ಬಸವಣ್ಣನ ಹೆಸರಲ್ಲಿ ಲಿಂಗಾಯತರು ಒಂದಾಗಲಿ: ಸಭಾಪತಿ ಬಸವರಾಜ ಹೊರಟ್ಟಿ

‘ನವದೆಹಲಿಯಲ್ಲಿ ನಿರ್ಮಿಸಿರುವ ನೂತನ ಸಂಸತ್‌ ಭವನಕ್ಕೆ ಭಾರತ ಮಂಟಪ ಎಂದು ಹೆಸರಿಡಲು ಹನ್ನೆರಡನೇ ಶತಮಾನದಲ್ಲಿ ಬಸವಣ್ಣನವರು ಸ್ಥಾಪಿಸಿದ ಜಗತ್ತಿನ ಮೊಟ್ಟ ಮೊದಲ ಸಂಸತ್‌ ಅನುಭವ ಮಂಟಪದ ಹೆಸರೇ ಪ್ರೇರಣೆ. ಸಂಸತ್ತಿನ ಉದ್ಘಾಟನಾ ಸಮಾರಂಭದಲ್ಲಿ ಈ ಕುರಿತು ಪ್ರಧಾನಿ ನರೇಂದ್ರ ಮೋದಿ ಕೂಡ ಮಾತನಾಡಿದ್ದರು’ ಎಂದು ಸುತ್ತೂರಿನ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ಹೇಳಿದರು. ಹೊಸ ಸಂಸತ್ತಿನಲ್ಲಿ ಅನುಭವ ಮಂಟಪದ ಚಿತ್ರ ಕೂಡ ಅಳವಡಿಸಲಾಗಿದೆ. ಬಸವಣ್ಣನವರ ಬೆಳಕು ಎಲ್ಲೆಡೆ ಹರಿಯುತ್ತಿದೆ. ಬಸವೇಶ್ವರರ ತತ್ವಾದರ್ಶಗಳು ಕರ್ನಾಟಕ ಬಿಟ್ಟು ಜಗತ್ತಿಗೆ ಪಸರಿಸಿದ್ದರೆ ಇರಾಕ್‌ ಹಮಾಸ್‌ ಉಕ್ರೇನ್‌ನಲ್ಲಿ ಯುದ್ಧಗಳು ಆಗುತ್ತಿರಲಿಲ್ಲ ಎಂದರು.

‘ಬಸವತತ್ವದ ಪ್ರಚಾರ ಪ್ರಸಾರಕ್ಕಾಗಿ ಶ್ರಮಿಸಿದವರಿಗೆ ಮುಂದಿನ ವರ್ಷದಿಂದ ಅನುಭವ ಮಂಟಪ ಉತ್ಸವದಲ್ಲಿ ಹೊಸದಾಗಿ ಬಸವ ಭಾಸ್ಕರ ಪ್ರಶಸ್ತಿ ನೀಡಿ ಗೌರವಿಸಲಾಗುವುದು. ಪ್ರಶಸ್ತಿ ಪತ್ರ ಹಾಗೂ ₹1 ಲಕ್ಷ ನೀಡಲಾಗುವುದು. ಈ ಪ್ರಶಸ್ತಿಯ ಮೊತ್ತವನ್ನು ಹಾರಕೂಡದ ಚನ್ನವೀರ ಶಿವಾಚಾರ್ಯರು ಭರಿಸುವರು. ಅವರೇ ಈ ವಿಷಯ ತಿಳಿಸಿದ್ದಾರೆ’ ಎಂದು ಬಸವಲಿಂಗ ಪಟ್ಟದ್ದೇವರು ತಿಳಿಸಿದರು.

‘ಬಸವ ಭಕ್ತರು ಇತರೆ ಸಮಾಜದವರನ್ನು ಗೌರವಿಸಬೇಕು. ಆದರೆ ಕಟ್ಟುನಿಟ್ಟಿನಿಂದ ಬಸವತತ್ವ ಪಾಲಿಸಬೇಕು. ತಮ್ಮ ತತ್ವಗಳ ಮೂಲಕ ಬಸವಣ್ಣನವರು ಹೊಸ ಸಮಾಜ ಕಟ್ಟಿದ್ದಾರೆ. ಆದರೆ ಯಾರು ಕೂಡ ಅನುಸರಿಸುತ್ತಿಲ್ಲ’ ಎಂದು ಪೌರಾಡಳಿತ ಸಚಿವ ರಹೀಂ ಖಾನ್‌ ಹೇಳಿದರು. ವಚನಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು. ಆಗ ಬಸವಣ್ಣ ಏನೆಂಬುದು ಗೊತ್ತಾಗುತ್ತದೆ. ಬಸವಣ್ಣ ನಮಗಾಗಿ ಎಲ್ಲಾ ಬಿಟ್ಟು ಬಂದಿದ್ದಾರೆ. ಆದರೆ ಅವರ ತತ್ವಗಳನ್ನು ನಾವು ಪಾಲಿಸುತ್ತಿಲ್ಲ ಎಂದರು.

ಅರಣ್ಯ ಖಾತೆ ಸಚಿವ ಈಶ್ವರ ಬಿ. ಖಂಡ್ರೆ ಮಾತನಾಡಿ ‘ಕಾಲಮಿತಿಯಲ್ಲಿ ಅನುಭವ ಮಂಟಪ ನಿರ್ಮಾಣ ಕಾಮಗಾರಿ ಪೂರ್ಣಗೊಳಿಸಲಾಗುವುದು. ಬಸವಕಲ್ಯಾಣ ಪ್ರವಾಸಿ ಹಾಗೂ ಧಾರ್ಮಿಕ ತಾಣವಾಗಬೇಕು. ಜನ ಕಲ್ಯಾಣಕ್ಕೆ ಬಂದರೆ ಸಮಾಧಾನ ಆಗಬೇಕು’ ಎಂದರು. 1972ರಲ್ಲಿ ಚನ್ನಬಸವ ಪಟ್ಟದ್ದೇವರು ಭಾಲ್ಕಿಯಿಂದ ಬಸವಕಲ್ಯಾಣಕ್ಕೆ ಬಂದು ಅನುಭವ ಮಂಟಪ ಕಟ್ಟಲು ಸಾಕಷ್ಟು ಶ್ರಮ ವಹಿಸಿದ್ದರು. ಅವರಿಗೆ ಭೀಮಣ್ಣ ಖಂಡ್ರೆ ಸೇರಿದಂತೆ ಹಲವರು ನೆರವು ನೀಡಿದ್ದರು. ಈಗ ಇದೇ ಪರಿಸರದಲ್ಲಿ ನೂತನ ಅನುಭವ ಮಂಟಪ ನಿರ್ಮಿಸಲಾಗುತ್ತಿದೆ ಎಂದು ತಿಳಿಸಿದರು.