ಪ್ರಶ್ನೋತ್ತರ ಅಂಕಣ: MFಗಳಲ್ಲಿ ಹೆಚ್ಚಿನ ಆದಾಯ ಪಡೆಯುವುದು ಹೇಗೇ?

ಮ್ಯೂಚುವಲ್ ಫಂಡ್ ಸಂಸ್ಥೆಗಳು ಸಾಮಾನ್ಯವಾಗಿ ತಮ್ಮ ಬೆಂಚ್ ಮಾರ್ಕ್ ರಿಟರ್ನ್‌ ಅನ್ನು ಆಯಾ ವಿಭಾಗದ ಸೂಚ್ಯಂಕದ ಮೌಲ್ಯಕ್ಕೆ ಹೋಲಿಕೆ ಮಾಡುತ್ತವೆ. ಇದು ಆಯಾ ಸ್ಕೀಂ ನಿಗದಿತ ಬೆಂಚ್ ಮಾರ್ಕ್ ಸೂಚ್ಯಂಕಕ್ಕಿಂತ ಉತ್ತಮವಾಗಿ ನಿರ್ವಹಿಸಲ್ಪಟ್ಟಿದೆಯೇ, ಇಲ್ಲವೇ ಎಂಬುದನ್ನು ಹೂಡಿಕೆದಾರರಿಗೆ ಮನವರಿಕೆ ಮಾಡಿ ಕೊಡುತ್ತದೆ. ಪ್ರೈಸ್ ರಿಟರ್ನ್ ಇಂಡೆಕ್ಸ್ ಕೇವಲ ಮೌಲ್ಯದಲ್ಲಿ ಆಗುವ ಏರಿಳಿತವನ್ನು ಮಾತ್ರ ಪರಿಗಣಿಸಿ ಲಾಭದ ಪ್ರಮಾಣ ನಿರ್ಧರಿಸುತ್ತದೆ. ಆದರೆ, ಟೋಟಲ್ ರಿಟರ್ನ್ಸ್ ಇಂಡೆಕ್ಸ್ ಆಯಾ ಸ್ಕೀಂ ಬಿಡುಗಡೆ ಮಾಡಿದ ಡಿವಿಡೆಂಡ್ (ಲಾಭಾಂಶ) ಇತ್ಯಾದಿಯನ್ನೂ ಪರಿಗಣಿಸಿ ಫಂಡ್ ನೀಡಿರುವ ಲಾಭದ ನಿಖರ ಮಾಹಿತಿಯನ್ನು ಹೂಡಿಕೆದಾರರಿಗೆ ನೀಡುತ್ತದೆ. ಹೀಗಾಗಿ, ಹೂಡಿಕೆದಾರರು ಟಿಆರ್‌ಐ ಸಹಿತವಾದ ಹೋಲಿಕೆಯು ಹೆಚ್ಚು ಸಮಂಜಸವಾಗಿದೆ ಎಂದು ತಿಳಿಯಬಹುದು. ಇದು ಸೆಬಿ ನಿಯಮದ ಪಾಲನೆಯ ಭಾಗವೂ ಆಗಿದೆ.    

ಉತ್ತರ: ನೀವು ಮ್ಯೂಚುವಲ್ ಫಂಡ್ ವಿಭಾಗದಲ್ಲಿ ಹೆಚ್ಚಿನ ಆದಾಯ ಪಡೆಯುವ ಅವಕಾಶ ಇರುವ ಉತ್ಪನ್ನಗಳಿಗೆ ನಿಮ್ಮ ಹಣವನ್ನು ವರ್ಗಾಯಿಸುವ ಉದ್ದೇಶ ಹೊಂದಿರುವುದು ಸರಿಯಾಗಿದೆ. ಆದರೆ, ಈ ನಿರ್ಧಾರದ ಹಿಂದೆ ಅನೇಕ ಮಾಹಿತಿ ಹೊಂದಿರುವುದೂ ಅಗತ್ಯ. ಸಾಮಾನ್ಯವಾಗಿ ಉತ್ತಮ ಮಾರುಕಟ್ಟೆ ಸನ್ನಿವೇಶದಲ್ಲಿ ಎಲ್ಲ ಈಕ್ವಿಟಿ ಹೂಡಿಕೆ ಉತ್ಪನ್ನಗಳು ಉತ್ತಮ ಆದಾಯ ನೀಡುವುದು ಸಹಜ.

