ಸಂಪಾದಕೀಯ: ಆರ್ಥಿಕ ಬಿಕ್ಕಟ್ಟಿನಲ್ಲಿರುವ ಶ್ರೀಲಂಕಾ; ಪುನಶ್ಚೇತನಕ್ಕೆ ಒಂದು ಅವಕಾಶ

ಜೆವಿಪಿಗೆ ಭಾರತ ವಿರೋಧಿ ನಿಲುವಿನ ಇತಿಹಾಸವೇ ಇದೆ. ಜೊತೆಗೆ ಪಕ್ಷವು ಚೀನಾ ಪರ ವಾಲಿಕೊಂಡಿದೆ. ಈ ಎರಡೂ ಅಂಶಗಳನ್ನು ಜೆವಿಪಿ ಎಂದೂ ಅಡಗಿಸಿಟ್ಟಿಲ್ಲ. ಹಾಗಾಗಿ ಅನುರಾ ಅವರ ಆಯ್ಕೆಯು ಭಾರತದಲ್ಲಿ ಕಳವಳ ಮೂಡಿಸಬಹುದು. ಆದರೆ, ಅನುರಾ ಅವರು ಸೋಮವಾರ ಪ್ರಮಾಣವಚನ ಸ್ವೀಕರಿಸಿದ ಬಳಿಕ ನೀಡಿದ ಹಲವು ಸಂದರ್ಶನಗಳಲ್ಲಿ, ದಕ್ಷಿಣ ಏಷ್ಯಾದ ಅತ್ಯಂತ ದೊಡ್ಡ ಅರ್ಥ ವ್ಯವಸ್ಥೆ ಮತ್ತು ಅತೀ ಹತ್ತಿರದ ನೆರೆ ದೇಶವಾದ ಭಾರತವು ಶ್ರೀಲಂಕಾಕ್ಕೆ ಎಷ್ಟು ಮುಖ್ಯ ಎಂಬುದನ್ನು ಒಪ್ಪಿಕೊಂಡಿದ್ದಾರೆ. ಶ್ರೀಲಂಕಾಕ್ಕೆ ಭಾರತದ ಜೊತೆಗೆ ಭೌಗೋಳಿಕವಾಗಿ ಅಥವಾ ರಾಜಕೀಯವಾಗಿ ಯಾವುದೇ ತಗಾದೆ ಇಲ್ಲ ಎಂದೂ ಅವರು ಹೇಳಿದ್ದಾರೆ. ಆರ್ಥಿಕವಾಗಿ ಅವಲಂಬಿತವಾಗಿರುವ ಚೀನಾದ ಜೊತೆಗಿನ ಜೆವಿಪಿಯ ಸಂಬಂಧವನ್ನು ಅನುರಾ ಹೇಗೆ ನಿರ್ವಹಿಸಲಿದ್ದಾರೆ ಎಂಬುದರ ಮೇಲೆ ಅವರ ಬಗೆಗಿನ ಭಾರತದ ಗ್ರಹಿಕೆಯು ರೂಪುಗೊಳ್ಳಲಿದೆ. ಜೊತೆಗೆ ಭಾರತದ ಭದ್ರತಾ ಲೆಕ್ಕಾಚಾರವೂ ಅದನ್ನು ಆಧರಿಸಿದೆ. ಅನುರಾ ಅವರ ಆಯ್ಕೆ ಆಗುತ್ತಿದ್ದಂತೆಯೇ ಭಾರತವು ಅವರನ್ನು ಸಂಪರ್ಕಿಸಿ ಶುಭ ಹಾರೈಸಿದೆ. ಈ ವರ್ಷದ ಮಾರ್ಚ್‌ನಲ್ಲಿ ಅನುರಾ ಅವರೂ ಭಾರತಕ್ಕೆ ಬಂದಿದ್ದರು. ಹಾಗಾಗಿ, ಅವರ ಜೊತೆಗೆ ಒಂದು ರೀತಿಯ ಸೌಹಾರ್ದ ಸಂಬಂಧ ಈಗಾಗಲೇ ಸ್ಥಾಪಿತವಾಗಿದೆ. 

ಶ್ರೀಲಂಕಾದಲ್ಲಿರುವ ತಮಿಳರ ಹಕ್ಕುಗಳ ಕುರಿತ ಪ್ರಶ್ನೆಯು ತೆರೆಮರೆಗೆ ಸರಿದು ಬಹಳ ಕಾಲವೇ ಆಗಿದೆ. ಅದರ ಬದಲಿಗೆ, ದ್ವೀಪರಾಷ್ಟ್ರದ ಮೇಲೆ ಚೀನಾದ ಪ್ರಭಾವವು ಭಾರತಕ್ಕೆ ಹೆಚ್ಚು ಚಿಂತೆಯ ವಿಷಯವಾಗಿದೆ. ಹೊಸ ಸಂವಿಧಾನ ರಚಿಸುವ ಇಂಗಿತವನ್ನು ಅನುರಾ ವ್ಯಕ್ತಪಡಿಸಿದ್ದಾರೆ. ಈ ವಿಚಾರವು ಭಾರತಕ್ಕೆ ಹೆಚ್ಚು ಕಳವಳ ಮೂಡಿಸಬಹುದು. ಶ್ರೀಲಂಕಾದ ಸಂವಿಧಾನಕ್ಕೆ ಭಾರತದ ಒತ್ತಾಸೆ ಮೇರೆಗೆ 1987ರಲ್ಲಿ 13ನೇ ತಿದ್ದುಪಡಿ ಮಾಡಲಾಗಿತ್ತು. ಈ ತಿದ್ದುಪಡಿಯನ್ನು ರದ್ದು ಮಾಡಬೇಕು ಎಂಬ ಬೇಡಿಕೆ ಜೆವಿಪಿ ಸೇರಿ ಹಲವು ವರ್ಗಗಳಿಂದ ಬಂದಿದೆ. ಸಂವಿಧಾನ ಬದಲಾವಣೆಯು ಶ್ರೀಲಂಕಾದಲ್ಲಿ ಭಾರಿ ಕೋಲಾಹಲಕ್ಕೆ ಕಾರಣವಾಗಬಹುದು. ತಮಿಳು ಭಾಷಿಕರ ಜೊತೆಗೆ ಅಧಿಕಾರ ಹಂಚಿಕೆಗೆ ಇರುವ ಏಕೈಕ ಮಾರ್ಗ ಇದಾಗಿದೆ. ಸಂವಿಧಾನದಲ್ಲಿಯೇ ಈ ವಿಚಾರ ಇದ್ದರೂ ಅದನ್ನು ಪೂರ್ಣವಾಗಿ ಜಾರಿಗೊಳಿಸಲು ಇನ್ನೂ ಸಾಧ್ಯವಾಗಿಲ್ಲ. ತಮಿಳು ಭಾಷಿಕರಿಗೆ ಸಂಬಂಧಿಸಿದ ಈ ವಿಚಾರದಲ್ಲಿ ಆಗುವ ಯಾವುದೇ ಬದಲಾವಣೆಯು ತಮಿಳು ‍ಪ್ರಶ್ನೆಯನ್ನು ಮುನ್ನೆಲೆಗೆ ತರುತ್ತದೆ; ಭಾರತದ ಜೊತೆಗಿನ ಸಂಬಂಧದ ಮೇಲೆಯೂ ಇದು ಪರಿಣಾಮ ಬೀರುತ್ತದೆ. ಶ್ರೀಲಂಕಾದ ಜನರು ಅನುರಾ ಅವರನ್ನು ಬಹುಮತದಿಂದ ಆಯ್ಕೆ ಮಾಡಿದ್ದಾರೆ. ಜನರ ಆಯ್ಕೆಯನ್ನು ಭಾರತವು ಗೌರವಿಸಲೇಬೇಕು. ಚಾರಿತ್ರಿಕವಾದ ಈಗಿನ ಪಲ್ಲಟವು ಅತ್ಯಂತ ಶಾಂತಿಯುತ ರೀತಿಯಲ್ಲಿಯೇ ನಡೆದಿದೆ ಎಂಬುದೂ ಗಮನಾರ್ಹ. ಭಾರತ–ಶ್ರೀಲಂಕಾ ಸಂಬಂಧದಲ್ಲಿ ಏರುಪೇರುಗಳು ಕಾಣಿಸಿಕೊಳ್ಳಬಹುದು. ಆದರೆ, ಪರಿಸ್ಥಿತಿಯು ವಿಷಮಗೊಳ್ಳದಂತೆ ರಾಜತಾಂತ್ರಿಕ ದಾರಿಯ ಮೂಲಕ ನೋಡಿಕೊಳ್ಳಬೇಕು.