Paris Olympics: 100 ಗ್ರಾಂ ತೂಕದಿಂದ ಭಾರತದ ಕನಸು ಛಿದ್ರ

ವಿನೇಶ್ ಅವರನ್ನು 50 ಕೆ.ಜಿ ತೂಕದ ವ್ಯಾಪ್ತಿಗೆ ತರಲು ತಂಡದ ನೆರವು ಸಿಬ್ಬಂದಿಯು ಸಕಲ ಪ್ರಯತ್ನಗಳನ್ನೂ ಮಾಡಿತ್ತು. ವಿನೇಶ್ ಅವರ ತಲೆಗೂದಲನ್ನೂ ಕತ್ತರಿಸಲಾಗಿತ್ತು. ವಿನೇಶ್‌ ಸಹ ದೇಹವನ್ನು ದಂಡಿಸಿದ್ದರು. ಆದರೂ ತೂಕವನ್ನು ನಿಗದಿತ ಮಿತಿಗೆ ತರಲು ಸಾಧ್ಯವಾಗಲಿಲ್ಲ ಎಂದು ತಂಡದ ಮುಖ್ಯ ವೈದ್ಯಾಧಿಕಾರಿ ದಿನ್‌ಶಾ ಪಾರ್ದಿವಾಲಾ ಹೇಳಿದ್ದಾರೆ.

ಕುಸ್ತಿಯಲ್ಲಿ ಅತ್ಯಂತ ಹಿರಿಯ ಕ್ರೀಡಾಳುವಾಗಿರುವ ವಿನೇಶ್‌ ಅವರ ದೇಹದ ತೂಕ 56 ಕೆ.ಜಿ ಇತ್ತು. ಅವರು ಹಲವು ವರ್ಷಗಳಿಂದ 53 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಿದ್ದರು. ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ಅವರು 53 ಕೆಜಿ ವಿಭಾಗದಲ್ಲಿ ದೇಶವನ್ನು ಪ್ರತಿನಿಧಿಸಿದ್ದರು. ಆದರೆ ಪ್ಯಾರಿಸ್‌ ಒಲಿಂಪಿಕ್ಸ್‌ಗೆ ಕ್ರೀಡಾಪಟುಗಳನ್ನು ಆಯ್ಕೆ ಮಾಡುವುದಕ್ಕಾಗಿ ಭಾರತೀಯ ಕುಸ್ತಿ ಫೆಡರೇಷನ್ ನಡೆಸಿದ್ದ ಟ್ರಯಲ್ಸ್‌ನಲ್ಲಿ ವಿನೇಶ್ 53 ಕೆಜಿ ವಿಭಾಗದ ಸೆಮಿಫೈನಲ್‌ ನಲ್ಲಿ ಸೋತಿದ್ದರು. ಅಂತಿಮ್ ಪಂಘಲ್ ಆ ವಿಭಾಗದಲ್ಲಿ ಸ್ಥಾನ ಪಡೆದು ಪ್ಯಾರಿಸ್‌ಗೆ ತೆರಳಿದ್ದರು. ಇದರಿಂದಾಗಿ ತಮ್ಮ ಪಾಲಿಗೆ ಇದ್ದ 50 ಕೆಜಿ ವಿಭಾಗದ ಏಕೈಕ ಅವಕಾಶವನ್ನು ನೆಚ್ಚಿಕೊಂಡರು. ‘ಮೂರು ಕೆ.ಜಿ ತೂಕವನ್ನು ಇಳಿಸಿಕೊಂಡು ಕಣಕ್ಕಿಳಿಯುವುದು ಕಡುಕಠಿಣವಾದ ಪ್ರಕ್ರಿಯೆ. ಅದರಲ್ಲೂ ಒಂದೇ ದಿನ ಮೂರು ಬೌಟ್‌ಗಳಲ್ಲಿ ಸೆಣಸಿದ ನಂತರ ತೂಕ ನಿರ್ವಹಣೆ ಮತ್ತಷ್ಟು ಕ್ಲಿಷ್ಟ. ಇಂತಹ ಸಂದರ್ಭದಲ್ಲಿ ಉಪವಾಸವಿದ್ದು ತೂಕ ಇಳಿಸುವುದು ಸಾಧ್ಯವಾಗದ ಮಾತು. ಕುಸ್ತಿ ಆಡಲು ಶಕ್ತಿ ಮರುಪೂರಣಗೊಳಿಸಿಕೊಳ್ಳಲು ಆಹಾರಸೇವನೆ ಅಗತ್ಯವಾಗುತ್ತದೆ. ವಿನೇಶ್ ಕೂಡ ಅದೇ ರೀತಿ ಮಾಡಿದರು. ಅದರ ನಂತರ ಹೆಚ್ಚಿದ ತೂಕ ಇಳಿಸಲು ಅವಿರತವಾಗಿ ಶ್ರಮಿಸಿದರು. ಪದಕಕ್ಕಾಗಿ ಆಕೆ ಅಪ್ಪಟ ಚಾಂಪಿಯನ್ ರೀತಿಯಲ್ಲಿ ಹೋರಾಡಿದರು. ಆದರೆ ನಿರಾಶೆ ತಪ್ಪಲಿಲ್ಲ. ಇದು ದುಃಖಕರ ಸಂಗತಿ‘ ಎಂದು ಕೋಚ್ ಒಬ್ಬರು (ಹೆಸರು ಗೌಪ್ಯವಾಗಿಡಲಾಗಿದೆ) ವಿವರಿಸಿದರು. ತೂಕ ನಿರ್ವಹಣೆಗಾಗಿ ಅಪಾರವಾಗಿ ವ್ಯಾಯಾಮ ಮಾಡಿ ದೇಹ ದಂಡಿಸಿದ್ದ ವಿನೇಶ್ ಅವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಅವರ ಆರೋಗ್ಯ ಉತ್ತಮವಾಗಿದೆ. ಆದರೆ ಅವರ ಮನಸ್ಸಿನ ಗಾಯದ ನೋವು ಮಾಯುವುದು ಅಷ್ಟು ಸುಲಭವಲ್ಲ.