ಆದರೆ, ಈ ಸ್ಥಿತಿ ಸತತವಾಗಿ ಇರುತ್ತದೆ ಎಂಬುದು ಸಾರ್ವಕಾಲಿಕವಲ್ಲ. ಹೀಗಾಗಿ, ನಿಮ್ಮ ನಿರ್ಣಯದ ಹಿಂದೆ ಈ ಕೆಳಗಿನ ವಿಮರ್ಶೆ ಮಾಡಿ.

ಹೂಡಿಕೆಯ ಸಮಯದ ಪರಿಧಿ: ಎಲ್ಲದಕ್ಕಿಂತ ಪ್ರಮುಖವಾಗಿ ನಿಮ್ಮ ಹೂಡಿಕೆಯ ಅವಧಿ ಎಷ್ಟು ವರ್ಷ ಇರಬೇಕು ಎನ್ನುವ ನಿರ್ಧಾರ ನಿಮ್ಮ ವೈಯಕ್ತಿಕ ಹಣಕಾಸಿಗೆ ಸಂಬಂಧಿಸಿದ್ದು ಹಾಗೂ ಇದು ನೀವು ಮಾತ್ರ ಊಹಿಸಬಹುದಾಗಿರುವ ವಿಚಾರ. ಸಾಮಾನ್ಯವಾಗಿ ಈಕ್ವಿಟಿ ವಿಭಾಗದ ಹೂಡಿಕೆಗಳಾಗಿದ್ದರೆ, ಕೆಲವೊಮ್ಮೆ ಅಲ್ಪಾವಧಿಯಲ್ಲಿ ಅತಿ ವೇಗದ ಲಾಭ ಕಂಡುಬಂದರೂ, ಮಾರುಕಟ್ಟೆಯ ಏರಿಳಿತದ ಸ್ಥಿತಿಯಲ್ಲಿ ಇದು ನಿರಂತರವಲ್ಲ. ಹೀಗಾಗಿ, ದೀರ್ಘಾವಧಿ ಹೂಡಿಕೆಗಳೇ ಹೆಚ್ಚು ಸೂಕ್ತ. ಈ ಅವಧಿಗೂ ಮೊದಲು ನಿಮ್ಮ ನಿರ್ಧರಿತ ಲಾಭ ಬಂದರೆ ಮಾರಾಟ ಮಾಡುವ ಅವಕಾಶ ಇಲ್ಲವೆಂದಲ್ಲ.

ಆದರೆ, ಮಾರುಕಟ್ಟೆಯ ಅನಿವಾರ್ಯ ಪರಿಸ್ಥಿತಿಯ ಸಂದರ್ಭದಲ್ಲಿ ಉಂಟಾದ ನಷ್ಟವನ್ನು ದೀರ್ಘಾವಧಿ ಹೂಡಿಕೆಗಳಷ್ಟೇ ಭರಿಸುವ ಸಾಮರ್ಥ್ಯ ಹೊಂದಿವೆ. ನಿಮ್ಮ ಹೂಡಿಕೆ ನಿರ್ಧಾರ 3 ರಿಂದ 5 ವರ್ಷದ್ದಾಗಿದ್ದರೆ ಮಾತ್ರ ಇದು ಹೆಚ್ಚಿನ ಹಾಗೂ ನಿಯತ ಲಾಭ ಕೊಡಬಲ್ಲದು. ಈಕ್ವಿಟಿ ವಿಭಾಗದ ಉತ್ತಮ ಹೂಡಿಕೆಗಳು ಆರ್ಥಿಕ ಅಪಾಯ ಇಲ್ಲದ ಹೂಡಿಕೆಗಳಿಗೆ ಹೋಲಿಕೆ ಮಾಡಿದರೆ ದ್ವಿಗುಣ ಆದಾಯ ಕೊಟ್ಟಿರುವುದು ಕಂಡುಬರುತ್ತದೆ.

