ಹೈದರಾಬಾದ್: ಗಣೇಶನನ್ನು ಬಗೆಬಗೆಯ ರೂಪ ಹಾಗೂ ಅಲಂಕಾರಗಳಿಂದ ಸಜ್ಜುಗೊಳಿಸುವ ಮೂಲಕ ಸಾರ್ವಜನಿಕ ಗಣೇಶ ಮಂಡಳಗಳು ಪ್ರತಿ ವರ್ಷ ಜನರ ಗಮನ ಸೆಳೆಯುವ ಯತ್ನ ನಡೆಸುತ್ತವೆ. ಆದರೆ ತೆಲಂಗಾಣದಲ್ಲಿ ಗಣೇಶ ಮೂರ್ತಿಯನ್ನು ಮುಸ್ಲಿಮರಂತೆ ಸಿದ್ಧಪಡಿಸಲಾಗಿದೆ ಎಂಬ ವಿಷಯ ಈಗ ಪರ ಹಾಗೂ ವಿರೋಧ ಚರ್ಚೆಗೆ ಕಾರಣವಾಗಿದೆ.
ತೆಲಂಗಾಣದ ಸಿಕಂದರಾಬಾದ್ನಲ್ಲಿ ಗಣೇಶ ಮೂರ್ತಿಯನ್ನು ಮುಸ್ಲಿಂ ಪೋಷಾಕಿನಲ್ಲಿ ಸಜ್ಜುಗೊಳಿಸಿದ್ದಕ್ಕೆ ಒಂದೆಡೆ ವ್ಯಾಪಕ ವಿರೋಧ ವ್ಯಕ್ತವಾದರೆ, ಮತ್ತೊಂದೆಡೆ ಜಾತ್ಯತೀತ ಸಂಕೇತ ಎಂದು ಇನ್ನೂ ಕೆಲವರು ಮೆಚ್ಚುಗೆ ಸೂಚಿಸಿದ್ದಾರೆ.
ಗಣೇಶೋತ್ಸವ ಸಮಿತಿ ಸಿದ್ಧಪಡಿಸಿದ ಈ ಗಣೇಶನಿಗೆ ಕಡುಹಸಿರು ವಸ್ತ್ರ ಧರಿಸಿದ್ದು, ತಲೆಗೆ ಮುಸ್ಲಿಮರು ತೊಡುವ ಪೇಟೆವನ್ನು ಹಾಕಲಾಗಿದೆ. ಸಾಮಾಜಿಕ ಮಾಧ್ಯಮದಲ್ಲಿ ಇದರ ವಿರುದ್ಧ ವ್ಯಾಪಕ ವಿರೋಧ ವ್ಯಕ್ತವಾಗಿದೆ.