ಕೋಲಾರ | ಜಿಲ್ಲಾ ಕ್ರೀಡಾಂಗಣದ ಕಾಮಗಾರಿಯಲ್ಲಿ ಲೋಪ: ಸಿಂಥೆಟಿಕ್ ಟ್ರ್ಯಾಕ್ ಅಳವಡಿಕೆ

ಟ್ರ್ಯಾಕ್‌ ಸಂಬಂಧ ಕೆಲವೊಂದು ತಾಂತ್ರಿ ಲೋಪಗಳಾಗಿರುವ ಬಗ್ಗೆ ಕ್ರೀಡಾಪಟುಗಳು ಕ್ರೀಡಾ ಪರಿಣತರು ಗಮನಕ್ಕೆ ತಂದಿದ್ದಾರೆ. ಗುತ್ತಿಗೆದಾರರಿಗೆ ಈ ವಿಚಾರ ಮುಟ್ಟಿಸಲಾಗಿದ್ದು ಲೋಪವಿದ್ದರೆ ಉದ್ಘಾಟನೆಯೊಳಗೆ ಸರಿಪಡಿಸುವಂತೆ ಹೇಳಿದ್ದೇವೆ. ಪರಿಶೀಲನೆ ನಡೆಸಿ ಸರಿಪಡಿಸುವುದಾಗಿ ಹೇಳಿದ್ದಾರೆ. ಟ್ರ್ಯಾಕ್‌ ಮೇಲೆ ನೀರು ನಿಲ್ಲುತ್ತಿದ್ದ ಸಮಸ್ಯೆಯನ್ನು ಎರಡು ದಿನಗಳ ಹಿಂದೆ ಬಂದು ಸರಿಪಡಿಸಿದ್ದಾರೆ. ಆರ್‌.ಗೀತಾ ಸಹಾಯಕ ನಿರ್ದೇಶಕಿ ಕ್ರೀಡಾ ಇಲಾಖೆ ಕೋಲಾರ

ಸಿಂಥೆಟಿಕ್‌ ಟ್ರ್ಯಾಕ್‌ ನಿರ್ಮಾಣದ ಕಾಮಗಾರಿಯನ್ನು ₹ 8.55 ಕೋಟಿ ವೆಚ್ಚದಲ್ಲಿ ಕೈಗೊಳ್ಳಲಾಗಿದೆ ಎಂದು ಕ್ರೀಡಾ ಇಲಾಖೆ ಆರಂಭದಲ್ಲಿ ಮಾಹಿತಿ ನೀಡಿತ್ತು. ಮೂರು ಕಾಮಗಾರಿಗಳನ್ನು ಪ್ರತ್ಯೇಕವಾಗಿ ಕೊಡಲಾಗಿತ್ತು. ಸಿಂಥೆಟಿಕ್‌ ಟ್ರ್ಯಾಕ್‌ ಅಳವಡಿಕೆಗೆ ಬೇಸ್‌ ಹಾಗೂ ಚರಂಡಿ ಕಾಮಗಾರಿಯನ್ನು ₹ 2.07 ಕೋಟಿಗೆ ಟೆಂಡರ್‌ ನೀಡಲಾಗಿತ್ತು. ಟ್ರ್ಯಾಕ್‌ ಮಧ್ಯೆ ನೈಸರ್ಗಿಕ ಹುಲ್ಲು ಹಾಸಿನ ಫುಟ್‌ಬಾಲ್ ಅಂಕಣ ನೀರಿನ ತೊಟ್ಟಿ ಚೈನ್‌ ಲಿಂಕ್‌ ಫೆನ್ಸಿಂಗ್‌ ನಿರ್ಮಾಣ ಕಾಮಗಾರಿಯನ್ನು ₹ 2.41 ಕೋಟಿ ಮೊತ್ತಕ್ಕೆ ಟೆಂಡರ್‌ ಕೊಡಲಾಗಿತ್ತು. ₹ 5.60 ಕೋಟಿ ವೆಚ್ಚದಲ್ಲಿ 400 ಕಿ.ಮೀ ಸಿಂಥೆಟಿಕ್‌ ಟ್ರ್ಯಾಕ್‌ ಅಳವಡಿಸುವ ಕಾಮಗಾರಿಯನ್ನು ಹೈದರಾಬಾದ್‌ನ ಕಂಪನಿಯೊಂದಕ್ಕೆ ನೀಡಲಾಗಿತ್ತು. 1 ಲಕ್ಷ ಲೀಟರ್‌ ನೀರು ಹಿಡಿದಿಡುವ ಸಾಮರ್ಥ್ಯದ ತೊಟ್ಟಿ ನಿರ್ಮಾಣ 109.35 x70.96 ಮೀಟರ್‌ ವಿಸ್ತೀರ್ಣದ ಫುಟ್‌ಬಾಲ್‌ ಅಂಕಣ ನಿರ್ಮಾಣ ಅಥ್ಲೆಟಿಕ್‌ ಟ್ರ್ಯಾಕ್‌ ಜೊತೆಗೆ ಲಾಂಗ್‌ ಜಂಪ್‌ ಸ್ಟೀಪಲ್‌ ಚೇಸ್‌ ಅಂಕಣ ನಿರ್ಮಾಣ ಹಾಗೂ ಕ್ರೀಡಾಂಗಣಕ್ಕೆ 10 ಫ್ಲಡ್‌ಲೈಟ್‌ ಅಳವಡಿಕೆಯ ಯೋಜನೆ ಹೊಂದಲಾಗಿತ್ತು. ಗುತ್ತಿಗೆದಾರರೇ ಸಿಂಥೆಟಿಕ್‌ ಟ್ರ್ಯಾಕ್‌ ನಿರ್ವಹಣೆ ಮಾಡುವುದು ಒಪ್ಪಂದದ ಸಾರ. ಸಿಂಥೆಟಿಕ್‌ ಟ್ರ್ಯಾಕ್‌ ಸಾಮಗ್ರಿಯನ್ನು ಜರ್ಮನಿಯಿಂದ ತರಿಸಲಾಗಿದೆ ಎಂಬುದು ಇಲಾಖೆಯ ಹೇಳಿಕೆ. ಇಲಾಖೆಯ ಕೇಂದ್ರ ಕಚೇರಿ ಮೂಲಕ ಟೆಂಡರ್‌ ನೀಡಿ ಕಾಮಗಾರಿ ಕೈಗೊಂಡಿದ್ದು ಖರ್ಚು ವೆಚ್ಚದ ಬಗ್ಗೆ ತಮಗೆ ಮಾಹಿತಿ ಇಲ್ಲವೆಂದು ಕ್ರೀಡಾ ಇಲಾಖೆಯ ಸ್ಥಳೀಯ ಅಧಿಕಾರಿಗಳು ಹೇಳುತ್ತಾರೆ.

