‘ಮೈಸೂರು ಚಲೋ’ ಪಾದಯಾತ್ರೆ: ಸಿ.ಎಂ ರಾಜೀನಾಮೆ ನೀಡದಿದ್ದರೆ ಹೋರಾಟ ತೀವ್ರ

ಮೊದಲ ದಿನದ ಪಾದಯಾತ್ರೆಯಲ್ಲಿ ಎರಡೂ ಪಕ್ಷಗಳ ಘಟಾನುಘಟಿ ನಾಯಕರು ಇದ್ದರು. ಎರಡನೇ ದಿನ ಎರಡೂ ಪಕ್ಷಗಳ ಬಹುತೇಕ ಶಾಸಕರು ನಾಯಕರು ಕಾಣಿಸಲಿಲ್ಲ. ಯಾತ್ರೆ ಆರಂಭದ ವೇಳೆ ಕೆಲವರು ಕಾಣಿಸಿಕೊಂಡರೂ ಪಾದಯಾತ್ರೆಯಲ್ಲಿ ಸಾಗಲಿಲ್ಲ. ಎರಡನೇ ದಿನದ ಪಾದಯಾತ್ರೆ ಬಿಡದಿಯಿಂದ ಆರಂಭವಾಗಿ ಕೆಂಗಲ್‌ವರೆಗೆ 22 ಕಿ.ಮೀ ಸಾಗಿತು. ಎಂದಿಗಿಂತ ತುಸು ಹೆಚ್ಚಾಗಿದ್ದ ಬಿಸಿಲಿಗೆ ಜನರು ಬಸವಳಿದರು. ಧಗೆ ನೀಗಿಸಿಕೊಳ್ಳಲು ರಸ್ತೆ ಬದಿ ಹಂಚುತ್ತಿದ್ದ ಸೌತೆಕಾಯಿ ನೀರಿನ ಬಾಟಲ್‌ ಪಡೆಯಲು ಮುಗಿಬಿದ್ದರು. ಭಾನುವಾರವೂ ಜೆಡಿಎಸ್‌ ಕಾರ್ಯಕರ್ತರ ಸಂಖ್ಯೆ  ಕಡಿಮೆ ಇತ್ತು. ಮೊದಲ ದಿನ ಇರದಿದ್ದ ಜೆಡಿಎಸ್‌ ಬಾವುಟಗಳು ಬಿಜೆಪಿ ಬಾವುಟಗಳ ಮಧ್ಯೆ ರಾರಾಜಿಸುತ್ತಿದ್ದವು.

ಪಾದಯಾತ್ರೆಯಲ್ಲಿ ನೂರಾರು ಕಾರುಗಳು ಸಾಗಿದವು. ಮುಖಂಡರು ಪಾದಯಾತ್ರೆಯಲ್ಲಿ ನಡೆದರೆ ಅವರು ಬಂದಿದ್ದ ಕಾರುಗಳು ಹಿಂಬಾಲಿಸಿದವು. ಕೆಲವು ಭಾಗಗಳಲ್ಲಿ ಕಾರುಗಳ ಸಂಖ್ಯೆ ಹೆಚ್ಚಿದ್ದರಿಂದ ಪಾದಯಾತ್ರೆ ಮಾಡುತ್ತಿದ್ದವರು ಕಿರಿಕಿರಿ ಅನುಭವಿಸಿದರು.  ದಾರಿಯುದ್ದಕ್ಕೂ ವಿಜಯೇಂದ್ರ ನಿಖಿಲ್‌ ಕುಮಾರಸ್ವಾಮಿಗೆ ಹಾರ ಹಾಕಿ ಸ್ಥಳೀಯರು ಸ್ವಾಗತಿಸಿದರು. ಸೆಲ್ಫಿಗೆ ಮುಗಿಬೀಳುತ್ತಿದ್ದರು.ಇದರಿಂದ ಪಾದಯಾತ್ರೆಯ ವೇಗ ತಗ್ಗಿತು.

ಬಿಜೆಪಿ–ಜೆಡಿಎಸ್‌ ಹಮ್ಮಿಕೊಂಡಿರುವ ಮೈಸೂರು ಚಲೋ ಯಾತ್ರೆಯಲ್ಲಿ ಭಾನುವಾರ ಮಹಿಳೆಯರು ಅತ್ಯಂತ ಕಡಿಮೆ ಸಂಖ್ಯೆಯಲ್ಲಿ ಇದ್ದರು. ‘ಇಂದು ಭೀಮನ ಅಮವಾಸ್ಯೆ. ಶ್ರಾವಣವೂ ಆರಂಭವಾಗುತ್ತಿದೆ. ಮನೆಯಲ್ಲಿ ಕೆಲಸ ಹೆಚ್ಚಾಗುತ್ತವೆ. ಭಾಗವಹಿಸುವಿಕೆ ಸಹಜವಾಗಿ ಕಡಿಮೆ ಇರುತ್ತದೆ’ ಎಂದು ಶಿವಮೊಗ್ಗ ನಗರ ಪಾಲಿಕೆ ಮಾಜಿ ಸದಸ್ಯೆ ಅನಿತಾ ರವಿಶಂಕರ್ ಹೇಳಿದರು. ಪಾದಯಾತ್ರೆ ಮಾರ್ಗದಲ್ಲಿ ಮಹಿಳೆಯರಿಗೆ ಅಗತ್ಯ ಶೌಚಾಲಯ ಇಲ್ಲದ್ದೂ ಸಮಸ್ಯೆಯಾಗಿದೆ ಎಂದು ರಾಮನಗರದ ಅಶ್ವಿನಿ ಕುಮಾರ್ ಪ್ರತಿಕ್ರಿಯಿಸಿದರು.