ಕರಾವಳಿಯೆಲ್ಲೆಡೆ ಶಾರದೆಯ ಆರಾಧನೆ

ಬೆಳ್ತಂಗಡಿಯ ಶಾರದೋತ್ಸವಕ್ಕೆ ಈ ಸಲ 46ರ ಸಂಭ್ರಮ. ಮಾಜಿ ಶಾಸಕ ಕೆ ವಸಂತ ಬಂಗೇರ ಅವರ ಗೌರವಾಧ್ಯಕ್ಷತೆಯಲ್ಲಿ ಶುರುವಾದ ಸಮಿತಿಯು ಅವರ ನಿಧನ ನಂತರ ಮುಗುಳಿ ನಾರಾಯಣ ರಾವ್ ಅವರ ಗೌರವಾಧ್ಯಕ್ಷತೆಯಲ್ಲಿ ಮುಂದುವರೆದಿದೆ. 4 ದಿನ ಆರಾಧನೆಗೊಳ್ಳುವ ಶಾರದೆಯನ್ನು  ಭವ್ಯ ಮೆರವಣಿಗೆಯಲ್ಲಿ ಒಯ್ದು ಸೋಮಾವತಿ ನದಿಯಲ್ಲಿ ವಿಸರ್ಜನೆ ಮಾಡಲಾಗುತ್ತದೆ. ಮೆರವಣಿಗೆಯು ಕೇವಲ ಭಕ್ತಿ ಭಾವ ಹಾಗೂ ಸ್ಥಳ ಪೂಜೆಗೆ ಮಾತ್ರ ಸೀಮಿತ. ಯಾವುದೇ ಆಡಂಬರಕ್ಕೆ ಅವಕಾಶವಿಲ್ಲ. ಈ ಶಾರದೋತ್ಸವಕ್ಕೆ ಹಲವು ಕಡೆಯಿಂದ ಭಕ್ತರು ನಿತ್ಯ ಭಕ್ತರು ಬಂದು ಪೂಜಾ  ಒಪ್ಪಿಸುತ್ತಾರೆ.  ಸಾರ್ವಜನಿಕರು ಹಾಗೂ ಸಮಿತಿಯವರ ಸಂಪೂರ್ಣ ಸಹಕಾರದಿಂದ ಪ್ರತಿ ವರ್ಷ ಶಾರದೆಯನ್ನು 4 ದಿನಗಳ ಕಾಲ ಮೂರ್ತಿ ಸ್ಥಾಪಿಸಿ ಭಕ್ತಿಯಿಂದ ಪೂಜಿಸುತ್ತಾ ಬರುತ್ತಿದ್ದೇವೆ. ನಾರಾಯಣ ರಾವ್ ಮುಗುಳಿ ಮಾರ್ಗದರ್ಶನದಲ್ಲಿ ಗಣೇಶ್ ಭಟ್ ಪಂಜೀರ್ಪು ಅವರ ಪೌರೋಹಿತ್ಯದಲ್ಲಿ ಬಹಳ ಯಶಸ್ವಿಯಾಗಿ ಶಾರದೋತ್ಸವ ಆಚರಣೆ ಸಂಭ್ರಮದಿಂದ ನಡೆಯುತ್ತಿದೆ ಎಂದು ಸಮಿತಿ ಪ್ರಧಾನ ಕಾರ್ಯದರ್ಶಿ ನಾರಾಯಣ ಶೆಟ್ಟಿ ತಿಳಿಸಿದರು.

