ಕಾಳಗಿ: ಐದು ತರಗತಿ ಮಕ್ಕಳಿಗೆ ಒಂದೇ ಕೊಠಡಿ!

ಫಿರೋಜಾಬಾದ್-ಕಮಲಾಪುರ ರಾಜ್ಯಹೆದ್ದಾರಿ-125 (ಕಲಬುರಗಿ-ಕಾಳಗಿ-ಚಿಂಚೋಳಿ ಮುಖ್ಯರಸ್ತೆ) ಬದಿಗಿರುವ ಈ ಶಾಲೆಯು 1ರಿಂದ 5ನೇ ತರಗತಿವರೆಗೆ ಇದ್ದು, ಪ್ರಸ್ತುತ ಇಬ್ಬರು ಶಿಕ್ಷಕರು ಹಾಗೂ 32 ವಿದ್ಯಾರ್ಥಿಗಳನ್ನು ಹೊಂದಿದೆ.

ಶಾಲೆಯ ಒಟ್ಟು 5 ಕೊಠಡಿಗಳಲ್ಲಿ 3 ಕೊಠಡಿಗಳು ಹಳೆಯದಾಗಿ ಗೋಡೆ, ಚಾವಣಿ, ನೆಲಹಾಸಿಗೆ ಸಂಪೂರ್ಣ ಶಿಥಿಲಗೊಂಡು ಬಳಕೆಗೆ ಬಾರದೆ ಕೀಲಿಬಿದ್ದು ಹಾಳು ಸುರಿಯುತ್ತಿವೆ. ಇನ್ನೆರಡು ಕೊಠಡಿಗಳ ಪೈಕಿ ಒಂದನ್ನು ಬಿಸಿಯೂಟದ ಅಡುಗೆ ಕೋಣೆಯನ್ನಾಗಿ ಮಾಡಿ, ಮತ್ತೊಂದರಲ್ಲಿ ಎಲ್ಲಾ ತರಗತಿಗಳು ಒಟ್ಟಿಗೆ ನಡೆಸಲಾಗುತ್ತಿದೆ. ಈ ಎಲ್ಲದರ ಪಕ್ಕದಲ್ಲೇ 15 ವರ್ಷವಾದರೂ ಮುಗಿಯದ ತರಗತಿಗಳ ಕಟ್ಟಡವೊಂದು ಅನಾಥವಾಗಿ ನಿಂತಿತ್ತು.

ಹಲವು ವರ್ಷಗಳಿಂದ ಈ ಅವ್ಯವಸ್ಥೆ ಇದ್ದುದನ್ನು ಮನಗಂಡಿದ್ದ ಕ್ಷೇತ್ರದ ಚಿತ್ತಾಪುರ ಶಾಸಕ, ಜಿಲ್ಲಾ ಉಸ್ತುವಾರಿ ಸಚಿವ ಪ್ರಿಯಾಂಕ್ ಎಂ.ಖರ್ಗೆ ಅವರು ಲೋಕೋಪಯೋಗಿ ಇಲಾಖೆ ಮೇಲ್ವಿಚಾರಣೆಯಲ್ಲಿ 2020-21ನೇ ಸಾಲಿನಲ್ಲಿ ₹ 40ಲಕ್ಷ ಅನುದಾನ ಬಿಡುಗಡೆ ಮಾಡಿ  2021ರ ನವಂಬರ್ 8ರಂದು ಅಡಿಗಲ್ಲು ಹಾಕಿ 3 ಹೊಸ ಕೊಠಡಿಗಳ ನಿರ್ಮಾಣಕ್ಕೆ ಚಾಲನೆ ನೀಡಿದ್ದರು. ಅದರಂತೆ 15 ವರ್ಷವಾದರೂ ಮುಗಿಯದ ಅನಾಥವಾದ ಕಟ್ಟಡ ಕೆಡವಿ ಅದೇ ಜಾಗದಲ್ಲಿ ಗುತ್ತಿಗೆದಾರರು ಈ ಹೊಸ ಕಾಮಗಾರಿ ಕೈಗೆತ್ತಿಕೊಂಡಿದ್ದಾರೆ.

