ತೆಕ್ಕಲಕೋಟೆ (ಬಳ್ಳಾರಿ): ಕೆಲ ದಿನಗಳಿಂದ ಸುರಿಯುತ್ತಿರುವ ಮಳೆಯಿಂದ ಇಲ್ಲಿನ ಬೂದಿದಿಬ್ಬದ ಸುತ್ತಮುತ್ತಲ ಪ್ರದೇಶದಲ್ಲಿ ನವಶಿಲಾಯುಗದ ಅವಶೇಷಗಳು ಕಾಣಸಿಗುತ್ತಿವೆ.
‘ಒಂದು ಅಡಿ ಉದ್ದ ಮೂಳೆಗಳು ಸಿಕ್ಕ ವಿಷಯವನ್ನು ರೈತರು ತಿಳಿಸಿದರು. ಅವುಗಳನ್ನು ಅವಲೋಕಿಸಿದರೆ ಪುರಾತನ ಕಾಲದ ಬೃಹತ್ ಗಾತ್ರದ ಪ್ರಾಣಿಯ ಅವಶೇಷದಂತೆ ಕಾಣುತ್ತದೆ’ ಎಂದು ಗ್ರಾಮ ಲೆಕ್ಕಾಧಿಕಾರಿ ನದಾಫ್ ತಿಳಿಸಿದರು.
ವಿವಿಧ ಗಾತ್ರದ ಅರೆಯುವ ಕಲ್ಲುಗುಂಡು, ಪ್ರಾಣಿಗಳ ಬೇಟೆಗೆ ಬಳಸುವ ಗುಂಡು, ಕೊಡಲಿಯಾಕಾರದ ಆಯುಧ, ಪ್ರಾಣಿಗಳ ಚರ್ಮ ಸುಲಿಯಲು ಬಳಸುವ ಆಯುಧ, ನೀರು ಸಂಗ್ರಹಿಸುವ ಹೂಜಿಯ ತುಂಡು ಹಾಗೂ ಮಣ್ಣಿನ ಪಾತ್ರೆಗಳ ಚೂರುಗಳೂ ಇವೆ.
‘ಇಲ್ಲಿ ಸಿಕ್ಕ ಮೂಳೆಗಳ ಮೇಲೆ ಗಾರೆಯಂತಹ ರಚನೆಗಳಿವೆ. ಬೂದಿದಿಬ್ಬವು ಅಪರೂಪದ, ಮಹತ್ವದ ಸ್ಥಳ. ಪ್ರಾಗೈತಿಹಾಸಿಕ ಕುರುಹು. ಇದರ ರಕ್ಷಣೆಗೆ ಸಂಬಂಧಪಟ್ಟವರು ಕ್ರಮ ಕೈಗೊಳ್ಳಬೇಕು’ ಎಂದು ಇತಿಹಾಸ ಸಂಶೋಧನಾರ್ಥಿ, ಉಪನ್ಯಾಸಕ ಮನೋಹರ ಸಿ.ಎಂ. ತಿಳಿಸಿದ್ದಾರೆ.
