ಮಹದೇಶ್ವರ, ಮಂಟೇಸ್ವಾಮಿ ವರ್ಗರಹಿತ ಸಮಾಜ ಕಟ್ಟಿದ ಕ್ರಾಂತಿಕಾರರು: ಸಿದ್ದಲಿಂಗಯ್ಯ

ಚಾಮರಾಜನಗರ : ‘ಮಲೆ ಮಹದೇಶ್ವರ, ಮಂಟೇಸ್ವಾಮಿ ಅವರು ಕ್ರಾಂತಿಕಾರರು, ಬಂಡಾಯಗಾರರು. ಹಲವು ಶತಮಾನಗಳ ಹಿಂದೆಯೇ ವರ್ಗ, ವರ್ಣ ರಹಿತ ಕಟ್ಟಲು ಶ್ರಮಿಸಿದವರು. ಅಹಿಂದ ಸಮಾಜದ ಉದ್ಧಾರ ಮಾಡಿ ತೋರಿಸಿದವರು’ ಎಂದು ಕವಿ ಡಾ.ಸಿದ್ದಲಿಂಗಯ್ಯ ಅವರು ಬುಧವಾರ ಪ್ರತಿಪಾದಿಸಿದರು.

. ಅಖಿಲ ಕರ್ನಾಟಕ ಜಾನಪದ ಕಲಾವಿದ ಒಕ್ಕೂಟ, ಕರ್ನಾಟಕ ಜಾನಪದ ಪರಿಷತ್ತು ಹಾಗೂ ಡಾ.ಬಿ.ಆರ್.ಅಂಬೇಡ್ಕರ್ ಸ್ನಾತಕೋತ್ತರ ಕೇಂದ್ರದ ಸಂಯುಕ್ತ ಆಶ್ರಯದಲ್ಲಿ ನಡೆದ ‘ಕತ್ತಲ ರಾಜ್ಯದ ಜ್ಯೋತಿಗಳು ಮಲೆ ಮಹದೇಶ್ವರ ಮತ್ತು ಮಂಟೇಸ್ವಾಮಿ ಸಂಸ್ಕೃತಿ ಉತ್ಸವ’ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

. ‘ಈ ಇಬ್ಬರು ಶತಮಾನಗಳ ಹಿಂದೆಯೇ ಧಾರ್ಮಿಕ ಚೌಕಟ್ಟಿನಲ್ಲಿ ಕ್ರಾಂತಿ ಮಾಡಿದವರು. ಜಾತ್ಯತೀತ ಸಮಾಜವನ್ನು ಕಟ್ಟಲು ಇಬ್ಬರೂ ಶ್ರಮಿಸಿದರು. ಸಮಾಜದಲ್ಲಿರುವ ಅನೇಕ ವಿಷಯಗಳನ್ನು ಹೇಳಲು ನಾವು ಈಗಲೂ ಹಿಂಜರಿಯುತ್ತೇವೆ. ಆದರೆ, ಇವರಿಬ್ಬರೂ ಹಿಂದೆಯೇ ಅದನ್ನು ಹೇಳಿದ್ದರು’ ಎಂದರು.

. ‘ಇಬ್ಬರನ್ನು ಬುದ್ಧನೊಂದಿಗೆ ಹೋಲಿಸಬಹುದು. ಬುದ್ಧನ ರೀತಿಯಲ್ಲೇ ಇವರಲ್ಲೂ ಸೌಮ್ಯತೆ ಇದೆ. ಮೂವರೂ ನಿಂದನೆಯನ್ನೇ ಪ್ರಶಂಸೆಯಾಗಿ ಪರಿಗಣಿಸಿದವರು. ನಿಂದನೆಯಿಂದ ನೊಂದುಕೊಳ್ಳಲಿಲ್ಲ. ಜಾತ್ಯತೀತ ವಿಚಾರದಲ್ಲೂ ಹೋಲಿಕೆ ಇದೆ. ಮೂವರೂ ಜಾತಿಯನ್ನು ಪರಿಗಣಿಸಿರಲಿಲ್ಲ’ ಎಂದು ಸಿದ್ದಲಿಂಗಯ್ಯ ಅವರು ಅಭಿಪ್ರಾಯಪಟ್ಟರು.

