IND vs NZ | ಮುಂಬೈ ಟೆಸ್ಟ್‌ನಲ್ಲೂ ಮುಖಭಂಗ: ಕ್ಲೀನ್ ಸ್ವೀಪ್ ಮಾಡಿದ ಕಿವೀಸ್

ದುಬೈ: ಭಾರತ ತಂಡವು 0-3ರಿಂದ ನ್ಯೂಜಿಲೆಂಡ್ ವಿರುದ್ಧ ಸರಣಿ ಸೋತ ನಂತರ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್ ಪಾಯಿಂಟ್‌ ಪಟ್ಟಿಯಲ್ಲಿ ಅಗ್ರಸ್ಥಾನ ಕಳೆದುಕೊಂಡು, ಎರಡನೇ ಸ್ಥಾನಕ್ಕೆ ಸರಿದಿದೆ. ಹಾಲಿ ಡಬ್ಲ್ಯುಟಿಸಿ ವರ್ಷದಲ್ಲಿ ಭಾರತಕ್ಕೆ ಇದು ಐದನೇ ಸೋಲು. ಕಿವೀಸ್‌ ವಿರುದ್ಧ ಕೊನೆಯ ಪಂದ್ಯದ ಸೋಲಿನ ಬಳಿಕ ಪಿಸಿಟಿ ಪ್ರಮಾಣ ಶೇ 62.82ರಿಂದ 58.33ಕ್ಕೆ ಇಳಿಸಿದೆ. ಎರಡನೇ ಸ್ಥಾನದಲ್ಲಿದ್ದ ಹಾಲಿ ಚಾಂಪಿಯನ್‌ ಆಸ್ಟ್ರೇಲಿಯಾ (62.50) ಅಗ್ರಸ್ಥಾನಕ್ಕೆ ಏರಿದೆ. ಸತತ ಮೂರನೇ ಬಾರಿಗೆ ವಿಶ್ವ ಟೆಸ್ಟ್‌ ಚಾಂಪಿಯನ್‌ಪಿಪ್‌ ಫೈನಲ್‌ ತಲುಪುವ ಪ್ರಯತ್ನದಲ್ಲಿದ್ದ ಭಾರತ ತಂಡಕ್ಕೆ ನ್ಯೂಜಿಲೆಂಡ್‌ ತಂಡವು ಹ್ಯಾಟ್ರಿಕ್‌ ಸೋಲಿನ ಆಘಾತ ನೀಡಿದೆ. ಹಾಲಿ ಡಬ್ಲ್ಯುಟಿಸಿ ವರ್ಷದಲ್ಲಿ ಭಾರತಕ್ಕೆ ಇನ್ನು ಉಳಿದಿರುವುದು ಆಸ್ಟ್ರೇಲಿಯಾ ವಿರುದ್ಧದ ಸರಣಿಯ ಐದು ಪಂದ್ಯಗಳು ಮಾತ್ರ. ಫೈನಲ್‌ಗೆ ನೇರ ಅರ್ಹತೆ ಪಡೆಯಲು ಈ ಐದು ಪಂದ್ಯಗಳ ಪೈಕಿ ಕನಿಷ್ಠ ನಾಲ್ಕನ್ನು ಗೆಲ್ಲಲೇಬೇಕಾದ ಒತ್ತಡವಿದೆ. ನ್ಯೂಜಿಲೆಂಡ್‌ ಸರಣಿಗೆ ಮೊದಲು ಭಾರತ ತಂಡವು ಡಬ್ಲ್ಯುಟಿಸಿ ಫೈನಲ್ ತಲುಪುವ ನೆಚ್ಚಿನ ತಂಡವಾಗಿತ್ತು.