ಆರ್ಥಿಕ ಅಪಾಯ: ಸಾಮಾನ್ಯವಾಗಿ ಯಾವುದೇ ಈಕ್ವಿಟಿ ವಿಭಾಗದ ಫಂಡ್‌ಗಳಲ್ಲಿ ಹೂಡಿಕೆ ಮಾಡುವ ಮೊದಲು ಆಯಾ ಸ್ಕೀಮ್‌ಗೆ ಸಂಬಂಧಪಟ್ಟ ದಾಖಲೆಗಳಲ್ಲಿ ರಿಸ್ಕೋ ಮೀಟರ್ ಪ್ರಕಟಿಸಲಾಗುತ್ತದೆ. ನಿಮ್ಮ ಹೂಡಿಕೆಯ ಅವಧಿಗೆ ಹೋಲಿಕೆ ಮಾಡಿ ಈ ಬಗ್ಗೆ ನಿರ್ಧಾರ ಕೈಗೊಳ್ಳಿ. ಯಾವುದೇ ಕ್ಷಿಪ್ರ ಅಗತ್ಯಗಳಿಗೆ ಬೇಕಾಗಿರುವ ಹಣವನ್ನು ಇಲ್ಲಿ ಹೂಡಿಕೆ ಮಾಡಬೇಡಿ.

ತೆರಿಗೆ ದರ:  ಈಕ್ವಿಟಿ ವಿಭಾಗದ ಹೂಡಿಕೆಗಳಾಗಿದ್ದರೆ, ಒಂದು ವರ್ಷಕ್ಕಿಂತ ಕಡಿಮೆ ಅವಧಿಯಲ್ಲಿ ಮಾರಾಟ ಮಾಡಿದರೆ, ಅಲ್ಪಾವಧಿ ಹೂಡಿಕೆಯಾಗುತ್ತದೆ. ಇದು ಶೇ 20ರ ದರದಲ್ಲಿ ತೆರಿಗೆಗೆ ಒಳಪಡುತ್ತದೆ. ಅದುವೇ ಒಂದು ವರ್ಷಕ್ಕೂ ಮೇಲ್ಪಟ್ಟು ಹೂಡಿಕೆ ಮಾಡಿ ಮಾರಾಟ ಮಾಡಿದಾಗ ದೀರ್ಘಾವಧಿ ಲಾಭವಾಗುತ್ತದೆ. ₹1.25 ಲಕ್ಷದ ತನಕದ ಲಾಭಕ್ಕೆ ತೆರಿಗೆ ಇಲ್ಲ. ಇದಕ್ಕೂ ಮೇಲ್ಪಟ್ಟ ಮೊತ್ತಕ್ಕೆ ಶೇ 12.5ರಷ್ಟು ತೆರಿಗೆ ಇದೆ.  

ಸರಣಿ ಹೂಡಿಕೆ: ನಿಮ್ಮ ಮೊತ್ತ ಒಂದೇ ಬಾರಿ ಒಂದೇ ಫಂಡ್‌ನಲ್ಲಿ ಹೂಡುವುದಕ್ಕಿಂತ ಈಕ್ವಿಟಿ ವಿಭಾಗದ ನಾಲ್ಕೈದು ಫಂಡ್‌ಗಳಲ್ಲಿ ವಿಂಗಡಿಸಿ ಹೂಡಿಕೆ ಮಾಡುವುದು ಆರ್ಥಿಕ ಅಪಾಯ ನಿರ್ವಹಣೆಯ ದೃಷ್ಟಿಯಲ್ಲಿ ಹೆಚ್ಚು ಸಮಂಜಸ.

ಎಕ್ಸಿಟ್ ಲೋಡ್:  ಬಹುತೇಕ ಫಂಡ್‌ಗಳು ಒಂದು ವರ್ಷಕ್ಕಿಂತ ಹೆಚ್ಚಿನ ಅವಧಿಯ ಈಕ್ವಿಟಿ ವಿಭಾಗದ ಹೂಡಿಕೆಗಳಿಗೆ, ಹೂಡಿಕೆ ಮರಳಿ ಪಡೆಯುವ ಸಂದರ್ಭದಲ್ಲಿ ಎಕ್ಸಿಟ್ ಲೋಡ್ ವಿಧಿಸುವುದಿಲ್ಲ. ಅನಿವಾರ್ಯ ಸಂದರ್ಭದಲ್ಲಿ ಈ ಅವಧಿಗೂ ಮುನ್ನ ಹಣ ಬೇಕಾದರೆ ಶೇ 1ರಷ್ಟು ಎಕ್ಸಿಟ್ ಲೋಡ್ ವಿಧಿಸುವ ಅವಕಾಶ ಇರುತ್ತದೆ.