ಬಳ್ಳಾರಿ: ಕಚೇರಿಯನ್ನೇ ತೆರೆಯದ ಸಂಸದ; ಅಹವಾಲು ಸಲ್ಲಿಸಲು ಹೋಗುವುದೆಲ್ಲಿಗೆ?

ಅಭಿವೃದ್ಧಿ ಕಾರ್ಯಗಳು ಆಗುತ್ತಿಲ್ಲ. ಸಾರ್ವಜನಿಕರಿಗೆ ಸಂಸದರು ಸಿಗುತ್ತಿಲ್ಲ. ತುಕಾರಾಂ ಅವರು ಗೆದ್ದು ಮೂರು ತಿಂಗಳಿಗೂ ಹೆಚ್ಚು ಸಮಯವಾಗಿದೆ. ಗೆದ್ದಾಗ ಅವರ ಮೇಲೆ ಅಪಾರವಾದ ನಿರೀಕ್ಷೆಗಳಿದ್ದವು. ಅವುಗಳನ್ನು ಈಡೇರಿಸಬೇಕಿದ್ದರೆ ಸಂಸದರು ಮೊದಲು ಕಚೇರಿ ಆರಂಭಿಸಬೇಕು.

ಅಹವಾಲುಗಳನ್ನು ಕೊಡಬೇಕಿದ್ದರೆ ಎಲ್ಲಿಗೆ ಹೋಗಬೇಕು? ನಗರದಲ್ಲಿ ಸಮಸ್ಯೆಗಳಿವೆ. ಆಸ್ಪತ್ರೆಗಳಲ್ಲಿ ಶುಚಿತ್ವ ಇಲ್ಲ. ಗಡಿ ಪ್ರದೇಶದಲ್ಲಿ ಅಭಿವೃದ್ಧಿ ಆಗಿಲ್ಲ. ಅಭಿವೃದ್ಧಿ ಕಾರ್ಯಗಳು ಕುಂಟುತ್ತಿವೆ. ಇದೆಲ್ಲದರ ಪರಿಹಾರಕ್ಕಾಗಿ ಜನ ಸಂಪರ್ಕ ಕಚೇರಿಯನ್ನು ಸಂಸದರು ತೆಗೆಯಲೇಬೇಕಾಗುತ್ತದೆ.

ಸಂಸದರು ಇರುವುದು ಜನಸೇವೆ ಮಾಡಲು. ತುಕಾರಾಂ ಅವರಿಗೆ ಜನಪರ ಕಾಳಹಿ ಇದ್ದಿದ್ದರೆ ಕೂಡಲೇ ಕಚೇರಿ ತೆರೆಯಬೇಕಿತ್ತು. ಸಭೆ ಸರಂಭಗಳಲ್ಲಿ ಅಧಿಕಾರಿಗಳನ್ನು ತರಾಟೆ ತಗೆದುಕೊಳ್ಳುವುದಲ್ಲ. ಮೊದಲು ತಾವು ಸರಿಯಾಗಿರಬೇಕು. ಸಂಡೂರು ಮಾಡಲ್ ಎನ್ನುತ್ತಾರೆ. ಸಂಡೂರಲ್ಲಿ ಬಸ್ ನಿಲ್ದಾಣವೇ ಸರಿ, ಆಸ್ಪತ್ರೆಗಳೇ ನಾರುತ್ತಿವೆ.

ಹಳೇ ಜಿಲ್ಲಾಧಿಕಾರಿ ಕಚೇರಿ ಆವರಣದಲ್ಲಿ ಹೊಸದೊಂದು ಕಚೇರಿಯನ್ನು ತುಕಾರಾಂ ಅವರಿಗೆ ನೀಡಲಾಗಿದೆ. ಅದರ ಶುದ್ಧೀಕರಣ ಕಾರ್ಯ ನಡೆಯುತ್ತಿದೆ. ಬಹುತೇಕ ದಸರಾ ಹಬ್ಬದ ಹೊತ್ತಿಗೆ ಸಂಸದರು ಜಿಲ್ಲಾ ಕೇಂದ್ರ ಬಳ್ಳಾರಿ ನಗರದಲ್ಲಿ ಹೊಸ ಕಚೇರಿಯನ್ನು ತೆರೆಯಲಿದ್ದಾರೆ.