. ನಿಜವಾಗುತ್ತಿದೆ ಕಾಲಜ್ಞಾನ: ‘ಮಂಟೇಸ್ವಾಮಿ ಅವರು ಅಂದಿನ ಕಾಲದಲ್ಲಿ ನುಡಿದ ಕಾಲಜ್ಞಾನ ಈಗ ನಿಜವಾಗುತ್ತಿದೆ. ಮೇಲು ಕೀಳಾಗುವುದು, ಕೀಳು ಮೇಲಾಗುವುದು ಎಂದು ಅವರು ಹೇಳಿದ್ದರು. ಈಗ ನೋಡಿ, ದೊಡ್ಡವರೆಲ್ಲ ಮೀಸಲಾತಿಗಾಗಿ ಹೋರಾಟುತ್ತಿದ್ದಾರೆ. ಕೆಳ ಸಮುದಾಯದವರು ದೊಡ್ಡ ದೊಡ್ಡ ಅಧಿಕಾರಿಗಳಾಗಿದ್ದಾರೆ’ ಎಂದರು.

. ‘ಮಹದೇಶ್ವರ, ಮಂಟೇಸ್ವಾಮಿ ಅವರು ದೇವರಂತೆ ಬದುಕಲಿಲ್ಲ. ಮನುಷ್ಯರಂತೆ ಬಾಳಿದರು. ಬೇರೆಯವರನ್ನು ಮನುಷ್ಯರನ್ನಾಗಿ ಮಾಡಿದರು’ ಎಂದು ಸಿದ್ದಲಿಂಗಯ್ಯ ಹೇಳಿದರು.

. ಜೀವಂತ ಸಂಸ್ಕೃತಿ: ಆಶಯ ನುಡಿಗಳನ್ನು ಆಡಿದ ಜಿಲ್ಲಾಧಿಕಾರಿ ಡಾ.ಎಂ.ಆರ್.ರವಿ ಅವರು, ‘ಮಲೆ ಮಹದೇಶ್ವರರು ಹಾಗೂ ಮಂಟೇಸ್ವಾಮಿ ಅವರು ನಮ್ಮ ಜೀವನದ ವ್ಯಕ್ತಿತ್ವದ ಭಾಗವಾಗಿದ್ದಾರೆ. ನೈಸರ್ಗಿಕವಾಗಿ, ಸಾಂಸ್ಕೃತಿಕವಾಗಿ ಶ್ರೀಮಂತವಾಗಿರುವ ಈ ಜಿಲ್ಲೆಯ ಮಣ್ಣಿನಲ್ಲಿ ಹಲವಾರು ದಾರ್ಶನಿಕರು ಜನಿಸಿದ್ದಾರೆ. ಇದು ಕೇವಲ ಕಾವ್ಯ, ಸಂಸ್ಕೃತಿಗೆ ಮಾತ್ರ ಮೀಸಲಾಗಿರಬಾರದು. ವಾರಸುದಾರರಾಗಿ ಮುಂದಿನ ಪೀಳಿಗೆಯವರಿಗೆ ತೆಗೆದುಕೊಂಡು ಹೋಗಬೇಕಿದೆ’ ಎಂದರು.

. ‘ಇದೊಂದು ವಿಸ್ಮಯಕಾರಿ ಜಿಲ್ಲೆ. 25 ವರ್ಷಗಳಿಂದ ನಡೆಯುತ್ತಿರುವ ಸಾಂಸ್ಕೃತಿಕ ತಲ್ಲಣಗಳ ನಡುವೆಯೂ ಸಂಸ್ಕೃತಿ ಜೀವಂತವಾಗಿದೆ ಎಂದರೆ ಇಲ್ಲಿನ ಪರಂಪರೆ ಎಷ್ಟು ಬಲಿಷ್ಠವಾಗಿದೆ ಎಂಬುದು ಗೊತ್ತಾಗುತ್ತದೆ’ ಎಂದು ಹೇಳಿದರು.

