MUDA Scam | ಮುಖ್ಯಮಂತ್ರಿ ವಿರುದ್ಧ ಪ್ರಕರಣ: ರಾಜ್ಯಪಾಲರ ನಡೆಯ ಕುತೂಹಲ

‘ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರದಲ್ಲಿ (ಮುಡಾ) ನಿವೇಶನ ಹಂಚಿಕೆ ಪ್ರಕರಣದಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ವಿರುದ್ಧ ಪ್ರಾಸಿಕ್ಯೂಷನ್‌ಗೆ ರಾಜ್ಯಪಾಲ ಥಾವರ್‌ಚಂದ್‌ ಗೆಹಲೋತ್‌ ಅನುಮತಿ ನೀಡುವ ವಿಶ್ವಾಸವಿದೆ’ ಎಂದು ವಕೀಲ ಟಿ.ಜೆ. ಅಬ್ರಹಾಂ ಹೇಳಿದರು. ರಾಜ್ಯಪಾಲರನ್ನು ರಾಜಭವನದಲ್ಲಿ ಮಂಗಳವಾರ ಭೇಟಿ ಮಾಡಿದ ಬಳಿಕ ಸುದ್ದಿಗಾರರ ಜೊತೆ ಮಾತನಾಡಿದ ಅವರು, ‘ನನ್ನ ಮೇಲೆ ರಾಜ್ಯ ಸರ್ಕಾರ ಮಾಡಿರುವ ಆಪಾದನೆಗಳಿಗೆ ರಾಜ್ಯಪಾಲರಿಗೆ ಸ್ಪಷ್ಟೀಕರಣ ನೀಡಿದ್ದೇನೆ. ನಾನು ನೀಡಿದ್ದ ದೂರು ಅರ್ಜಿಯಲ್ಲಿ ಹೇಳಿರುವುದೆಲ್ಲ ಸರಿಯಿದೆ ಎಂದೂ ಸ್ಪಷ್ಟನೆ ಕೊಟ್ಟಿದ್ದೇನೆ’ ಎಂದರು. ‘ನನ್ನ ದೂರಿಗೆ ಸಂಬಂಧಿಸಿದಂತೆ ರಾಜ್ಯಪಾಲರು ಮತ್ತಷ್ಟು ವಿವರಣೆ ಕೇಳಿದ್ದರು. ಈ ಹಿಂದೆ ಕೇಳಿದ್ದ ದಾಖಲೆಗಳ ಬಗ್ಗೆಯೂ ಚರ್ಚೆ ನಡೆಸಿದರು. ಹೆಚ್ಚುವರಿಯಾಗಿ ಯಾವುದೇ ದಾಖಲೆಗಳನ್ನು ನೀಡಿಲ್ಲ’ ಎಂದರು. ‘ಮೈಸೂರು ಲೋಕಾಯುಕ್ತದಲ್ಲಿ ನಾನು ನೀಡಿದ್ದ ದೂರಿಗೆ ಸಂಬಂಧಿಸಿದಂತೆ, ಪ್ರಾಸಿಕ್ಯೂಷನ್‌ ಬೇಡಿಕೆಗೆ ಪೂರಕವಾಗಿ ರಾಜ್ಯಪಾಲರು ಮುಖ್ಯಮಂತ್ರಿಗೆ ಶೋಕಾಸ್​ ನೋಟಿಸ್ ನೀಡಿದ್ದರು. ಆದರೆ ಮೂರು ತಾಸು ಸಚಿವ ಸಂಪುಟ ಸಭೆ ನಡೆಸಿದ ಸಚಿವರು, ರಾಜ್ಯಪಾಲರಿಗೆ ನಾನು ನೀಡಿದ್ದ ದೂರು ಅರ್ಜಿಯಲ್ಲಿರುವ ಯಾವುದೇ ತಪ್ಪುನ್ನು ಹೇಳಿಲ್ಲ. ಅದೆ ಬದಲು, ತಮ್ಮ ತಪ್ಪಿಲ್ಲ, ರಾಜ್ಯಪಾಲರು ನೊಟೀಸ್ ಕೊಟ್ಟಿದ್ದೇ ತಪ್ಪು ಎಂದು ನಿರ್ಣಯ ತೆಗೆದುಕೊಂಡಿದ್ದಾರೆ. ಟಿ.ಜೆ. ಅಬ್ರಹಾಂ ಸರಿಯಿಲ್ಲ ಎಂದೂ ಹೇಳಿದ್ದಾರೆ’ ಎಂದರು. ‘ರಾಜ್ಯಪಾಲರು ಸ್ಪಷ್ಟನೆ ಕೇಳಿದ್ದಾರೆ ಎಂದ ಮೇಲೆ ಪ್ರಕರಣವನ್ನು ಮುಂದುವರೆಸಲು ಅವರಿಗೆ ಆಸಕ್ತಿಯಿದೆ ಎಂದರ್ಥ. ರಾಜ್ಯಪಾಲರ ಭೇಟಿಗೆ ಕಳೆದ ಗುರುವಾರ ಸಮಯ ಕೇಳಿದ್ದೆ. ಇಂದು (ಮಂಗಳವಾರ) ಬರಲು ಹೇಳಿದ್ದರು. ಹೀಗಾಗಿ, ಭೇಟಿ ಮಾಡಿದ್ದೇನೆ’ ಎಂದರು. ‘ನನ್ನ ವಿರುದ್ಧ ಯಾವ ದೂರೂ ಇಲ್ಲ. ನನ್ನ ವಿರುದ್ಧದ ಪ್ರಕರಣಗಳನ್ನು ಹುಡುಕಿ, ಆಗದೇ ಇದ್ದರೆ ಹೇಗೆ ಹುಡುಕಬೇಕೆಂದು ನನ್ನನ್ನು ಕೇಳಿ’ ಎಂದು ಸರ್ಕಾರಕ್ಕೆ ಅಬ್ರಹಾಂ ಸವಾಲು ಹಾಕಿದರು.