ಚಿಕ್ಕಮಗಳೂರು | ಮುನ್ನೆಚ್ಚರಿಕೆ ಕೊರತೆ: ಅಪಘಾತ ನಿರಂತರ

ನರಸಿಂಹರಾಜಪುರ: ತಾಲ್ಲೂಕಿನ ವ್ಯಾಪ್ತಿಯಲ್ಲಿ ಪದೇ ಪದೇ ಅಪಘಾತ ಸಂಭವಿಸುವ ಸ್ಥಳಗಳನ್ನು ಪೊಲೀಸ್ ಇಲಾಖೆ ಗುರುತು ಮಾಡಿದೆ.  ಪ್ರಮುಖವಾಗಿ ಪಟ್ಟಣದ ಅಗ್ರಹಾರ ರಸ್ತೆ ಶಿವಮೊಗ್ಗ ಮುಖ್ಯ ರಸ್ತೆಯಲ್ಲಿನ ಕರಗುಂದ ಗ್ರಾಮದ ಬಳಿ ಇಳಿಜಾರಿನಿಂದ ಕೂಡಿರುವ ರಸ್ತೆ ಮುತ್ತಿನಕೊಪ್ಪ ಗ್ರಾಮದ ವ್ಯಾಪ್ತಿಯ ಎಸ್‌ಇಡಬ್ಲ್ಯೂ ಕಚೇರಿಯ ಮುಂಭಾಗದ ಮುಖ್ಯ ರಸ್ತೆಯಿಂದ ಸಂಜೀವಿನಿ ಶಾಲೆಯ ಮುಂಭಾಗದ ರಸ್ತೆಯವರೆಗೆ ಇದೇ ವ್ಯಾಪ್ತಿಯ ಮುಖ್ಯ ರಸ್ತೆಗೆ ನಿರ್ಮಿಸಿರುವ ಕಿರಿದಾಗಿ ರುವ ಸೇತುವೆ ಗುಬ್ಬಿಗಾ ಗ್ರಾಮದ ವ್ಯಾಪ್ತಿಯಲ್ಲಿರುವ ತಿರುವಿನಬಿಂದ ಕೂಡಿರುವ ರಸ್ತೆಯ ವ್ಯಾಪ್ತಿಯನ್ನು ಪದೇ ಪದೇ ಅಪಘಾತ ಸಂಭವಿಸುತ್ತಿರುವ ಸ್ಥಳಗಳು ಎಂದು ಗುರುತಿಸಲಾಗಿದೆ. ಅಪಘಾತ ಸ್ಥಳಗಳಲ್ಲಿ ಎಚ್ಚರಿಕೆಯ ನಾಮಫಲಕಗಳು ರಿಪ್ಲೆಕ್ಟರ್ ದೀಪಗಳನ್ನು ಅಳವಡಿಸುವಂತೆ ಲೋಕೋಪಯೋಗಿ ಇಲಾಖೆಗೆ ಪತ್ರ ಬರೆಯಲಾಗಿದೆ. ಕೆಲವು ಕಡೆ ಎಚ್ಚರಿಕೆ ನಾಮಫಲಕಗಳು ಅಳವಡಿಸುವ ಆಗಿದೆ. ಮೆಣಸೂರು ಗ್ರಾಮದಲ್ಲಿ ಬೈಪಾಸ್‌ ರಸ್ತೆಗೆ ವೃತ್ತ ನಿರ್ಮಾಣ ಮಾಡಲಾಗಿದೆ. ಮಳೆಗಾಲದಲ್ಲಿ ಅಲ್ಲಲ್ಲಿ ರಸ್ತೆಗಳಲ್ಲಿ ಗುಂಡಿಗಳು ಬಿದ್ದು ಅಪಘಾತ ಸಂಭವಿಸಬಹುದು ಎಂದು ಇಲಾಖೆ ಅಂದಾಜು ಮಾಡಿದೆ. ರಸ್ತೆ ಅಪಘಾತಗಳನ್ನು ತಡೆಗಟ್ಟಲು ಪೊಲೀಸ್ ಇಲಾಖೆಯಿಂದ ಜನರಿಗೆ ಅರಿವು ಮೂಡಿಸಲು ಪಟ್ಟಣ ಮತ್ತು ಗ್ರಾಮ ಮಟ್ಟದಲ್ಲೂ ರಸ್ತೆ ಸುರಕ್ಷತಾ ಸಪ್ತಾಹ ಆಚರಿಸಲಾಗಿದೆ ಎಂದು ಪೊಲೀಸರು ಹೇಳುತ್ತಾರೆ.

