ಹೇಳಿದೆ.
ಸತತ ಐದು ತಿಂಗಳಿನಿಂದ ಸರ್ಕಾರದ ಸಾ‌ಲಪತ್ರ ಮಾರುಕಟ್ಟೆಯಲ್ಲಿ ವಿದೇಶಿ ಬಂಡವಾಳ ಹೂಡಿಕೆ ಪ್ರಮಾಣದಲ್ಲಿ ಹೆಚ್ಚಳವಾಗುತ್ತಿದೆ. ಆದರೆ, ಕಾರ್ಪೊರೇಟ್‌ ಬಾಂಡ್‌ಗಳಲ್ಲಿ ಹೂಡಿಕೆ ಕಡಿಮೆಯಾಗಿದೆ ಎಂದು ಹೇಳಿದೆ.