‘ಪದಕ ಗೆಲ್ಲಲು ಸಾಧ್ಯವಾಗದಿರುವುದು ದುರದೃಷ್ಟಕರ. ಆದರೆ ಇವೆಲ್ಲವೂ ಕ್ರೀಡೆಯ ಭಾಗ' ಎಂದು ವಿನೇಶ್‌ ಫೋಗಟ್‌ ಅವರು ತಮ್ಮನ್ನು ತಾವೇ ಸಮಾಧಾನಪಡಿಸಿಕೊಂಡಿರುವುದಾಗಿ ಭಾರತದ ಕೋಚ್‌ ವಿರೇಂದರ್ ದಹಿಯಾ ತಿಳಿಸಿದ್ದಾರೆ. ‘ವಿನೇಶ್‌ ಅನರ್ಹಗೊಂಡಿರುವ ಸುದ್ದಿ ನಮ್ಮೆಲ್ಲರನ್ನು ಆಘಾತ ಗೊಳಿಸಿತ್ತು. ನಾವು ವಿನೇಶ್‌ ಅವರನ್ನು ಭೇಟಿಯಾಗಿ ಸಂತೈಸಲು ಪ್ರಯತ್ನಿಸಿದೆವು. ಆದರೆ, ಆಕೆ ಧೈರ್ಯಶಾಲಿ. ಆಕೆಯೇ ನಮ್ಮನ್ನು ಸಮಾಧಾನ ಪಡಿಸಿದರು’ ಎಂದು ದಹಿಯಾ ತಿಳಿಸಿದ್ದಾರೆ.

ವಿನೇಶ್ ಫೋಗಟ್ ಅವರು ತಮ್ಮನ್ನು ಅನರ್ಹಗೊಳಿಸಿರುವ ಕ್ರಮವನ್ನು ಪ್ರಶ್ನಿಸಿ ಕ್ರೀಡಾ ನ್ಯಾಯ ಮಂಡಳಿಗೆ ಮೇಲ್ಮನವಿ ಸಲ್ಲಿಸಿದ್ದಾರೆ. ತಮಗೆ ಜಂಟಿ ಬೆಳ್ಳಿ ಪದಕ ನೀಡಬೇಕು ಎಂದೂ ವಿನೇಶ್ ಬೇಡಿಕೆ ಸಲ್ಲಿಸಿದ್ದಾರೆ. ವಿನೇಶ್ ಅವರು ಮೇಲ್ಮನವಿ ಸಲ್ಲಿಸಿರುವುದನ್ನು ಐಒಎ (ಭಾರತ ಒಲಿಂಪಿಕ್ ಸಂಸ್ಥೆ)ಯ ಮೂಲಗಳು ಖಚಿತಪಡಿಸಿವೆ. ‘ಹೌದು ಈ ಕುರಿತು ನಮಗೆ ಮಾಹಿತಿ ಬಂದಿದೆ. ಆವರ (ವಿನೇಶ್) ತಂಡವು ಈ ಕಾರ್ಯ ಮಾಡಿದೆ’ ಎಂದು ಮೂಲಗಳು ತಿಳಿಸಿವೆ. ಪ್ಯಾರಿಸ್ ಒಲಿಂಪಿಕ್ಸ್‌ನಲ್ಲಿ ವ್ಯಾಜ್ಯಗಳನ್ನು ಬಗೆಹರಿಸಲು ಹಂಗಾಮಿ ವಿಭಾಗವೊಂದನ್ನು ಆರಂಭಿಸಲಾಗಿದೆ. ಈ ವಿಭಾಗಕ್ಕೆ ವಿನೇಶ್ ಮನವಿ ಸಲ್ಲಿಸಿದ್ದಾರೆ. ಅವರ ಮನವಿಯ ಪರಿಶೀಲನೆಯು ಗುರುವಾರ ಬೆಳಿಗ್ಗೆ ನಡೆಯಲಿದೆ.