. ಜಾನಪದ ವಿದ್ವಾಂಸ ಡಾ. ಕೃಷ್ಣಮೂರ್ತಿ ಹನೂರು ಅವರು ಮಾತನಾಡಿ, ‘ಜನಪದೀಯರಿಗೆ ಅಕ್ಷರ ಜ್ಞಾನ ಇಲ್ಲದಿದ್ದರೂ, ಮಹಾಕಾವ್ಯಗಳನ್ನು ಸೃಷ್ಟಿಸುತ್ತಾರೆ ಎಂದರೆ ಅವರಲ್ಲಿ ಅದೇನು ಶಕ್ತಿ ಅಡಗಿದೆ’ ಎಂದು ಅಚ್ಚರಿ ಪಟ್ಟರು.

. ಸಾಹಿತಿ ಡಾ.ಕಾ.ವೆಂ.ಶ್ರೀನಿವಾಸಮೂರ್ತಿ ಅವರು ಮಾತನಾಡಿ, ‘ಮಹದೇಶ್ವರ ಕಾವ್ಯ ಶಿಷ್ಟ ಕಾವ್ಯ ಅಲ್ಲ. ವಿವಿಧ ರಾಮಾಯಣಗಳ ರೀತಿಯಲ್ಲಿ ಅನೇಕ ಮಹದೇಶ್ವರ ಕಾವ್ಯಗಳಿವೆ. ಈ ಕಾವ್ಯವು ಸಾಹಿತ್ಯ, ಜಾನಪದ, ಸಾಂಸ್ಕೃತಿಕ, ಪುರಾಣ, ಚರಿತ್ರೆಯ ಆಯಾಮಗಳನ್ನು ಹೊಂದಿವೆ’ ಎಂದು ಹೇಳಿದರು.

. ‘ದೇವರು ಆಗುವುದು ಸುಲಭ. ಆದರೆ ಮನುಷ್ಯರು ಆಗುವುದು ಕಷ್ಟ.ಯಾರು ಮನುಷ್ಯರಾಗಲು ಹೋಗುತ್ತಾರೋ ಅವರೆಲ್ಲ ದೇವರಾಗುತ್ತಾರೆ. ಮಹದೇಶ್ವರರು ಹಾಗೂ ಮಂಟೇಸ್ವಾಮಿ ಅವರು ಮನುಷ್ಯರಾದರು’ ಎಂದರು.

. ಸನ್ಮಾನ: ಕಾರ್ಯಕ್ರಮದಲ್ಲಿ ಕೇಂದ್ರ ಸಾಹಿತ್ಯ ಅಕಾಡೆಮಿಯ ಯುವ ಪುರಸ್ಕಾರಕ್ಕೆ ಆಯ್ಕೆಯಾಗಿರುವ ಸಾಹಿತಿ ಸ್ವಾಮಿ ಪೊನ್ನಾಚಿ ಅವರನ್ನು ಇದೇ ಸಂದರ್ಭದಲ್ಲಿ ಸನ್ಮಾನಿಸಲಾಯಿತು.

. ಸ್ನಾತಕೋತ್ತರ ಕೇಂದ್ರದ ನಿರ್ದೇಶಕ ಡಾ.ಶಿವಬಸವಯ್ಯ ಅವರು ಮಾತನಾಡಿದರು.

. ಎಂ.ಕೆ.ಸಿದ್ದರಾಜು, ದೊಡ್ಡಗವಿ ಬಸಪ್ಪ, ಸಣ್ಣ ಶೆಟ್ಟಿ, ನಿಂಗಶೆಟ್ಟಿ, ಬಿ.ಬಸವರಾಜು, ಅರುಣ್ಕುಮಾರ್, ಗೌರಮ್ಮ ಸೇರಿದಂತೆ ಹಲವು ಕಲಾವಿದರು ಜಾನಪದ ಗಾಯನ ಪ್ರಸ್ತುತ ಪಡಿಸಿದರು.