ಪುತ್ತೂರು:  ಪುತ್ತೂರಿನ ಮಹತೋಭಾರ ಮಹಾಲಿಂಗೇಶ್ವರ ದೇವಳದ ವಠಾರದಲ್ಲಿನ ಶಾರದಾ ಭಜನಾ ಮಂದಿರದಲ್ಲಿ ನಡೆಯುವ ನವರಾತ್ರಿ ಹಾಗೂ ಶಾರದೋತ್ಸವಕ್ಕೆ 90ರ ಹರೆಯ. ಎರಡು ವರ್ಷಗಳಿಂದ ಈ ಉತ್ಸವ ಅದ್ದೂರಿಯಾಗಿ ನಡೆಯುತ್ತಿದೆ.  ‘ಪುತ್ತೂರಿನಲ್ಲಿ ಮಹಾಮಾರಿಗೆ ಜನರು ಸಾಯುತ್ತಿದ್ದ ಸಂದರ್ಭದಲ್ಲಿ ಭಕ್ತರು  ಸೇರಿ ಬಲ್ನಾಡಿನ ದಂಡನಾಯಕ-ಉಲ್ಲಾಳ್ತಿ ಸನ್ನಿಧಿಗೆ ತೆರಳಿ ದೈವಗಳ ಮೊರೆಹೋಗಿದ್ದರು. ಮಹಾಮಾರಿಯ ನಿವಾರಣೆಗೆ ಪ್ರಾರ್ಥಿಸಿದ್ದರು. ದೈವದ ಅಭಯದ ನುಡಿಯಂತೆ ಮನೆಮನೆಗೆ ತೆರಳಿ ಭಜನೆ ಹಾಡಿದ ಬಳಿಕ ರೋಗ ಮಾಯವಾಗಿತ್ತು. ನಂತರ ಭಕ್ತರೆಲ್ಲರೂ ಸೇರಿಕೊಂಡು ಮಹಾಲಿಂಗೇಶ್ವರ ದೇವಸ್ಥಾನದ ವಠಾರದಲ್ಲಿ ಶಾರದಾ ಭಜನಾ ಮಂದಿರ ಸ್ಥಾಪಿಸಿದ್ದರು’ ಎಂಬುದು ಪ್ರತೀತಿ.   ಲಭ್ಯ ಇರುವ 4.5 ಸೆಂಟ್ಸ್ ಸ್ಥಳದ ಜೊತೆಗೆ ಇನ್ನಷ್ಟು ಜಾಗವನ್ನು ಸೇರಿಸಿಕೊಂಡು ಆಕರ್ಷಕ ಭಜನಾ ಮಂದಿರ ನಿರ್ಮಿಸಲು ಆಡಳಿತ ಮಂಡಳಿಯ ಗೌರವಾಧ್ಯಕ್ಷ ಕೆದಂಬಾಡಿಗುತ್ತು ಸೀತಾರಾಮ ರೈ ಅಧ್ಯಕ್ಷ ಪಿ.ಜಿ.ಜಗನ್ನಿವಾಸ ರಾವ್ ನೇತೃತ್ವದ ತಂಡ ಸಿದ್ಧತೆ ನಡೆಸಿದೆ.  ಕೋಟ್... ಕಾರಣಿಕ ಹೊಂದಿರುವ ಇಲ್ಲಿನ ನವರಾತ್ರಿ  ವೇಳೆ  ಪ್ರರ್ಥನೆ ಸಲ್ಲಿಸುವ ಭಕ್ತರ ಇಷ್ಟಾರ್ಥಗಳು ಈಡೇರಿದ್ದಕ್ಕೆ ಹಲವಾರು ನಿದರ್ಶನಗಳಿವೆ ಎನ್ನುತ್ತಾರೆ ಕೆದಂಬಾಡಿಗುತ್ತು ಸೀತಾರಾಮ ರೈ.

