ಸಾರ್ವಜನಿಕರ ಸಭೆ: ಬೀಟ್‌ ವ್ಯವಸ್ಥೆ ಬಲಗೊಳಿಸಲು ಎಡಿಜಿಪಿ ಅಲೋಕ್‌ ಕುಮಾರ್‌ ಸೂಚನೆ

ಗಂಗಾವತಿಯ ಶಂಕರಗೌಡ ಎಂಬುವರು ‘ಗಂಗಾವತಿಯಲ್ಲಿ ಸಂಚಾರ ದಟ್ಟಣೆ ಹೆಚ್ಚಾಗಿದೆ. ಪೊಲೀಸರು ಹೋಳಿಹುಣ್ಣಿಮೆ ಗಣೇಶ ಚತುರ್ಥಿ ಮತ್ತು ರಂಜಾನ್‌ ಸಮಯದಲ್ಲಿ ಮತ್ರ ಸಾರ್ವಜನಿಕ ಸಭೆ ಮಾಡುತ್ತಾರೆ. ಸಂಚಾರ ದಟ್ಟಣೆ ನಿರ್ವಹಣೆ ಬಗ್ಗೆಯೂ ನಮ್ಮೊಂದಿಗೆ ಚರ್ಚಿಸುವುದಿಲ್ಲ’ ಎಂದು ಹೇಳಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಅಲೋಕ್‌ ಕುಮಾರ್ ‘ಈ ಮೂರು ಹಬ್ಬಗಳ ಸಂದರ್ಭದಲ್ಲಿ ಮಾತ್ರ ಸಭೆ ನಡೆಸಲಾಗುತ್ತಿದೆ. ಪೊಲೀಸರು ತಮಗೆ ಪರಿಚಯದವರನ್ನು ಮಾತ್ರ ಸಭೆಗೆ ಕರೆಯುತ್ತಾರೆ ಎನ್ನುವ ದೂರುಗಳು ಎಲ್ಲ ಕಡೆಯೂ ಇದೆ. ಇದು ಸರಿಯಲ್ಲ’ ಎಂದರು. ‘ಠಾಣಾ ವ್ಯಾಪ್ತಿಯಲ್ಲಿ ಪೊಲೀಸ್ ಇನ್‌ಸ್ಟೆಕ್ಟರ್‌ ಡಿವೈಎಸ್‌ಪಿ ಹಾಗೂ ಎಸ್‌ಪಿ ತಮ್ಮ ಹಂತದಲ್ಲಿ ಮೇಲಿಂದ ಮೇಲೆ ಜನಸಂಪರ್ಕ ಸಭೆ ನಡೆಸಬೇಕು’ ಎಂದು ಸೂಚಿಸಿದರು.

ಕೇಳಿಬಂದ ಪ್ರಮುಖ ದೂರುಗಳು ಹಾಗೂ ಕೋರಿಕೆಗಳು * ಲಕ್ಷ್ಮಣ ದಾಸರ ಅಳವಂಡಿ: ನನ್ನ ತಮ್ಮ ನನ್ನನ್ನು ಹಾಗೂ ಹೆಂಡತಿಯನ್ನು ಹೊಡೆಯುತ್ತಾನೆ. ನನ್ನ ಪಾಲಿನ ಹೊಲ ನನಗೆ ಬಿಸಿಡಿಕೊಡಿ ಎಂದು ಕೋರಿದರು. * ಕುಷ್ಟಗಿಯ ದೇವೇಂದ್ರ ಬಳೂಟಗಿ ಹಾಗೂ ಇತರ ರೈತರು: ಶ್ರೀಗಂಧ ಬೆಳದಿದ್ದೇವೆ. ರಕ್ಷಣೆಯೇ ಸವಾಲಾಗಿದೆ. ದೂರು ನೀಡಿದರೆ ತೆಗೆದುಕೊಳ್ಳುವುದಿಲ್ಲ. * ಗಂಗಾವತಿ ಕಾಸೀಂಅಲಿ ಮುದ್ದಾಬಳ್ಳಿ: ಇತ್ತೀಚೆಗೆ ಮುಸ್ಲಿಂ ಸಮಾಜದ ವೃದ್ಧನ ಮೇಲೆ ಹಲ್ಲೆ ನಡೆದಿದ್ದು ಯಾವುದೇ ಘಟನೆಗೆ ಕೋಮು ಬಣ್ಣ ಬಳಿಯದೇ ಯಾರು ತಪ್ಪು ಮಾಡಿದ್ದಾರೆ ಅವರ ವಿರುದ್ಧ ಕ್ರಮ ಕೈಗೊಳ್ಳಬೇಕು. * ಯಮುನಾ ಬೆಸ್ತರ ಸಖಿ ಒನ್ ಸ್ಟಾಪ್ ಕೇಂದ್ರದ ಆಡಳಿತಾಧಿಕಾರಿ: ಕೇಂದ್ರದಲ್ಲಿ ಪ್ರಕರಣ ವಿಚಾರಣೆ ವೇಳೆ ಪೊಲೀಸರನ್ನು ನಿಯೋಜಿಸಿ. * ಯೋಗಾನಂದ: ಬಹದ್ದೂರ್‌ಬಂಡಿಯಲ್ಲಿ ಗಾಂಜಾ ಹಾವಳಿ ವ್ಯಾಪಕವಾಗಿದೆ. ಪ್ರೌಢಶಾಲಾ ವಿದ್ಯಾರ್ಥಿಗಳು ಸಹ ಇದನ್ನು ಸೇವಿಸುತ್ತಿದ್ದಾರೆ.

ಕುಕನೂರು ತಾಲ್ಲೂಕಿನ ಚಿಕೇನಕೊಪ್ಪ ಗ್ರಾಮದ ಮಹಾಂತಯ್ಯ ಎಂಬುವರು ’ವಿಂಡ್‌ ಪವರ್‌ ಕಂಪನಿಯವರು ನನಗೆ ವಿನಾಕಾರಣ ತೊಂದರೆ ಕೊಡುತ್ತಿದ್ದಾರೆ. ಅಲ್ಲಿನ ಪೊಲೀಸ್‌ ನನ್ನ ಮೇಲೆ ಹಲ್ಲೆ ಮಾಡಿದ್ದಾರೆ’ ಎಂದು ದೂರಿದರು. ಈ ಕುರಿತು ಮಾಹಿತಿ ಪಡೆದ ಅಲೋಕ್‌ ಕುಮಾರ್‌ ‘ರಸ್ತೆಯಲ್ಲಿ ವಾಹನ ಅಡ್ಡಹಾಕಿ ನೀವು ಸಾರ್ವಜನಿಕರಿಗೆ ತೊಂದರೆ ಪಡಿಸಿದರೆ ಅದನ್ನು ಒಪ್ಪುವುದಿಲ್ಲ. ನಿಮ್ಮ ಮೇಲೆ ಈಗಾಗಲೇ ಪ್ರಕರಣವಿದೆ. ಗಲಾಟೆ ಇದೇ ರೀತಿ ಮುಂದುವರಿದರೆ ಗಡಿಪಾರು ಮಾಡಲಾಗುವುದು’ ಎಂದು ಎಚ್ಚರಿಸಿದರು.