. ಶರಣ ಸಾಹಿತ್ಯ ಪರಿಷತ್ತಿನ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಬಿ.ಕೆ.ರವಿಕುಮಾರ್, ಅಖಿಲ ಕರ್ನಾಟಕ ಜಾನಪದ ಕಲಾವಿದರ ಒಕ್ಕೂಟದ ರಾಜ್ಯಾಧ್ಯಕ್ಷ ಜೋಗಿಲ ಸಿದ್ದರಾಜು, ರಾಜ್ಯ ಪ್ರಧಾನ ಕಾರ್ಯದರ್ಶಿ ಹಾಗೂ ಜಿಲ್ಲಾ ಜಾನಪದ ಪರಿಷತ್ತಿನ ಜಿಲ್ಲಾ ಅಧ್ಯಕ್ಷ ನರಸಿಂಹಮೂರ್ತಿ ಇದ್ದರು.

. ನೋಡುವವನ ದೃಷ್ಟಿಯಲ್ಲಿ ಬೆಳಕು –ಕತ್ತಲೆ: ಸುತ್ತೂರು ಶ್ರೀ

. ಸಾನ್ನಿಧ್ಯ ವಹಿಸಿದ್ದ ಸುತ್ತೂರು ಮಠದ ಶಿವರಾತ್ರಿ ದೇಶೀ ಕೇಂದ್ರ ಸ್ವಾಮೀಜಿ ಅವರು ಮಾತನಾಡಿ, ‘ನೋಡುವವರಲ್ಲಿ ಅಂತರಂಗ ದೃಷ್ಟಿ ಇದ್ದರೆ, ಜಗತ್ತಿನಲ್ಲಿ ಬೆಳಕು ಕಾಣುತ್ತದೆ. ಅಂತರಂಗದ ದೃಷ್ಟಿ ಸರಿ ಇಲ್ಲದಿದ್ದರೆ ಬೆಳಕು ಇದ್ದರೂ ಕತ್ತಲು ಕಾಣುತ್ತದೆ’ ಎಂದು ಹೇಳಿದರು.

. ಸ್ನಾತಕೋತ್ತರ ಕೇಂದ್ರದ ಸುತ್ತಮುತ್ತಲಿನ ವಾತಾವರಣದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ ಅವರು, ‘ಚಾಮರಾಜನಗರದಲ್ಲಿರುವ ಗದ್ದಲ ಇಲ್ಲಿಲ್ಲ. ಪ್ರಶಾಂತ ವಾತಾವರಣ ಇದೆ. ಇಲ್ಲಿ ನೀಲಗಿರಿ ತೋಪು ಕಾಣಿಸುತ್ತಿದೆ. ಅದನ್ನು ತೆರವುಗೊಳಿಸಿ, ಉತ್ತಮ ಆಮ್ಲಜನಕ ಹೊರಸೂಸುವ ದೇಸಿ ಗಿಡಗಳನ್ನು ನೆಟ್ಟು ಪೋಷಿಸಬೇಕು’ ಎಂದು ಸಲಹೆ ನೀಡಿದರು.

. ಸ್ನಾತಕೋತ್ತರ ಕೇಂದ್ರದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಹೆಣ್ಣು ಮಕ್ಕಳು ಶಿಕ್ಷಣ ಪಡೆದು, ಉತ್ತಮ ಸಾಧನೆ ಮಾಡುತ್ತಿರುವುದನ್ನು ಅವರು ಶ್ಲಾಘಿಸಿದರು.

. ಸಂಶಯವಾದಿಯಾಗಿದ್ದೇನೆ: ಸಿದ್ದಲಿಂಗಯ್ಯ

. ‘ನಾಸ್ತಿಕನಾಗಿರುವ ನಾನು ಆರಂಭದಲ್ಲಿ ಮಂಟೇಸ್ವಾಮಿಯ ಬಗ್ಗೆ ಹೆಚ್ಚು ಆಸಕ್ತಿ ಹೊಂದಿರಲಿಲ್ಲ. ಅವರ ಬಗ್ಗೆ ತಿಳಿದುಕೊಂಡ ನಂತರ ಇಷ್ಟಪಡಲು ಆರಂಭಿಸಿದ್ದೇನೆ. ಈಗ ನಾನು ಸಂಶಯವಾದಿಯಾಗಿದ್ದೇನೆ. ಮೊದಲಿನ ರೋಷ ದ್ವೇಷ ಈಗ ಇಲ್ಲ’ ಎಂದು ಸಿದ್ದಲಿಂಗಯ್ಯ ಅವರು ಹೇಳಿದರು.