ರಾಜಧಾನಿ ಬೆಂಗಳೂರಿಗೆ ಸಮೀಪದಲ್ಲೇ ಇರುವ ಜಿಲ್ಲೆಯ ಯಾವುದೇ ಕ್ರೀಡಾಂಗಣದಲ್ಲಿ ಸಿಂಥೆಟಿಕ್‌ ಟ್ರ್ಯಾಕ್‌ ಸೌಲಭ್ಯ ಇಲ್ಲ. ರಾಜ್ಯ ರಾಷ್ಟ್ರಮಟ್ಟದ ಕ್ರೀಡಾಕೂಟಗಳಲ್ಲಿ ಪಾಲ್ಗೊಳ್ಳುವವರು ಸಿಂಥೆಟಿಕ್‌ ಟ್ರ್ಯಾಕ್‌ನಲ್ಲೇ ಅಭ್ಯಾಸ ನಡೆಸಬೇಕು. ಅಂತರ ಜಿಲ್ಲಾ ಮಟ್ಟದ ಕ್ರೀಡಾಕೂಟ ಸಿಂಥೆಟಿಕ್‌ ಟ್ರ್ಯಾಕ್‌ನಲ್ಲೇ ನಡೆಯಬೇಕು. ಈವರೆಗೆ ಸೌಲಭ್ಯದ ಕೊರತೆಯಿಂದಾಗಿ ಜಿಲ್ಲೆಯಲ್ಲಿ ಯಾವುದೇ ಪ್ರಮುಖ ಕ್ರೀಡಾಕೂಟ ನಡೆಸಲು ಸಾಧ್ಯವಾಗಿಲ್ಲ. ಈಗ ಟ್ರ್ಯಾಕ್‌ ಅಳವಡಿಕೆ ಬಹುತೇಕ ಕೊನೆಗೊಂಡಿದ್ದರೂ ಕೆಲ ಲೋಪ ದೋಷಗಳು ಕಾಣಿಸುತ್ತಿವೆ. ಈಗಾಗಲೇ ಒಂದೂವರೆ ವರ್ಷವಾಗಿದ್ದು ಬಳಕೆಗೆ ಇನ್ನೂ ಎಷ್ಟು ದಿನ ಕಾಯಬೇಕು ಎಂಬುದು ಅಥ್ಲೀಟ್‌ಗಳ ಪ್ರಶ್ನೆಯಾಗಿದೆ.

ಸ್ವಾತಂತ್ರ್ಯೋತ್ಸವ ದಿನವಾದ ಆಗಸ್ಟ್‌ 15ರಂದು ಕ್ರೀಡಾಂಗಣದ ನೂತನ ಟ್ರ್ಯಾಕ್‌ಗೆ ಜಿಲ್ಲಾ ಉಸ್ತುವಾರಿ ಸಚಿವ ಬೈರತಿ ಸುರೇಶ್‌ ಚಾಲನೆ ನೀಡಲಿದ್ದಾರೆ. ಈ ಸಂಬಂಧ ಸಿದ್ಧತೆ ಮಾಡಿಕೊಳ್ಳಬೇಕೆಂದು ಜಿಲ್ಲಾಧಿಕಾರಿ ಅಕ್ರಂ ಪಾಷಾ ಸೂಚನೆ ನೀಡಿದ್ದಾರೆ ಎಂದು ಕ್ರೀಡಾ ಇಲಾಖೆ ಸಹಾಯಕ ನಿರ್ದೇಶಕಿ ಆರ್‌.ಗೀತಾ ಹೇಳಿದರು.