ಮುಂಬೈ: ‘ನ್ಯೂಜಿಲೆಂಡ್ ಎದುರಿನ 0–3 ಸರಣಿ ಸೋಲು ನನ್ನ ಕ್ರಿಕೆಟ್‌ ಜೀವನದ ಅತ್ಯಂತ ಹಿನ್ನಡೆಯ ಗಳಿಗೆ. ಇದರ ಸಂಪೂರ್ಣ ಹೊಣೆಯನ್ನು ನಾನೇ ಹೊತ್ತುಕೊಳ್ಳುವೆ’ ಎಂದು ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ಭಾನುವಾರ ಪ್ರತಿಕ್ರಿಯಿಸಿದ್ದಾರೆ. ‘ಹೌದು, ಇಂಥ ಕಹಿ ಅನುಭವವನ್ನು ಅರಗಿಸಿಕೊಳ್ಳುವುದು ಕಷ್ಟ. ತವರಿನಲ್ಲಿ ಟೆಸ್ಟ್‌ ಸೋಲು, ಸರಣಿ ಸೋಲನ್ನು ಜೀರ್ಣಿಸಿಕೊಳ್ಳುವುದು ಕಷ್ಟ. ನಾವು ಉತ್ತಮವಾಗಿ ಆಡಲಿಲ್ಲ. ನ್ಯೂಜಿಲೆಂಡ್ ಸರಣಿಯುದ್ದಕ್ಕೂ ಚೆನ್ನಾಗಿ ಆಡಿತು. ನಾವು ಅನೇಕ ತಪ್ಪುಗಳನ್ನು ಎಸಗಿದೆವು’ ಎಂದು ಅವರು ಭಾನುವಾರ ಮೂರನೇ ಟೆಸ್ಟ್‌ ಸೋಲಿನ ನಂತರ ಪತ್ರಿಕಾಗೋಷ್ಠಿಯಲ್ಲಿ ವಿಶ್ಲೇಷಿಸಿದರು. ‘ಮೊದಲ ಎರಡು ಟೆಸ್ಟ್‌ಗಳಲ್ಲಿ ನಾವು ಮೊದಲ ಇನಿಂಗ್ಸ್‌ನಲ್ಲಿ ಉತ್ತಮ ಮೊತ್ತ ಗಳಿಸಲಿಲ್ಲ. ಈ ಪಂದ್ಯದಲ್ಲಿ 28 ರನ್ ಲೀಡ್ ಪಡೆದೆವು. ಸಾಧಿಸಬಹುದಾದ ಗುರಿ ನಮ್ಮ ಮುಂದಿತ್ತು. ತಂಡವಾಗಿ ನಾವು ವಿಫಲವಾಗಿದ್ದೇವೆ. ಇಂಥ ಗುರಿ ಎದುರಿಸುವಾಗ ಉತ್ತಮ ಆರಂಭ ಪಡೆಯಬೇಕಾಗುತ್ತದೆ. ಆದರೆ ಹಾಗೆ ಆಗಲಿಲ್ಲ’ ಎಂದರು. ತಮ್ಮ ವೈಯಕ್ತಿಕ ಬ್ಯಾಟಿಂಗ್ ಬಗ್ಗೆಯೂ ನಿರಾಸೆ ವ್ಯಕ್ತಪಡಿಸಿದರು. ‘ನಾನು ನಿರ್ದಿಷ್ಟ ಯೋಜನೆಯೊಡನೆ ಕಣಕ್ಕಿಳಿಯುತ್ತೇನೆ. ಆದರೆ ಈ ಸರಣಿಯಲ್ಲಿ ಅವು ಯಾವುದೂ ಕೈಗೂಡಲಿಲ್ಲ. ಪರಿಸ್ಥಿತಿಗೆ ಅನುಗುಣವಾಗಿ ನಾವು ಆಡಲಿಲ್ಲ’ ಎಂದು ಒಪ್ಪಿಕೊಂಡರು. ‘ನಾಯಕನಾಗಿ ತಂಡವನ್ನು ಮುನ್ನಡೆಸುವಲ್ಲಿ ನಾನು ನಿರೀಕ್ಷಿತ ಮಟ್ಟ ತಲುಪಲಿಲ್ಲ. ವೈಯಕ್ತಿಕವಾಗಿ ನನ್ನ ಬ್ಯಾಟಿಂಗ್ ಕೂಡ ನಿರಾಸೆ ಮೂಡಿಸಿದೆ. ತಂಡ ಸಾಂಘಿಕವಾಗಿ ಆಡುವಲ್ಲಿ ವಿಫಲವಾಗಿದೆ’ ಎಂದರು. ತಂಡದ ಕೋಚ್ ಗೌತಮ್ ಗಂಭೀರ್‌, ನೆರವು ಸಿಬ್ಬಂದಿಯಾದ ನೆದರ್ಲೆಂಡ್ಸ್‌ನ ರಯಾನ್ ಟೆನ್‌ ಡೋಷೆ ಮತ್ತು ಅಭಿಷೇಕ್ ನಾಯರ್ ಅವರನ್ನು ರೋಹಿತ್‌ ಸಮರ್ಥಿಸಿಕೊಂಡರು.