ಉಳ್ಳಾಲ: 43 ವರ್ಷಗಳನ್ನು ಪೂರೈಸಿರುವ ಕೊಲ್ಯ ಶಾರದಾ ಉತ್ಸವ ಈ ಸಲ ‘ಶಾರದಾ ಮಂದಿರ’ದ ಲೋಕಾರ್ಪಣೆಯೊಂದಿಗೆ ಮತ್ತಷ್ಟು ವಿಜೃಂಭಣೆಯಿಂದ ಜರಗಲಿದೆ. ಈ ಹಬ್ಬ ಕೊಲ್ಯ ದಸರಾ ಎಂದೇ ಪ್ರಖ್ಯಾತ.1975ರಲ್ಲಿ ಸ್ಥಾಪನೆಯಾದ ಕೊಲ್ಯದ ಆದರ್ಶ ಮಿತ್ರ ಮಂಡಳಿ ಪ್ರತೀ ವರ್ಷ ಸ್ವಾತಂತ್ರ್ಯ ದಿನದೊಂದಿಗೆ ವಿದ್ಯಾನಿಧಿ ವಿತರಣೆ ಹಾಗೂ ಆಟೋಟ ಸ್ಪರ್ಧೆಗಳನ್ನು ಆಯೋಜಿಸುತ್ತಿತ್ತು. ಆದರ್ಶ ಮಿತ್ರ ಮಂಡಳಿ ಮತ್ತು ಶ್ರೀಶಾರದಾ ಮಹಿಳಾ ಮಂಡಳಿ ಸದಸ್ಯರು  ಪ್ರತಿ ಶುಕ್ರವಾರ ಶ್ರೀಶಾರದಾ ಮಾತೆಯ ಭಾವಚಿತ್ರ ಇಟ್ಟು ಭಜನೆ ಲಲಿತಸಹಸ್ರನಾಮ ಪೂಜೆಗಳು ಇನ್ನಿತರ ಧಾರ್ಮಿಕ ಸಾಮಾಜಿಕ ಸೇವಾ ಕಾರ್ಯಗಳನ್ನು  ಮಾಡಿಕೊಂಡು ಬಂದಿದ್ದರು. 1982ರಿಂದ ಇಲ್ಲಿ  ಸಾರ್ವಜನಿಕ ಶ್ರೀಶಾರದಾ ಮಹೋತ್ಸವ ಆರಂಭವಾಯಿತು.ರಾಷ್ಟ್ರೀಯ ಹೆದ್ದಾರಿ ವಿಸ್ತರಣೆಗಾಗಿ  ಶ್ರೀ ಶಾರದಾ ಸಭಾಭವನದ ಅರ್ಧದಷ್ಟು ಜಾಗವನ್ನು ಬಳಸಲಾಗಿದೆ.  ಹೆದ್ದಾರಿಯ ಪೂರ್ವ ಭಾಗದ 12.5 ಸೆಂಟ್ಸ್ ಸ್ಥಳವನ್ನು ಖರೀದಿಸಿ ಅಲ್ಲಿ ₹ 2.5 ಕೋಟಿ ವೆಚ್ಚದಲ್ಲಿ ವಿಶಾಲವಾದ ಶ್ರೀಶಾರದಾ ಮಂದಿರದ ನಿರ್ಮಿಸಲಾಗುತ್ತಿದೆ. ಮಂದಿರದ ನೆಲ ಅಂತಸ್ತು 5000 ಚ.ಅಡಿಯ ವಿಸ್ತೀರ್ಣವನ್ನು ಹೊಂದಿದ್ದು ಅದರ ಕಾಮಗಾರಿ ಪೂರ್ಣಗೊಂಡಿದೆ. ₹ 7 ಲಕ್ಷ ವೆಚ್ಚದಲ್ಲಿ ಶ್ರೀಶಾರದಾ ಮಾತೆಯ ಬೆಳ್ಳಿಯ ಬಿಂಬದ ಪ್ರತಿಷ್ಠೆಯೊಂದಿಗೆ ಶ್ರೀ ಶಾರದಾ ಮಂದಿರದ ಲೋಕಾರ್ಪಣೆಯ ಭವ್ಯ ಕಾರ್ಯವು ಈ ವರ್ಷನಡೆಯಲಿದೆ.  ಏಳು ದಿನಗಳ ಪರ್ಯಂತ ಧಾರ್ಮಿಕ ಸಾಂಸ್ಕೃತಿಕ ಹಾಗೂ ನಿತ್ಯ ಅನ್ನದಾನ ನಡೆಯಲಿದೆ. ಮಂಡಳಿಯು ವಿವಿಧ ಸಮಾಜ ಸೇವಾಕಾರ್ಯದಲ್ಲೂ ತೊಡಗಿದೆ.