. ಈ ಮಾತಿಗೆ ತಮ್ಮ ಭಾಷಣದಲ್ಲಿ ಪ್ರತಿಕ್ರಿಯಿಸಿದ ಸುತ್ತೂರು ಶ್ರೀಗಳು, ‘ಮನುಷ್ಯ ಅನುಭವದಲ್ಲಿ ಶ್ರೀಮಂತನಾದಾಗ, ಅವನಲ್ಲಿನ ಅಭಿಪ್ರಾಯ ಬದಲಾಗುತ್ತಾ ಇರುತ್ತದೆ’ ಎಂದು ಹೇಳಿದರು.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಮಹದೇಶ್ವರ, ಮಂಟೇಸ್ವಾಮಿ ವರ್ಗರಹಿತ ಸಮಾಜ ಕಟ್ಟಿದ ಕ್ರಾಂತಿಕಾರರು: ಸಿದ್ದಲಿಂಗಯ್ಯ

ಚಿನಕುರುಳಿ | ಶುಕ್ರವಾರ, 15 ನವೆಂಬರ್ 2024

ಚುರುಮುರಿ | ಬೊಂಬೆ ಆಡ್ಸೋನು...

ವಾರಕ್ಕೆ 70 ಗಂಟೆ ಕೆಲಸ | ಉಸಿರಿರುವವರೆಗೂ ಅದನ್ನೇ ಹೇಳೋದು: ನಾರಾಯಣ ಮೂರ್ತಿ

ಹೊಂಬಾಳೆ ಫಿಲ್ಮ್ಸ್‌ ವತಿಯಿಂದ ಫ್ಯಾಂಟಸಿ ಸಿನಿಮಾ?

ಮಿನಿ ಒಲಿಂಪಿಕ್ಸ್‌: ಸಮರ್ಥ್‌ಗೆ ಮೂರು ಚಿನ್ನ

14 ವರ್ಷದೊಳಗಿನ ರಾಜ್ಯಮಟ್ಟದ ಅಥ್ಲೆಟಿಕ್ಸ್: ಪೂಜಾ, ಪ್ರೀತಮ್ ವೇಗದ ಓಟಗಾರರು

ಪ್ರೊ ಕಬಡ್ಡಿ: ಪಟ್ನಾ ಪೈರೇಟ್ಸ್‌ಗೆ ಜಯ

IND vs SA 4th T20I | ಸೂರ್ಯಕುಮಾರ್ ಯಾದವ್ ಬಳಗಕ್ಕೆ ಸರಣಿ ಜಯ

ಒಳನೋಟ: ದಾಂಪತ್ಯ ಸಾಂಗತ್ಯಗಳ ಸುತ್ತ

ಒಳನೋಟ | ಹೆಜ್ಜೆ ಹೆಜ್ಜೆಗೂ ಎಸ್‌ಐಟಿ ತನಿಖೆ

ಒಳನೋಟ | ‘ಅಕ್ರಮ ವಲಸೆ’: ನೆಲೆ ವಿಸ್ತಾರ

ಒಳನೋಟ | ಸಮ್ಮೇಳನಾಧ್ಯಕ್ಷತೆ: ‘ರಾಜಕೀಯ’ ಗುಂಗು

ಚಿನಕುರುಳಿ | ಶುಕ್ರವಾರ, 15 ನವೆಂಬರ್ 2024

ಚುರುಮುರಿ | ಬೊಂಬೆ ಆಡ್ಸೋನು...

ವಾರಕ್ಕೆ 70 ಗಂಟೆ ಕೆಲಸ | ಉಸಿರಿರುವವರೆಗೂ ಅದನ್ನೇ ಹೇಳೋದು: ನಾರಾಯಣ ಮೂರ್ತಿ

ಹೊಂಬಾಳೆ ಫಿಲ್ಮ್ಸ್‌ ವತಿಯಿಂದ ಫ್ಯಾಂಟಸಿ ಸಿನಿಮಾ?