ಕಡಕೋಳ ಮಡಿವಾಳಪ್ಪನೆಂಬ ಲೋಕದ ಬೆಳಕು

ಕಡಕೋಳ ಮಡಿವಾಳಪ್ಪನ ಜಾತ್ರೆ ಜನವರಿ 3 ಹಾಗೂ 4ರಂದು ನಡೆಯಲಿದೆ. ಇದು ಸಾಧು ಸಂತರ ತತ್ವಪದಗಳ ಸತ್ಸಂಗ. ವಾರವೊಪ್ಪತ್ತು ಗವಿ ಭೀಮಾಶಂಕರ ಪೌಳಿಯ ತುಂಬಾ ಮಹಾರಾಷ್ಟ್ರ ಆಂಧ್ರ ತೆಲಂಗಾಣದ ಜಟಾಧಾರಿ ಸಾಧುಗಳ ಸಂದೋಹ. ಗವಿಯ ಮುಂದಿನ ನಿಗಿ ನಿಗಿ ಕೆಂಡದಧುನಿಯ ಸುತ್ತಲೂ ಸಿದ್ಧರ ಸಿದ್ಧಪತ್ರಿ ಮತ್ತು ಜ್ಯೋತಿಯ ಘಮಲು. ದಮಡಿ ಚಳ್ಳಮ ಏಕತಾರಿಗಳ ನಾದ ಸಂವಾದ. ತರಹೇವಾರಿ ಜೈಕಾರಗಳ ಸಮಾರೋಹ. ಇತ್ತ ಮಠದ ಆವರಣದಲ್ಲಿ ದಲಿತ ಮುಸ್ಲಿಮರಾದಿಯಾಗಿ ಎಲ್ಲಾ ಜಾತಿಯವರು ಸೇರಿ ತಯಾರಿಸುವ ಕಜ್ಜ ಭಜ್ಜಿಯ ಮಹಾಪ್ರಸಾದ. ಬೇವಿನ ಸೊಪ್ಪು ಸೇರಿದಂತೆ ಸಕಲೆಂಟು ಬಗೆಯ ಸೊಪ್ಪು ಕಾಯಿಪಲ್ಯ ಮತ್ತು ಸಿರಿಧಾನ್ಯಗಳನ್ನು ಸೇರಿಸಿ ಮಣಗಟ್ಟಲೇ ಕುದಿಯುವ ಕಡಾಯಿಗಳಲ್ಲಿ ತಯಾರಿಸುವ ಅನನ್ಯ ರುಚಿಕಟ್ಟಿನ ಪೌಷ್ಟಿಕಾಂಶದ ವ್ಯಂಜನವೇ ಭಜ್ಜಿ. ಖಾಂಡದ ಸಂಜೆ ಸಜ್ಜೆ ಮತ್ತು ಜೋಳದ ರೊಟ್ಟಿಗಳೊಂದಿಗೆ ಭಜ್ಜಿಯ ಸಾಂಗತ್ಯ. ಸಹಸ್ರಾರು ಜನ ಸೇರುವ ಅಪರೂಪದ ಸಮೂಹಪಂಕ್ತಿ ಭೋಜನ. ಇದೆಲ್ಲವೂ ಊರ ಮುಂದಲ ಹಿರೇಹಳ್ಳದ ನೀರನೆರಳ ಸಲಿಲಧಾರೆ.