ಕೊಪ್ಪ: ತಾಲ್ಲೂಕಿನ ಮೂಲಕ ಹಾದು ಹೋಗುವ ರಾಷ್ಟ್ರೀಯ ಹೆದ್ದಾರಿ 169(ಮಂಗಳೂರು–ಶಿವಮೊಗ್ಗ) ಹಾಗೂ ಮಲ್ಪೆ ಮೊಳಕಾಲ್ಮೂರು ರಾಜ್ಯ ಹೆದ್ದಾರಿ 65ರಲ್ಲಿ ಹಲವು ಅಪಾಯಕಾರಿ ತಿರುವುಗಳಿದ್ದು ಆಗಾಗ ಅಪಘಾತಕ್ಕೆ ಸಂಭವಿಸುತ್ತಿವೆ. ನಾಗಲಾಪುರ ಬಳಿ ರಾಷ್ಟ್ರೀಯ ಹೆದ್ದಾರಿ 169ನಲ್ಲಿ ಹರಿಹರಪುರ ಕಡೆಯಿಂದ ಕೊಪ್ಪ ಕಡೆಗೆ ಸಾಗಿ ಬರುವಾಗ ತುಂಗಾ ನದಿ ಸೇತುವೆಯಿಂದ ಸುಮಾರು 1 ಕಿ.ಮೀ. ದೂರ ನೇರ ರಸ್ತೆಯಿದ್ದು ಸಿಗದಾಳು ಸಂಪರ್ಕಿಸುವಲ್ಲಿ ಸಿಗುವ ತಿರುವಿನಲ್ಲಿ ಅಪಘಾತ ಮರುಕಳಿಸಿವೆ. ಶೃಂಗೇರಿ ಕಡೆಗೆ ಹೋಗುವಾಗ ಸುರುಳಿ ವ್ಯಾಪ್ತಿಯಲ್ಲಿ ಅಪಘಾತ ಮರುಕಳಿಸಿವೆ. ಪಟ್ಟಣದಿಂದ ಎನ್.ಆರ್.ಪುರ ಕಡೆಗೆ ಹೋಗುವ ಮಾರ್ಗ ಮಧ್ಯೆ ತಲಮಕ್ಕಿ ಬಳಿ ಸುಮಾರು 1 ಕಿ.ಮೀ. ದೂರ ನೇರ ರಸ್ತೆಯಿದ್ದು ಗ್ರಾಮದ ಪರಿಮಿತಿಯಲ್ಲಿ ವೇಗ ನಿಯಂತ್ರಣಕ್ಕೆ ಬಾರದೆ ಆಗಾಗ್ಗೆ ಅಪಘಾತ ಮರುಕಳಿಸಿವೆ. ಮಲೆನಾಡು ಪ್ರದೇಶ ಆಗಿರುವುದರಿಂದ ಇಲ್ಲಿ ಏಕಾಏಕಿ ಸಿಗುವ ತಿರುವಿನಲ್ಲಿ ವಾಹನ ನಿಯಂತ್ರಣಕ್ಕೆ ಬಾರದೇ ಅಪಘಾತ ಸಂಭವಿಸಿವೆ. ಬಹುತೇಕ ರಸ್ತೆ ತಿರುವಿನ ಬಗ್ಗೆ ಸರಿಯಾದ ಸೂಚನಾ ಫಲಕವಿಲ್ಲ. ವೇಗ ನಿಯಂತ್ರಣಕ್ಕೆ ಸಮರ್ಪಕ ಕ್ರಮ ಕೈಗೊಂಡಿಲ್ಲ ಎಂದು ಸ್ಥಳೀಯರು ಹೇಳುತ್ತಾರೆ.

