ಚಿತ್ರತುರಗನ್ಯಾಯ

(ವಿ.ಸೂ. ‘ಶ್ರೀವಧುವಿನಂಬಕಚಕೋರಕಂ ಪೊರೆಯೆ...’ ಎಂಬಂತೆ ವಾಚಿಸಬಹುದು)

. ಹೀಗೊಂದು ರಾತ್ರಿಯಲಿ ಹಾಗೊಂದು ಅರೆಗನಸು: ಗೋಡೆ ಮೇಲಿಳಿಬಿಟ್ಟ ಕಟ್ಟು ಹಾಕಿದ ಚಿತ್ರ ಹುಲ್ಲು ಮೇಯುತ್ತಿದ್ದ ಕುದುರೆ ಕತ್ತನು ಚಾಚಿ ಬೀರುವಿನ ಮೇಲಿದ್ದ ಪತ್ರಿಕೆಯನೆಳೆದಾಗ

. ಪೇಪರಿನ ಚಿತ್ರದಿಂದಿಳಿದ ಒಂದಿಷ್ಟು ಜನ ಚೂರಿಚೈನನು ಹಿಡಿದು ಜಲ್ಲಿಕಲ್ಲುಗಳೆತ್ತಿ ಒಗೆದಾಡತೊಡಗಿದರೆ ನಮ್ಮ ಕಿಟಕಿಯ ಗಾಜು ಪುಡಿಯಾಗಿ ಸಿಡಿಸಿಡಿದು ಕಿಡಿಹೊತ್ತಿ ಉರಿವಾಗ

. ಮೈಬೆವರಿ ಉಬ್ಬರಿಸಿ ಉಸಿರು ನಿಂತಂತಾಗಿ ಹೊರಗೋಡಲೆಂಬಂತೆ ಬಾಗಿಲೊಳು ಹೊಕ್ಕಾಗ ಮೂಗು ಗೋಡೆಗೆ ಬಡಿದು ಅದು ಬಾಗಿಲಿನ ಚಿತ್ರ ಮಾತ್ರವೆಂಬುದು ತಿಳಿದು ಕಿರುಚಿದ್ದು ಅದು ಸತ್ಯ;

. ಕುದುರೆ ಸುಳ್ಳಿರಬಹುದು, ಮೆಂದದ್ದು ಸುಳ್ಳಲ್ಲ ಬೆಂಕಿ ಕಿಡಿ ಸುಳ್ಳು ನಿಜ; ಬೆವರಿದ್ದು ಸುಳ್ಳಲ್ಲ ಮಾತು ಸುಳ್ಳಿದ್ದೀತು ಅದರರ್ಥ ಸುಳ್ಳಲ್ಲ ಕಥೆಯಾದರೇನಂತೆ ಕಥನವಿದು ಸುಳ್ಳಲ್ಲ

ಅಂದುಕೊಳ್ಳುತ ನಾನು ಹೊರಹೊರಳಿ ಮಲಗಿದೆನು ಜೈ ಹಿಂದ್... ಜೈ ಕರ್ನಾ... ಟಕಾ...

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.