Ball Tampering | 'ಪಾಠ ಕಲಿಸಬೇಡಿ': ರೋಹಿತ್‌ಗೆ ಮತ್ತೆ ಇಂಜಮಾಮ್ ತಿರುಗೇಟು

ಬೆಂಗಳೂರು: ಐಸಿಸಿ ಟ್ವೆಂಟಿ-20 ವಿಶ್ವಕಪ್ ಟೂರ್ನಿಯಲ್ಲಿ ಭಾರತೀಯ ಆಟಗಾರರ ವಿರುದ್ಧ ಚೆಂಡು ವಿರೂಪಗೊಳಿಸಿದ ಆರೋಪಕ್ಕೆ ಸಂಬಂಧಿಸಿದಂತೆ ಪಾಕಿಸ್ತಾನದ ಮಾಜಿ ನಾಯಕ ಇಂಜಮಾಮ್ ಉಲ್ ಹಕ್, ಮಗದೊಮ್ಮೆ ವಾಗ್ದಾಳಿ ನಡೆಸಿದ್ದಾರೆ.

ಭಾರತದ ನಾಯಕ ರೋಹಿತ್ ಶರ್ಮಾ ಹೇಳಿಕೆಗೆ ತಿರುಗೇಟು ನೀಡಿರುವ ಇಂಜಮಾಮ್, 'ಖಂಡಿತವಾಗಿಯೂ ಮನಸ್ಸನ್ನು ನಾವು ತೆರೆದು ನೋಡಲಿದ್ದೇವೆ. ಪಾಠ ಹೇಳಿ ಕೊಟ್ಟವರಿಗೆ ಪಾಠ ಕಲಿಸಬೇಡಿ' ಎಂದು ಹೇಳಿದ್ದಾರೆ.

ಪಾಕಿಸ್ತಾನದ 24 ನ್ಯೂಸ್ ಚಾನೆಲ್‌ನ 'ವರ್ಲ್ಡ್ ಕಪ್ ಹಂಗಾಮಾ' ಕಾರ್ಯಕ್ರಮದಲ್ಲಿ ಈ ಕುರಿತು ಮಾತನಾಡಿರುವ ಇಂಜಮಾಮ್, 'ಮೊದಲನೇಯದಾಗಿ ಚೆಂಡು ರಿವರ್ಸ್ ಸ್ವಿಂಗ್ ಆಗುತ್ತಿದೆ ಎಂಬುದನ್ನು ರೋಹಿತ್ ಶರ್ಮಾ ಒಪ್ಪಿಕೊಂಡಿದ್ದಾರೆ. ಅಂದರೆ ನಾವು ಹೇಳಿರುವುದು ಸರಿಯಾಗಿಯೇ ಇದೆ' ಎಂದು ಹೇಳಿದ್ದಾರೆ.

'ಎರಡನೇಯದಾಗಿ ಚೆಂಡು ರಿವರ್ಸ್ ಸ್ವಿಂಗ್ ಹೇಗೆ ಆಗುತ್ತೇ, ಎಷ್ಟು ಬಿಸಿಲಿನಲ್ಲಿ ಆಗುತ್ತೇ, ಯಾವ ಪಿಚ್‌ನಲ್ಲಿ ಆಗುತ್ತದೆ ಎಂಬುದನ್ನು ರೋಹಿತ್ ಶರ್ಮಾ ನಮಗೆ ಹೇಳುವ ಅಗತ್ಯವಿಲ್ಲ. ಜಗತ್ತಿಗೆ ಅದನ್ನು ಹೇಳಿಕೊಟ್ಟವರಿಗೆ ಹೇಳಿಕೊಡುವ ಅಗತ್ಯವಿಲ್ಲ. ಈ ರೀತಿಯ ಮಾತು ಉತ್ತಮವಲ್ಲ ಎಂದು ಅವರಿಗೆ (ರೋಹಿತ್) ಹೇಳಿ' ಎಂದು ಉತ್ತರಿಸಿದ್ದಾರೆ.