‘ರಣಜಿ’ಯಲ್ಲಿ ಮೈಸೂರಿನ ಮೂವರು!

ಕುವೆಂಪುನಗರದ ಕಿಶನ್ ಎಸ್‌.ಬೇದ್ರೆ ಬಲಗೈ ಬ್ಯಾಟರ್‌. ಬೋಗಾದಿಯ ಅಮೃತ ವಿದ್ಯಾಲಯದಲ್ಲಿ 10ನೇ ತರಗತಿವರೆಗೆ ಓದಿದ ನಂತರ ವಿಜಯವಿಠ್ಠಲ ಪಿಯು ಕಾಲೇಜಿನಲ್ಲಿ ಪಿಯು ಸೇಪಿಯಂಟ್‌ ಕಾಲೇಜಿನಲ್ಲಿ ಬಿ.ಕಾಂ ಪದವಿ ಪಡೆದಿದ್ದಾರೆ. ಎರಡು ತಿಂಗಳ ಹಿಂದಷ್ಟೇ ನೈರುತ್ಯ ರೈಲ್ವೆಯಲ್ಲಿ ಕ್ರೀಡಾ ಕೋಟಾದಲ್ಲಿ ಉದ್ಯೋಗ ಪಡೆದಿದ್ದಾರೆ. ‌ ಆರ್‌.ಎಸ್‌.ಬೇದ್ರೆ– ವೀಣಾ ಎಸ್‌.ಬೇದ್ರೆ ದಂಪತಿ ಪುತ್ರ ಕಿಶನ್‌ ಮಾನಸಗಂಗೋತ್ರಿ ಗೌತಮ್‌ ಹಾಸ್ಟೆಲ್‌ ಮೈದಾನದಲ್ಲಿ ನಡೆಯುತ್ತಿದ್ದ ‘ನ್ಯಾಷನಲ್‌ ಕ್ರಿಕೆಟ್‌ ಕ್ಲಬ್‌’ನಲ್ಲಿ 7 ವರ್ಷ ಆಗಿದ್ದಾಗಿನಿಂದಲೂ ತರಬೇತಿ ಪಡೆದಿದ್ದಾರೆ. ಕ್ಲಬ್‌ನ ಹರಿಕೃಷ್ಣ ಅವರ ಕೋಚ್‌. ಅವರೀಗ ಕೆಎಸ್‌ಸಿಎ ಮೈಸೂರು ವಲಯ ಸಂಚಾಲಕರಾಗಿದ್ದಾರೆ. ‘16 ವರ್ಷದೊಳಗಿನ ಕರ್ನಾಟಕ ತಂಡವನ್ನು ಪ್ರತಿನಿಧಿಸಿದ್ದ ಅವರು ರನ್‌ ಹೊಳೆ ಹರಿಸಿದ್ದರು. 25 ವರ್ಷದೊಳಗಿನವರ ತಂಡದ ನಾಯಕರಾಗಿ ನಾಲ್ಕು ಪಂದ್ಯಗಳಲ್ಲಿ 500 ರನ್‌ ವೈಯಕ್ತಿಕ ಕಾಣಿಕೆ ನೀಡಿದ್ದರು. ಗಾಯದಿಂದ 7 ತಿಂಗಳು ವಿಶ್ರಾಂತಿಯಲ್ಲಿದ್ದ ಅವರು 7 ಪಂದ್ಯಗಳಲ್ಲಿ 480 ರನ್‌ ಗಳಿಸಿ ರಣಜಿ ತಂಡದಲ್ಲಿ ಸ್ಥಾನ ಗಿಟ್ಟಿಸಿದ್ದಾರೆ.  ‘2022ರಲ್ಲಿಯೇ ರಣಜಿಗೆ ಆಯ್ಕೆಯಾಗಿದ್ದರೂ ಅಂತಿಮ 11ರ ಬಳಗದಲ್ಲಿ ಸ್ಥಾನ ಸಿಕ್ಕಿರಲಿಲ್ಲ. ಪಂಜಾಬ್‌ ವಿರುದ್ಧದ ಪಂದ್ಯವೇ ನನ್ನ ಪದಾರ್ಪಣೆ ಪಂದ್ಯವಾಗಲಿದೆ ಎಂಬ ನಿರೀಕ್ಷೆಯಿದೆ’ ಎಂದು ಕಿಶನ್‌ ಹೇಳಿದರು.

ಅರಮನೆ ನಗರಿ ಪ್ರತಿಭೆ ನಿಕಿನ್‌ ಜೋಸ್‌ ಈ ಬಾರಿ ರಣಜಿ ತಂಡದಲ್ಲಿ ಉಪನಾಯಕರಾಗಿದ್ದಾರೆ. ಕಳೆದೆರಡು ವರ್ಷಗಳಿಂದ ಸ್ಥಿರ ಪ್ರದರ್ಶನ ನೀಡಿದ್ದರಿಂದ ಅವಕಾಶ ಸಿಕ್ಕಿದೆ. 2022ರ ಡಿ.13ರಂದು ಮೊದಲ ರಣಜಿ ಪಂದ್ಯ ಆಡಿದ್ದ ಅವರು ವಿಜಯ್‌ ಹಜಾರೆ ಟ್ರೋಫಿಗೂ ತಂಡದ ಸ್ಥಾನ ಪಡೆದಿದ್ದರು. ಏಷ್ಯಾ ಕಪ್‌ನ ಭಾರತ ‘ಎ’ ತಂಡವನ್ನೂ ಪ್ರತಿನಿಧಿಸಿದ್ದರು.