ಹಾವೇರಿ | ಎಲ್ಲೆಡೆ ಶೌಚಾಲಯ ಕೊರತೆ: ಜನರ ಪರದಾಟ

ಈ ಹಿಂದೇ ಅಂಚೆ ಕಚೇರಿ ಮುಂಭಾಗ ಎಸ್‌ಬಿಐ ಪೋಲಿಸ್ ಠಾಣೆ ಮುಖ್ಯ ಮಾರುಕಟ್ಟೆ ರಸ್ತೆ ಇಂದಿರಾ ಸರ್ಕಲ್ ಭರಮಲಿಂಗೇಶ್ವರ ವೃತ್ತ ಸಾರ್ವಜನಿಕ ಆಸ್ಪತ್ರೆ ಸೇರಿದಂತೆ ಜನದಟ್ಟಣೆ ಇರುವ ಸ್ಥಳಗಳಲ್ಲಿ ಪುರುಷ ಹಾಗೂ ಮಹಿಳೆಯರಿಗಾಗಿ ಪ್ರತ್ಯೇಕ ಸಂಚಾರಿ ಮೂತ್ರಾಲಯಗಳನ್ನು ಅಳವಡಿಸಲಾಗಿತ್ತು. ಆದರೆ ವರ್ಷದಿಂದೀಚೆಗೆ ಅವುಗಳು ಕಾಣೆಯಾಗಿರುವುದರಿಂದ ಸಾರ್ವಜನಿಕರು ಮೂತ್ರ ವಿಸರ್ಜನೆಗೆ ಪಡಿಪಾಟಲು ಪಡುವಂತಾಗಿದೆ.  ಸವಣೂರು ಪಟ್ಟಣ 64 ಗ್ರಾಮಗಳನ್ನು ಒಳಗೊಂಡ ತಾಲ್ಲೂಕು ಕೇಂದ್ರ. ಇಲ್ಲಿಗೆ ಪ್ರತಿನಿತ್ಯ ಕೆಲಸಕ್ಕೆಂದು ಬರುವವರ ಸಂಖ್ಯೆ ಹೆಚ್ಚಿದ್ದು ಸಾರ್ವಜನಿಕರು ಮೂತ್ರ ವಿಸರ್ಜನೆಗಾಗಿ ಅಲೆದಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಜನಜಂಗುಳಿಯಿಂದ ತುಂಬಿರುವ ಪಟ್ಟಣದ ಮಾರ್ಕೆಟ್‌ ರಸ್ತೆ ಅಂಚೆ ಕಚೇರಿ ರಸ್ತೆ ಪೊಲೀಸ್ ಠಾಣೆ ರಸ್ತೆ ಉಪವಿಭಾಗಾಧಿಕಾರಿಗಳ ಕಚೇರಿ ಸೇರಿದಂತೆ ಪ್ರಮುಖ ಸ್ಥಳಗಳಲ್ಲಿ ಸಾರ್ವಜನಿಕ ಶೌಚಾಲಯಗಳನ್ನು ನಿರ್ಮಿಸಬೇಕು ಎಂದು ನಾಗರಿಕರು ಒತ್ತಾಯಿಸಿದ್ದಾರೆ.