ಆರಂಭದಿಂದಲೇ ಕುಂಟುತ್ತಾ ಸಾಗಿದ ಈ ಕಾಮಗಾರಿ ಎರಡು ವರ್ಷ ಮುಗಿಯಲು ಬಂದರೂ ಚಾವಣಿ ಕೆಲಸ ಇನ್ನೂ ಕಟ್ಟಿಗೆಯ ಬಂಬುಗಳ ಮೇಲೆ ನಿಂತಿದೆ. ಕಳೆದ ವಿಧಾನಸಭಾ ಚುನಾವಣೆ ಮುನ್ನವೇ ಸೆಂಟ್ರಿಂಗ್ ಹೊಡೆದು ನಿಲ್ಲಿಸಿದ ಕಟ್ಟಿಗೆ ಬಂಬೂಗಳು ಛತ್ತು ಕಾಣದೆ ಶಾಲಾ ಮಕ್ಕಳನ್ನು ಅಪಾಯಕ್ಕೆ ಆಹ್ವಾನಿಸುವಂತಿವೆ.

ಬಂಬೂಗಳ ಮಧ್ಯೆ ಹುಲ್ಲು, ಕಸಕಡ್ಡಿ ನಿರ್ಮಾಣವಾಗಿ ವಿಷಜಂತುಗಳಿಗೆ ಆಸರೆಯಾಗಿದೆ. ಇದು ಬಿಡುವಿನ ವೇಳೆಯಲ್ಲಿ ಮಕ್ಕಳಿಗೆ ಭಯ ಹುಟ್ಟಿಸುತ್ತಿದೆ ಎನ್ನುತ್ತಾರೆ ಪೋಷಕರು.

‘ಕಾಮಗಾರಿ ಬೇಗ ಪೂರ್ಣಗೊಳಿಸುವಂತೆ ಗುತ್ತಿಗೆದಾರನಿಗೆ ಹೇಳಿದರೆ. ಕಾರ್ಮಿಕರಿಲ್ಲ, ಮರಳು ಸಿಗ್ತಿಲ್ಲ, ಬಿಲ್ ಆಗಿಲ್ಲ ಹೀಗೆ ಒಂದಿಲ್ಲೊಂದು ನೆಪದಿಂದ ಅವರು ವಿಳಂಬ ಮಾಡುತ್ತಿದ್ದಾರೆ’ ಎಂದು ಕಾಳಗಿ ಲೋಕೋಪಯೋಗಿ ಇಲಾಖೆ ಎಇಇ ಸಿದ್ರಾಮ ದಂಡಗುಲಕರ್ ಹೇಳಿದರು.

’ಬೇರೆ ಕಾಮಗಾರಿ ಬಿಲ್ ಬಿಡುಗಡೆ ಆಗಿದ್ದರೂ ಹೊಂದಿಸಿಕೊಂಡು ಈ ಕೆಲಸ ಪೂರ್ಣಗೊಳಿಸುತ್ತಿದ್ದೆ. ಆದರೆ ಎಲ್ಲಾ ಬಿಲ್‌ಗಳು ಹಾಗೆ ನಿಂತಿದ್ದರಿಂದ ಸಮಸ್ಯೆಯಾಗಿದೆ. ಹೇಗಾದರೂ ಮಾಡಿ ನಾಲ್ಕೈದು ದಿನಗಳಲ್ಲಿ ಛತ್ತಿನ ಕೆಲಸ ಪೂರ್ತಿ ಮುಗಿಸಿಕೊಡುತ್ತೇನೆ’ ಎಂದು ಗುತ್ತಿಗೆದಾರ ಬಸವರಾಜ ಹುಮನಾಬಾದ ಪ್ರತಿಕ್ರಿಯಿಸಿದರು.

ಕಾಮಗಾರಿ ವಿಳಂಬದಿಂದ ಇದ್ದ ಒಂದು ಕೊಠಡಿಯಲ್ಲೇ 1ರಿಂದ 3ನೇ ತರಗತಿ ನಲಿಕಲಿ ಮಕ್ಕಳು, 4ನೇ, 5ನೇ ಮಕ್ಕಳು ಕುಳಿತುಕೊಳ್ಳುವಂತಾಗಿದೆ. ಶಾಲಾ ಕಾರ್ಯಾಲಯವೂ ಇದೆ ಆಗಿದೆ. ಹೊರಗಡೆ ಆಟಕ್ಕೂ ಮಕ್ಕಳು ಭಯ ಪಡುವ ಸ್ಥಿತಿ ನಿರ್ಮಾಣವಾಗಿದೆ. ಒಟ್ಟಾರೆ ಕಲಿಕಾ ವಾತಾವರಣ ಇಲ್ಲಿ ಮರೀಚಿಕೆಯಾಗಿದೆ.