ರಾಜಕಾಲುವೆ ನುಂಗಿದ ಖದೀಮರು: ಹಾವೇರಿಗೆ ಜಲ ಕಂಟಕ

ವ್ಯವಸ್ಥಿತ ಯೋಜನೆ ಹಾಗೂ ಮೂಲ ಸೌಕರ್ಯಗಳಿಲ್ಲದೇ ಹಾವೇರಿ ಸೊರಗಿದೆ. ಯಾಲಕ್ಕಿ ಕಂಪಿನ ನಾಡು ಹಾವೇರಿ ಇದೀಗ ರಾಜಕಾಲುವೆಗಳು ಕಾಣೆಯಾಗಿರುವ ಹಾಗೂ ಮೂಲ ಸೌಕರ್ಯಗಳಿಲ್ಲದ ನಗರವಾಗಿ ಮಾರ್ಪಡುತ್ತಿದೆ. ವ್ಯವಸ್ಥಿತ ಯೋಜನೆ ರೂಪಿಸಿ ಜಿಲ್ಲಾ ಕೇಂದ್ರದ ಮರ್ಯಾದೆ ಉಳಿಸುವಂತೆ ಜನರು ಅಧಿಕಾರಿಗಳು–ಜನಪ್ರತಿನಿಧಿಗಳನ್ನು ಆಗ್ರಹಿಸುತ್ತಿದ್ದಾರೆ.

‘ರಾಜಕಾಲುವೆ ಹಾಗೂ ಇತರೆ ಕಾಲುವೆಗಳು ಚರಂಡಿಗಳ ಜಾಗ ಒತ್ತುವರಿ ಆಗಿರುವ ಬಗ್ಗೆ ಜನರಿಂದ ದೂರುಗಳು ಬರುತ್ತಿವೆ. ಹಾವೇರಿ ನಗರದ ಮೂಲ ನಕಾಶೆ ನೀಡುವಂತೆ ಅಧಿಕಾರಿಗಳಿಗೆ ಸೂಚಿಸಿದ್ದೇನೆ. ನಕಾಶೆ ಕೈಗೆ ಸೇರಿದ ನಂತರ ಪರಿಶೀಲಿಸಿ ಮುಂದಿನ ಕಾನೂನು ಕ್ರಮ ಜರುಗಿಸಲಾಗುವುದು’ ಎಂದು ನಗರಸಭೆ ಅಧ್ಯಕ್ಷೆ ಶಶಿಕಲಾ ಮಾಳಗಿ ತಿಳಿಸಿದರು. ರಾಜಕಾಲುವೆ ಒತ್ತುವರಿ ಬಗ್ಗೆ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದ ಅವರು ‘ಇತ್ತೀಚೆಗೆ ಸುರಿದ ಮಳೆಯಿಂದಾಗಿ ನಗರದಲ್ಲಿ ಸಾಕಷ್ಟು ಹಾನಿಯಾಗಿದೆ. ಜನರ ದೂರುಗಳಿಗೆ ತ್ವರಿತವಾಗಿ ಸ್ಪಂದಿಸಲಾಗಿದೆ’ ಎಂದರು. ‘ಹಾವೇರಿ ಮೂಲ ನಕಾಶೆ ನೀಡುವಂತೆ ನಗರಸಭೆ ಅಧಿಕಾರಿಗಳನ್ನು ಕೇಳಿದ್ದೆ. ಆದರೆ ಅವರು ತಮ್ಮ ಬಳಿ ಇಲ್ಲ. ಭೂ ದಾಖಲೆಗಳ ಇಲಾಖೆ ಬಳಿ ಇರುವುದಾಗಿ ತಿಳಿಸಿದ್ದಾರೆ. ಅಲ್ಲಿಯ ಅಧಿಕಾರಿಗಳಿಂದ ತ್ವರಿತವಾಗಿ ನಕಾಶೆ ಪಡೆದು ಸಲ್ಲಿಸುವಂತೆ ಹೇಳಿದ್ದೇನೆ. ನಕಾಶೆ ಪರಿಶೀಲಿಸಿದಾಗಲೇ ರಾಜಕಾಲುವೆಗಳು ಎಲ್ಲೆಲ್ಲಿವೆ ? ಎಂಬುದು ಗೊತ್ತಾಗಲಿದೆ. ಬಳಿಕ ಒತ್ತುವರಿ ತೆರವು ಸಂಬಂಧ ಅಧಿಕಾರಿಗಳ ಜೊತೆ ಚರ್ಚೆ ನಡೆಸಲಾಗುವುದು. ಸರ್ಕಾರಿ ಜಾಗ ಒತ್ತುವರಿಯಾಗಿದ್ದರೆ ಅದನ್ನು ತೆರವು ಮಾಡಲು ಯಾರಿಗೂ ಹೆದರುವುದಿಲ್ಲ’ ಎಂದು ಹೇಳಿದರು.