ಕಂಪ್ಲಿ: ಕಾಲುವೆಯಲ್ಲಿ ಹೂಳು ತಪ್ಪದ ರೈತರ ಗೋಳು

ತುಂಗಭದ್ರಾ ಬಲದಂಡೆ ಮೇಲ್ಮಟ್ಟದ ಮುಖ್ಯ ಕಾಲುವೆಗೆ ಮತ್ತು ನಂ.2 ವಿತರಣಾ ನಾಲೆ ತೂಬಿಗೆ ಮಟ್ಟ ಸಮವಿಲ್ಲದ ಕಾರಣ ನಿಗದಿಪಡಿಸಿದ ನೀರು ಪೂರೈಕೆಯಾಗುತ್ತಿಲ್ಲ. ಈ ತಾಂತ್ರಿಕ ತೊಂದರೆ ಸರಿಪಡಿಸಲು ಅಧಿಕಾರಿಗಳು ಕ್ರಮ ಕೈಗೊಳ್ಳಬೇಕು. ಪ್ರಸ್ತುತ ಕಾಲುವೆಗೆ ನಿಗದಿಪಡಿಸಿರುವ ನೀರು ರೈತರಿಗೆ ಸಾಲುತ್ತಿಲ್ಲ. ಇಂಥ ಸಂದಿಗ್ಧ ಸ್ಥಿತಿಯಲ್ಲಿ ಇದೇ ಕಾಲುವೆಯಿಂದ ಕೆಲ ಗ್ರಾಮಗಳ ಕುಡಿಯುವ ನೀರಿಗಾಗಿ ಜೆಜೆಎಂ ಯೋಜನೆಯಡಿ ಕಾಲುವೆ ಬಳಿ ಕಾಮಗಾರಿ ನಿರ್ವಹಿಸಲಾಗುತ್ತಿದೆ. ಕೂಡಲೇ ಈ ಕಾಮಗಾರಿ ಸ್ಥಗಿತಗೊಳಿಸಿ ಪರ್ಯಾಯ ವ್ಯವಸ್ಥೆ ಕಂಡುಕೊಳ್ಳಬೇಕು. ನಂ.2 ವಿತರಣಾ ನಾಲೆಗೆ ಸದ್ಯ 40ಕ್ಯುಸೆಕ್ ನೀರು ಪೂರೈಕೆಯಾಗುತ್ತಿದ್ದು ಇನ್ನಷ್ಟು ಹೆಚ್ಚಿಸಬೇಕು. ಕಾಲುವೆ ಸಂಪೂರ್ಣ ದುರಸ್ತಿಗೆ ಕ್ರಿಯಾಯೋಜನೆ ಸಿದ್ಧಪಡಿಸಿಬೇಕು. ಅಲ್ಲಿಯವರೆಗೆ ಕನಿಷ್ಠ ದುರಸ್ತಿ ಜೊತೆಗೆ ಹೂಳು ಗಿಡಗಂಟೆಗಳನ್ನು ತೆರವುಗೊಳಿಸಬೇಕು.

ಕಂಪ್ಲಿ ಫಿರ್ಕಾದ ವಿವಿಧ ಕಾಲುವೆಗಳ ಲೈನಿಂಗ್ ಶಾಶ್ವತ ದುರಸ್ತಿಗೆ ₹ 76ಕೋಟಿ ಅಂದಾಜು ಸಿದ್ಧಪಡಿಸಿ ಸರ್ಕಾರಕ್ಕೆ ಪ್ರಸ್ತಾವ ಸಲ್ಲಿಸಿದ್ದೇನೆ. ವೈಯಕ್ತಿಕ ವೆಚ್ಚ ಭರಿಸಿ ಸದ್ಯ ನಂ.2 ವಿತರಣಾ ನಾಲೆ ವ್ಯಾಪ್ತಿಯಲ್ಲಿ ಬೆಳೆದಿರುವ ಗಿಡಗಂಟೆಗಳನ್ನು ಜೆಸಿಬಿಯಿಂದ ತೆರವುಗೊಳಿಸುವ ಕಾರ್ಯ ಮಾಡಿರುವೆ. –ಜೆ.ಎನ್. ಗಣೇಶ್ ಶಾಸಕ ಕಂಪ್ಲಿ ವಿಧಾನಸಭಾಕ್ಷೇತ್ರ ಸಹಕಾರ ಸಂಘ ರಚನೆಗೆ ಸೂಚನೆ ಕಾಲುವೆ ವ್ಯಾಪ್ತಿಯಲ್ಲಿ ಮೂರು ನೀರು ಬಳಕೆದಾರರ ಸಹಕಾರ ಸಂಘ ರಚಿಸಲು ಅವಕಾಶವಿದೆ. ರೈತರು ಸಂಘಟಿತರಾಗಿ ಸಂಘ ಅಸ್ತಿತ್ವಕ್ಕೆ ತಂದಲ್ಲಿ ಕಾಲುವೆ ನಿರ್ವಹಣೆಗೆ ಪ್ರತ್ಯೇಕ ಹಣ ದೊರೆಯಲಿದೆ. ಈ ಕುರಿತು ರೈತರಿಗೆ ಜಾಗೃತಿ ಮೂಡಿಸಲಾಗಿದೆ. –ಬಿ.ಚಂದ್ರಶೇಖರ್ ಸಹಾಯಕ ಎಂಜಿನಿಯರ್ ನೀರಾವರಿ ನಿಗಮ ಕಂಪ್ಲಿ ಕ್ರಿಯಾಯೋಜನೆ ಸಲ್ಲಿಕೆ ನಂ.2 ವಿತರಣಾ ನಾಲೆ ಮತ್ತು ಉಪ ಕಾಲುವೆಗಳ ಶಾಶ್ವತ ಲೈನಿಂಗ್ ಕಾಮಗಾರಿ ಮತ್ತು ತಾತ್ಕಾಲಿಕ ದುರಸ್ತಿಗೆ ಕ್ರಿಯಾಯೋಜನೆ ಸಿದ್ಧಪಡಿಸಿ ಸರ್ಕಾರಕ್ಕೆ ಸಲ್ಲಿಸಲಾಗಿದೆ. ಕಾಲುವೆಗಳಿಗೆ ಚರಂಡಿ ನೀರು ಬಿಡದಂತೆ ಮೆಟ್ರಿ ಗ್ರಾಮ ಪಂಚಾಯಿತಿಗೆ ನೋಟೀಸ್ ನೀಡಲಾಗಿದೆ.–ಎ.ಶ್ರೀನಿವಾಸ್ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್ ನೀರಾವರಿ ನಿಗಮ ಕಂಪ್ಲಿ