ಮಂಗಳೂರು: ಶೇ 40ರಷ್ಟು ಪ್ರದೇಶಕ್ಕೆ ಒಳಚರಂಡಿ ಮರೀಚಿಕೆ

‘ಹಸಿರು ನ್ಯಾಯ ಮಂಡಳಿಯ ಆದೇಶದ ಮೇರೆಗೆ ಸರ್ಕಾರವು ನಗರದ ಒಳಚರಂಡಿ ಜಾಲದ ಲೋಪಗಳನ್ನು ಬಗೆಹರಿಸಲು  ₹ 40 ಕೋಟಿ ಅನುದಾನ ಒದಗಿಸುವ ಭರವಸೆ ನೀಡಿದೆ. ಇದರ ಸಮಗ್ರ ಯೋಜನಾ ವರದಿಯನ್ನು ಸಿದ್ಧಪಡಿಸಲಾಗುತ್ತಿದೆ. ಒಳಚರಂಡಿಯ ಮುಖ್ಯ ಕೊಳವೆ ಇರುವಲ್ಲೆಲ್ಲ ಕಾಂಕ್ರೀಟ್‌ ಆಳುಗುಂಡಿ ನಿರ್ಮಾಣ ಹಳೆ ಕೊಳವೆ ಮಾರ್ಗಗಳು ಕಟ್ಟಿಕೊಳ್ಳುವ ಕಡೆ ಹೊಸ ಕೊಳವೆ ಅಳವಡಿಸಲಾಗುತ್ತದೆ ಎಂದು ಪಾಲಿಕೆ ಮೂಲಗಳು ತಿಳಿಸಿವೆ.  'ಕೆಲವೆಡೆ ವೆಟ್‌ವೆಲ್‌ ವಿದ್ಯುತ್‌ ಪರಿಕರ ಹಾಗೂ ಯಂತ್ರಗಳ ಕಾರ್ಯಕ್ಷಮತೆ ಕಡಿಮೆ ಇತ್ತು. ಸ್ಮಾರ್ಟ್‌ ಸಿಟಿ ಯೋಜನೆ ಅಡಿ ಪಾಂಡೇಶ್ವರ ಕುದ್ರೋಳಿ ಕೊಡಿಯಾಲ್‌ಗುತ್ತು ಕಡೆಕಾರ್‌ಗಳಲ್ಲಿ ವೆಟ್‌ವೆಲ್‌ಗಳ ವಿದ್ಯುತ್‌ ಯಂತ್ರಗಳ ಕ್ಷಮತೆ ಹೆಚ್ಚಿಸಲು ₹ 14 ಕೋಟಿ ವೆಚ್ಚದ ಕಾಮಗಾರಿ ಟೆಂಡರ್‌ ಆಗಿ ಕಾರ್ಯಾದೇಶ ನೀಡಲಾ‌ಗಿದೆ. ಮೂರು ತಿಂಗಳಲ್ಲಿ ಕಾಮಗಾರಿ ಪೂರ್ಣಗೊಳ್ಳುವ ನಿರೀಕ್ಷೆ ಇದೆ. ಅಂಗಾರಗುಂಡಿ ಕುಡುಂಬೂರು ಪ್ರದೇಶಗಳಲ್ಲಿ ಒಳಚರಂಡಿ ಜಾಲ ಸುಧಾರಣೆಯ  ₹ 19 ಕೋಟಿ ವೆಚ್ಚದ ಈ ಪ್ರಸ್ತಾವಕ್ಕೆ ಸರ್ಕಾರರಿಂದ ಇನ್ನೂ ಮಂಜೂರಾತಿ ಸಿಕ್ಕಿಲ್ಲ' ಅಧಿಕಾರಿಯೊಬ್ಬರು ಮಾಹಿತಿ ನೀಡಿದರು.

‘ನಗರದಲ್ಲಿ ಬಾಕಿ ಉಳಿದ ಶೇ 40ರಷ್ಟು ಪ್ರದೇಶಗಳಿಗೆ ಒಳಚರಂಡಿ ಸಂಪರ್ಕ ಕಲ್ಪಿಸಲು ಏನಿಲ್ಲವೆಂದರೂ ₹ 350 ಕೋಟಿ ಅನುದಾನ ಬೇಕು. ಸದ್ಯಕ್ಕೆ ಅಷ್ಟು ಅನುದಾನ ಹೊಂದಿಸುವುದು ಕಷ್ಟ. ಅದರಲ್ಲೂ ಸರಿಪಲ್ಲ ಅಳಪೆಯಂತಹ ಕಡೆ ಬೆಟ್ಟಗುಡ್ಡಗಳ ನಡುವೆ ಒಳಚರಂಡಿ ಜಾಲ ನಿರ್ಮಿಸಬೇಕಾಗುತ್ತದೆ. ಕೆಲವೆಡೆ ವೆಟ್‌ವೆಲ್‌ಗಳನ್ನು 25 ಅಡಿಗಳಿಗೂ ಹೆಚ್ಚು ಆಳದವರೆಗೆ ನಿರ್ಮಿಸಬೇಕಾಗುತ್ತದೆ. ಇದು ಪ್ರಾಯೋಗಿಕವಾಗಿ ಕಷ್ಟಸಾಧ್ಯ’ ಎಂದು ಅಧಿಕಾರಿಯೊಬ್ಬರು ವಿವರಿಸಿದರು.

ಒಳಚರಂಡಿ ಜಾಲಕ್ಕೆ ಶೌಚನೀರನ್ನು ಶುದ್ಧೀಕರಿಸದೆಯೇ ಕೆಲವು ಅಪಾರ್ಟ್‌ಮೆಂಟ್‌ ಸಮುಚ್ಚಯಗಳು ಹರಿಯಬಿಡುತ್ತಿವೆ. ಎಸ್‌ಟಪಿ ಇದ್ದರೂ ಅವುಗಳನ್ನು ಬಳಸುತ್ತಿಲ್ಲ. ಅವುಗಳನ್ನು ಪತ್ತೆ ಹಚ್ಚಿ ನೋಟಿಸ್‌ ನೀಡಲು ಕಾರ್ಯಪಡೆಯನ್ನು ರಚಿಸಲಿದ್ದೇವೆ. ಅಪಾರ್ಟ್‌ಮೆಂಟ್‌ ಸಮುಚ್ಚಯಗಳಿಗೆ ನೆರವಾಗುವುದು ಈ ಕಾರ್ಯಪಡೆಯ ಉದ್ದೇಶವೇ ಹೊರತು ದಂಡ ವಿಧಿಸುವುದಲ್ಲ.  ಎಸ್‌ಟಿಪಿ ಚಲಾವಣೆಯ ಸ್ಥಿತಿಯಲ್ಲಿಟ್ಟುಕೊಳ್ಳಲು ತಾಂತ್ರಿಕ ಕಾರಣಗಳಿಂದಾಗಿ ಸಮಸ್ಯೆ ಎದುರಾದರೆ ಕಾರ್ಯಪಡೆ ಅವರ ನೆರವಿಗೆ ಧಾವಿಸಲಿದೆ ಎಂದು ಆಯುಕ್ತರು ತಿಳಿಸಿದರು.