ಕಡೂರು: ಪಟ್ಟಣದಲ್ಲಿ ಗುರುತಿಸಿರುವ ಎರಡು ಬ್ಲಾಕ್ ಸ್ಪಾಟ್‌ಗಳ ಜೊತೆ ಪದೇ ಪದೇ ಅಫಘಾತ ಸಂಭವಿಸುತ್ತಿರುವ ಕೆಲ ಜಾಗಗಳಲ್ಲಿ ಪ್ರಾಣಹಾನಿ ಸಂಭವಿಸುತ್ತಿವೆ. ಪಟ್ಟಣದ ವ್ಯಾಪ್ತಿಯಲ್ಲಿ ಕೆ.ಎಲ್‌.ವಿ. ವೃತ್ತದಿಂದ ಬಸವೇಶ್ವರ ವೃತ್ತ ಮತ್ತು ಅನ್ನಪೂರ್ಣ ಕ್ಯಾಸಲ್‌ನಿಂದ ಮಸಾಲ ಡಾಬಾ ತನಕ ಬ್ಲಾಕ್ ಸ್ಪಾಟ್ ಎಂದು ಗುರುತಿಸಲಾಗಿದೆ. ಆದರೆ ಅವುಗಳ ಸುಧಾರಣೆ ಇನ್ನೂ ಆಗಿಲ್ಲ. ಎರಡು ರಾಷ್ಟ್ರೀಯ ಹೆದ್ದಾರಿಗಳು ಸೇರುವ ಬಸವೇಶ್ವರ ವೃತ್ತದ ಬಳಿ ವಾಹನ ಚಾಲಕರಿಗೆ ಗೊಂದಲವಾಗುವ ರೀತಿ ರಸ್ತೆ ವಿಭಜಕಗಳಿವೆ. ಯಾವ ಕಡೆ ಚಲಿಸಬೇಕೆಂದು ತಿಳಿಯದೆ ಅಫಘಾತಗಳಾಗುವ ಸಂಭವವಿರುವುದರಿಂದ ಈ ಜಾಗದಲ್ಲಿ ಸಂಚಾರ ನಿಯಮ ಪಾಲನೆ ಕಡ್ಡಾಯಗೊಳಿಸಬೇಕಿದೆ. ಬಸವೇಶ್ವರ ವೃತ್ತದಿಂದ ಕೆ.ಎಲ್.ವಿ.ವೃತ್ತದ ತನಕ ರಸ್ತೆ ಬದಿಯಲ್ಲಿ ಸದಾ ಲಾರಿಗಳು ಕ್ರೇನ್‌ಗಳನ್ನು ನಿಲ್ಲಿಸಿರುವುದರಿಂದಲೂ ಫಘಾತಗಳ ಸಂಭವ ಹೆಚ್ಚಿದೆ. ಬಿ.ಎಚ್. ರಸ್ತೆಯಿಂದ ಪಂಚನಹಳ್ಳಿಗೆ ಹೋಗುವ ಮರವಂಜಿ ರಸ್ತೆಯಲ್ಲಿರುವ ಅಂಬೇಡ್ಕರ್ ವೃತ್ತ ಸಹ ಅಫಘಾತ ವಲಯವೆಂದು ಗುರುತಿಸಿದ್ದು ಅಲ್ಲಿಯೂ ಸೂಚನಾ ಫಲಕ ಅಳವಡಿಸಬೇಕಿದೆ. ತಾಲ್ಲೂಕಿನ ಮರವಂಜಿ ರಸ್ತೆಯ ರಾಜ್ಯ ಹೆದ್ದಾರಿಯಲ್ಲಿ ವೇದಾವತಿ ನದಿ ಸೇತುವೆಗೆ ಮುನ್ನ ಒಂದು ಅಪಾಯಕಾರಿ ತಿರುವಿದೆ. ರಸ್ತೆಯ ಎರಡೂ ಬದಿ ಗಿಡಗಳು ದಟ್ಟವಾಗಿರುವುದರಿಂದ ಈ ತಿರುವಿನಲ್ಲಿ ವಾಹನಗಳು ಮುಖಾಮುಖಿ ಡಿಕ್ಕಿಯಾಗುವ ಸಾಧ್ಯತೆ ಹೆಚ್ಚಿದೆ. ಈ ಸ್ಥಳದಲ್ಲಿ ರೋಟರಿ ಕ್ಲಬ್ ಅಳವಡಿಸಿರುವ ಅಫಘಾತ ವಲಯ ಎಂಬ ಬೋರ್ಡ್ ಬಿಟ್ಟರೆ ಮತ್ತೇನೂ ಇಲ್ಲ. ಈ ಗಿಡಗಳನ್ನು ತೆರವುಗೊಳಿಸುವ ಕಾರ್ಯವಾಗಬೇಕಿದೆ. ಪಟ್ಟಣದ ಹೊರ ವಲಯದ ಮತಿಘಟ್ಟ ಬಳಿ‌ ಪದೇ ಪದೇ ಅಫಘಾತಗಳು ಸಂಭವಿಸುತ್ತಿವೆ. ಈ ಜಾಗದಲ್ಲಿ ಸಂಚಾರ ನಿಯಮ ಪಾಲನೆಗೆ ಪೊಲೀಸರು ಕಡ್ಡಾಯ ಕ್ರಮ ಕೈಗೊಂಡರೆ ಅಫಘಾತಗಳನ್ನು ತಪ್ಪಿಸಬಹುದು ಎಂಬುದು ಸ್ಥಳೀಯರ ಅಭಿಪ್ರಾಯ.

ತರೀಕೆರೆ: ಪಟ್ಟಣದಲ್ಲಿ ಹಾದೂ ಹೋಗಿರುವ ರಾಷ್ಟ್ರೀಯ ಹೆದ್ದಾರಿ ಕೊಡಿಕ್ಯಾಂಪ್ ವೃತ್ತ ಮೆಟ್ರೊ ಸರ್ಕಲ್ ನ್ಯಾಯಾಲಯದ ಮುಂಭಾಗದ ರಸ್ತೆಯಲ್ಲಿ ಅಪಘಾತಗಳು ಹೆಚ್ಚಾಗುತ್ತಿವೆ. ರಾಷ್ಟ್ರೀಯ ಹೆದ್ದಾರಿ 206 ಅರಮನೆ ಹೋಟೆಲ್ ಸಮೀಪ ವರ್ಷಕ್ಕೆ ಐದಕ್ಕೂ ಹೆಚ್ಚು ಅಪಘಾತಗಳು ಸಂಭವಿಸುತ್ತಿದ್ದು ಈ ಸ್ಥಳವನ್ನು ಬ್ಲಾಕ್ ಸ್ಪಾಟ್ ಎಂದು ಗುರುತಿಸಿ ಮುಂದಿನ ಕ್ರಮಕ್ಕೆ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರಕ್ಕೆ ಪತ್ರ ಬರೆಯಲಾಗಿದೆ ಎಂದು ಪೋಲಿಸರು ತಿಳಿಸಿದ್ದಾರೆ. ಪಟ್ಟಣದಲ್ಲಿ ಹಾದು ಹೋಗಿರುವ ರಾಷ್ಟ್ರೀಯ ಹೆದ್ದಾರಿ ಅಗಲಗೊಳಿಸಿ ವಿಭಜಕಗಳನ್ನು ಅಳವಡಿಸಿದರೆ ಅಪಘಾತಗಳು ತಪ್ಪಲಿವೆ. ಈ ಕೆಲಸ ಆಗಬೇಕು ಎಂದು ಆಮ್ ಆದ್ಮಿ ಸಂಚಾಲಕ ಸುರೇಶ್ ಒತ್ತಾಯಿಸಿದರು.