ಮುಂಬೈ: ಭಾರತ ತಂಡ ಆತ್ಮಾಲೋಕನ ಮಾಡಿಕೊಳ್ಳಬೇಕು. ಟೆಸ್ಟ್‌ ಮಾದರಿಯಲ್ಲಿ ಅನಗತ್ಯ ಪ್ರಯೋಗಕ್ಕೆ ಮುಂದಾಗಬಾರದು ಮತ್ತು ಉತ್ತಮ ಪಿಚ್‌ಗಳಲ್ಲಿ ಆಡಲು ಮುಂದಾಗಬೇಕು ಎಂದು ಭಾರತ ಕ್ರಿಕೆಟ್‌ ತಂಡದ ಮಾಜಿ ತಾರೆಗಳಾದ ಸಚಿನ್ ತೆಂಡೂಲ್ಕರ್‌, ವೀರೇಂದ್ರ ಸೆಹ್ವಾಗ್ ಮತ್ತು ಹರಭಜನ್ ಸಿಂಗ್ ಸಲಹೆ ನೀಡಿದ್ದಾರೆ. ಟಾಮ್‌ ಲೇಥಮ್ ಸಾರಥ್ಯದ ನ್ಯೂಜಿಲೆಂಡ್ ಎದುರು ಟೆಸ್ಟ್‌ ಸರಣಿಯನ್ನು 0–3 ರಿಂದ ಶೋಚನೀಯವಾಗಿ ಸೋತ ನಂತರ ಅಭಿಮಾನಿಗಳೂ ಆಕ್ರೋಶಗೊಂಡಿದ್ದಾರೆ. ‘ತವರಿನಲ್ಲಿ ಈ ರೀತಿ ಸೋತಿದ್ದನ್ನು ಜೀರ್ಣಿಸಿಕೊಳ್ಳುವುದು ಕಷ್ಟ. ಆತ್ಮಾವಲೋಕನಕ್ಕೆ ಇದು ಸಕಾಲ. ಸಿದ್ಧತೆಯ ಕೊರತೆ ಕಾರಣವೇ ಅಥವಾ ಹೊಡೆತಗಳ ಆಯ್ಕೆಯಲ್ಲಿ ಎಡವಿದ್ದು ಕಾರಣವೇ?’ ಎಂದು ತೆಂಡೂಲ್ಕರ್ ‘ಎಕ್ಸ್‌’ನಲ್ಲಿ ಪೋಸ್ಟ್‌ ಹಾಕಿದ್ದಾರೆ. ಗಿಲ್ ಮೊದಲ ಇನಿಂಗ್ಸ್‌ನಲ್ಲಿ ದಿಟ್ಟವಾಗಿ ಆಡಿದರು. ಪಂತ್‌ ಎರಡೂ ಇನಿಂಗ್ಸ್‌ಗಳಲ್ಲಿ ಅಮೋಘವಾಗಿದ್ದರು. ಇಂಥ ಸವಾಲಿನ ಪಿಚ್‌ನಲ್ಲಿ ಅವರ ಪಾದಚಲನೆಯ ರೀತಿ ಎದ್ದುಕಂಡಿತು. ಅವರ ಆಟ ಅತ್ಯಾಕರ್ಷಕ’ ಎಂದು ತೆಂಡೂಲ್ಕರ್ ಉಲ್ಲೇಖಿಸಿದ್ದಾರೆ. ‘ಇಂಥ ವೇಳೆಯೂ ಅಭಿಮಾನಿಗಳೂ ತಂಡಕ್ಕೆ ಬೆಂಬಲ ನೀಡುವುದು ಸಹಜ. ಆದರೆ ಇದು ನಮ್ಮ ತಂಡದ ಅತಿ ಕಳಪೆ ಆಟ’ ಎಂದು ಮಾಜಿ ಆರಂಭ ಆಟಗಾರ ಸೆಹ್ವಾಗ್ ಹೇಳಿದ್ದಾರೆ.‌

ಮುಂಬೈ (ಪಿಟಿಐ): ‘ಈ ಸರಣಿ ನಮ್ಮ ಪಾಲಿಗೆ ಅವಿಸ್ಮರಣೀಯ. ಇದೊಂದು ಅಗಾಧ ಸಾಧನೆ. ಮೊದಲ ಟೆಸ್ಟ್‌ ಗೆಲುವು ವಿಶೇಷವಾಗಿತ್ತು. ಎರಡನೇ ಟೆಸ್ಟ್ ಹಾಗೂ ಸರಣಿ ಗೆಲುವು ಅದಕ್ಕಿಂತ ಹೆಚ್ಚು ವಿಶೇಷವಾದುದು’ ಎಂದು ನ್ಯೂಜಿಲೆಂಡ್ ನಾಯಕ ಟಾಮ್ ಲೇಥಮ್ ಸಂತಸ ವ್ಯಕ್ತಪಡಿಸಿದರು. ‘ಈ ಸರಣಿ ಗೆಲುವಿನ ನೈಜ ಖುಷಿಯನ್ನು ತವರಿಗೆ ಮರಳಿದ ನಂತರ ಅನುಭವಿಸುತ್ತೇವೆ. ಇದು ನ್ಯೂಜಿಲೆಂಡ್ ಕ್ರಿಕೆಟ್‌ಗೆ ಮಹತ್ವಪೂರ್ಣ ಗಳಿಗೆ. ನ್ಯೂಜಿಲೆಂಡ್ ಕ್ರಿಕೆಟ್ ಗಳಿಸಿದ ಅತಿ ಶ್ರೇಷ್ಠ ಸರಣಿ ಗೆಲುವು’ ಎಂದು ಅವರು ಬಣ್ಣಿಸಿದರು.