ಯಲಬುರ್ಗಾ | ದ್ರಾಕ್ಷಿ ಬೆಳೆಯಿಂದ ಬದುಕು ‘ಸಿಹಿ’

ಸಾಕಷ್ಟು ಏಳು ಬೀಳುಗಳನ್ನು ಕಂಡರೂ ನಿರಂತರವಾಗಿ 2 ಎಕರೆ ಪ್ರದೇಶದಲ್ಲಿ ದ್ರಾಕ್ಷಿ ಬೆಳೆಯನ್ನು ಅಭಿವೃದ್ಧಿ ಪಡಿಸಿ ಈ ಭಾಗದ ವಿವಿಧ ಮಾರುಕಟ್ಟೆಗೆ ಹಣ್ಣನ್ನು ಪೂರೈಸುತ್ತಿದ್ದಾರೆ. ಹೆಚ್ಚು ಶ್ರಮವಹಿಸಿ ಅಧಿಕ ಇಳುವರಿ ತಗೆಯುತ್ತಿರುವ ರೈತ ಬಸವರಾಜ ಅವರು ಸಾಕಷ್ಟು ಆದಾಯ ಪಡೆಯುತ್ತಿದ್ದಾರೆ.

ಹಾಗೆಯೇ ಕೆಲವೊಂದು ಸಂದರ್ಭದಲ್ಲಿ ನಷ್ಟವನ್ನು ಅನುಭವಿಸಿದ್ದಾರೆ. ನಾಟಿ ಮಾಡಿದ ಮೊದಲನೇ ಸಸಿಗಳಿಂದಲೇ ಸತತ ಮೂರನೇ ವರ್ಷವೂ ಉತ್ತಮ ಫಸಲು ಪಡೆಯುತ್ತಿರುವುದರಿಂದ ಕಡಿಮೆ ಖರ್ಚಿನಲ್ಲಿ ಅಧಿಕ ಆದಾಯ ಪಡೆಯುತ್ತಿರುವುದು ಖುಷಿಯ ಸಂಗತಿಯಾಗಿದೆ.

ಕಳೆದ ಎರಡು ವರ್ಷಗಳಿಗಿಂತಲೂ ಮೊದಲು ಹಸಿ ದ್ರಾಕ್ಷಿಯ ಮಾರಾಟ ಮಾಡಿ ಬರುವ ಆದಾಯದಲ್ಲಿಯೇ ತೃಪ್ತಿಪಡಬೇಕಾಗುತ್ತಿತ್ತು, ಆದರೆ ಈಚೆಗೆ ದ್ರಾಕ್ಷಿಯನ್ನು ಒಣಗಿಸಿ (ಮನುಕ) ಮಾರಾಟ ಮಾಡುತ್ತಿರುವುದರಿಂದ ಆದಾಯದಲ್ಲಿ ದ್ವಿಗುಣವಾಗುತ್ತಿದೆ. ಇದು ದ್ರಾಕ್ಷಿ ಬೆಳೆಯನ್ನು ವಿಸ್ತರಿಸುವಂತೆ ಪ್ರೇರಣೆ ನೀಡುತ್ತಿದೆ ಎಂದು ರೈತ ಮಠದ ಅಭಿಪ್ರಾಯಪಟ್ಟಿದ್ದಾರೆ.

ಕಳೆದ ಒಂದೂವರೆ ತಿಂಗಳಲ್ಲಿ ₹ 1.50ಲಕ್ಷ ದಷ್ಟು ಮೌಲ್ಯದ ಹಸಿ ದ್ರಾಕ್ಷಿ ಮಾರಾಟಮಾಡಿದ್ದು, 60 ಕ್ವಿಂಟಲ್ ಒಣದ್ರಾಕ್ಷಿಯನ್ನು ಮಾರಾಟ ಮಾಡಲಾಗಿದೆ. ಹಸಿ ದ್ರಾಕ್ಷಿ ಸಕಾಲದಲ್ಲಿ ಮಾರಾಟವಾಗದೇ ಹೋದರೆ ಹಾಳಾಗುವುದು ಹಾಗೂ ನಷ್ಟವಾಗುವ ಸಾಧ್ಯತೆಗಳಿವೆ. ಆದಾಯವು ಕೂಡಾ ಕಡಿಮೆ. ಅದಕ್ಕಾಗಿಯೇ ಒಣದ್ರಾಕ್ಷಿಯನ್ನು ಮಾಡುವ ಮೂಲಕ ಆದಾಯವನ್ನು ಹೆಚ್ಚಿಸಿಕೊಳ್ಳಲಾಗುತ್ತಿದೆ ಎಂದು ಕುಟುಂಬದ ಸದಸ್ಯ ಅಜ್ಜಯ್ಯ ತಿಳಿಸಿದ್ದಾರೆ.

ಕೃಷಿ ಕ್ಷೇತ್ರದಲ್ಲಿ ಸಾಧನೆಯೊಂದಿಗೆ ಉತ್ತಮ ರಂಗಭೂಮಿ ಕಲಾವಿದರು ಆಗಿರುವ ಇವರು ಈಗಾಗಲೇ ಎರಡು ನಾಟಕಗಳನ್ನು ರಚಿಸಿ ನಿರ್ದೇಶಿಸಿದ್ದಾರೆ. ತೋಟಗಾರಿಕೆ ಬೆಳೆಯಲ್ಲಿ ಉತ್ತಮ ಸಾಧನೆ ಮಾಡುತ್ತಿರುವ ರೈತ ಬಸವರಾಜ ಅವರಿಗೆ ಧಾರವಾಡದ ಚಿರಾಯು ಅಸೋಶಿಯೇಷನ್ ಜನಸೇವಾ ಫೌಂಡೇಶನ್‌ನವರು ಈಚೆಗೆ ರಾಷ್ಟ್ರೀಯ ನೇಗಿಲ ಯೋಗಿ ಪ್ರಶಸ್ತಿ ನೀಡಿ ಗೌರವಿಸಿದ್ದಾರೆ.

ಸ್ಥಳೀಯವಾಗಿ ವಿವಿಧ ಸಂಘ ಸಂಸ್ಥೆಗಳು ಇವರ ಬಹುಮುಖ ಪ್ರತಿಭೆಯನ್ನು ಗುರುತಿಸಿ ಗೌರವಿಸಿ ಸನ್ಮಾನಿಸಿದ್ದಾರೆ.